Joni 11

Jesu mbwaakabusya Lazalo kubafu

¹ Kwakali mwaalumi umwi wakali kuciswa, zina wakali Lazalo, wakali kukkala mu Betani. Ooyu ngomunzi waba Maliya a Maata mupati wakwe. ( ² Maliya ooyu ngonguwe wakananika Mwami Jesu amafuta, akupukuta maulu aakwe amasusu. Lazalo wakali kuciswa wakali munyinandumi.) ³ Aboobo bacizi bakwe bobilo aaba bakatumya nkkombe kuli Jesu yakuti, “O Mwami, mweenzinyoko ngoyandisya ulaciswa.” ⁴ Pele Jesu naakamvwa majwi aaya wakati, “Kuciswa ooku takuli kwalufu pe. Nkwakuleta bulemu kuli Leza, kutegwa Mwanaa Leza akalemezegwe akaambo kabulwazi oobu.”

⁵ Lino Jesu wakali kumvwana kapati aba Maata amusyoonto wakwe, kubikkilizya a Lazalo. ⁶ Pele naakamvwa kuti Lazalo ulaciswa wakacilikkede kubusena ooko nkwaakabede kwamazuba aambi obilo. ⁷ Naakamana mazuba aaya wakati kuli basikwiiya bakwe, “Atubweede kucisi ca Judiya alimwi.” ⁸ Pele basikwiiya bakati, “O Mwiiyi, lino-lino aawa bantu bakooko bakali kuyanda kukuuma amabwe, sena ubweede alimwi nkukonya?” ⁹ Jesu wakaingula kuti, “Tee buzuba bujisi maoola aali kkumi aabili? Muntu weenda sikati talifumpuli, nkaambo uleenda zuba kalibala. ¹⁰ Pele ooyo weenda masiku ulalifumpula nkaambo uli mumudima.” ¹¹ Naakamana kwaamba boobo wakaambila basikwiiya bakwe kuti, “Lazalo, mweenzuma uloona, ono njakukuti nkamubusye.” ¹² Basikwiiya bakati kulinguwe, “O Mwami, naa kuti uloona anu ulapona.” ¹³ Lino Jesu wakali kwaamba koona kwalufu, pele balo bakali kuyeeya koona kwaŋonzi. ¹⁴ Mpoonya Jesu wakakapwaya wati, “Lazalo wafwa. ¹⁵ Pele nkaambo kandinywe ndakkomana kuti mebo nsiindakaliko naakafwa, ono muyakusyoma. Atweende.” ¹⁶ Mpoonya aawo Tomasi, uutegwa ngwamayanga, wakaambila basikwiiyanyina kuti, “Atuunke aswebo kutegwa tukafwe aawe.”

¹⁷ Ciindi Jesu naakasika, wakajana kuti kwakaindide mazuba one Lazalo kazikkidwe kale. ¹⁸ Ku Betani kwakali afwiifwi aku Jelusalemu, wakali musinzo mufwiifwi buyo. ¹⁹ Nkabela bantu banji bakalizide kudilwe kuzoolizya ba Maata a Maliya akaambo kalufu lwamunyinandumi. ²⁰ Maata naakamvwa kuti Jesu wasika, wakainka kuyoomucingauzya, Maliya wakalikkede muŋanda. ²¹ Mpoonya Maata wakaambila Jesu kuti, “O Mwami, kuti nookaliko, mwanookwesu naatakafwa. ²² Kwalo niciba ciindi cino ndizi kuti kufumbwa ncotikumbile kuli Leza, ulakonzya kukupa.” ²³ Jesu wakati kulinguwe, “Munyinandumaako ulabuka alimwi.” ²⁴ Maata wakaingula kuti, “Ndizi kuti uyoobuka alimwi mububuke bwabafu, mubuzuba bwamamanino.” ²⁵ Jesu wakati kulinguwe, “Uubusya bafu akubapa buumi ndime. Ooyo uusyoma ndime, nikuba kuti wafwa, inga unooli muumi. ²⁶ Awalo uupona akusyoma mulindime, takooyoofwa pe. Sena ulasyoma oobo?” ²⁷ Maata wakati, “Iiyi, O Mwami, ndilasyoma kuti nduwe Munanike, Mwanaa Leza, ooyo uuyooboola ansi aano.”

²⁸ Naakamana kwaamba boobo, Maata wakainka kuyooita Maliya, muce wakwe, wamuvwiila-vwiila kuti, “Mwiiyi mpali wasika, ulakwiita.” ²⁹ Naakamvwa boobo, Maliya wakanyamuka, akufwambaanina kuli Jesu. ( ³⁰ Aawo Jesu katanasika mumunzi pe, wakacili kunze aamunzi, kubusena nkwaakamujanina Maata.) ³¹ Lino bantu aabo bakali aa Maliya muŋanda kumulilausya, nibakabona nkwaakanyamuka kuzwida anze, bakamutobela nkaambo bakayeeya kuti uya kucuumbwe kukulila.

³² Lino Maliya naakasika kubusena ooko kwakali Jesu, naakamubona, wakaliwaala kumaulu aa Jesu akwaamba kuti, “O Mwami, kuti nookaliko, mwanookwesu naatakafwa pe.” ³³ Jesu naakamubona ulalila, wakapenga kapati mumoyo, akweetela. ³⁴ Mpoonya wakati, “Ino nkuli kucuumbwe nkomumulazikide?” Bakati, “Mwami, koza ubone.” ³⁵ Jesu wakalila. ³⁶ Aboobo bantu bakati, “Ino bali kumvwana!”

³⁷ Pele bamwi babo bakaamba kuti, “Sena ooyu muntu wakabonya moofu mwati naakakonzya kucita kuti ooyu muntu atafwi?” ³⁸ Jesu, kapengede mumoyo akweetela, wakasika kucuumbwe, cakali campangala, cakasinkidwe abbwe. ³⁹ Jesu wakabaambila kuti, “Muligwisye bbwe.” Eelyo Maata, mucizi wamufu, wakati kuli Jesu, “O Mwami, ecino ciindi ulanunka, nkaambo ono kwiindide mazuba one kazikkidwe.” ⁴⁰ Jesu wakamwiingula kuti, “Tee kayi ndakwaambila kale kuti, kuti naa wandisyoma ulakonzya kubona bulemu bwa Leza?” ⁴¹ Aboobo bbwe bakaligwisya. Mpoonya Jesu wakalungumana kujulu akuti, “Taata, ndakulumba nkaambo kakuti wandimvwa. ⁴² Kwalo ndilizi kuti lyoonse ulandimvwa, pele ndaamba boobu akaambo kabantu aaba bali waano kutegwa basyome kuti nduwe wakandituma.” ⁴³ Naakamana kwaamba boobu, wakapozomoka ajwi pati wakati, “Lazalo, kozwa.” ⁴⁴ Eelyo ooyo wakafwide wakazwa, kaputaidwe, kumaulu akumaboko azisani ziputailwa bafu, akwalo kumeso kaputaidwe acisani. Jesu wakati kulimbabo, “Amumuzambulule aende.”

Mbobakakanza kujaya Jesu

⁴⁵ Bunji bwa bantu aabo bakasindikilide Maliya mucizi wa Lazalo nibakabona cakacita Jesu, bakamusyoma. ⁴⁶ Pele bamwi babo bakainka kuyooambila Bafalisi ncaakacita. ⁴⁷ Nkabela bapaizi basilutwe a Bafalisi bakabungana muli cabo akwaamba kuti, “Ino tucite buti? Nkaambo muntu ooyu wacita zitondezyo zyanguzu zinji! ⁴⁸ Kuti tumulekele kaciya bucita boobu, bantu boonse balatalika kumusyoma, eelyo Baloma balaboola akuzoomwaya busena oobu busalala alimwi amusyobo wesu.”

⁴⁹ Lino umwi wabo, uutegwa Kayafa, wakali ngomupaizi mupati mwaka ooyo, wakati kulimbabo, “Ani muzi nzi nywebo? ⁵⁰ Tamuzi nikuba kumvwisya kuti ncibotu kuti muntu omwe afwide banamaleya kwiinda kuti musyobo woonse ufwidilile.” ⁵¹ Eeci ncaakaamba tiicakazwa mulinguwe lwakwe mwini pe, pele mbwaakali ngomupaizi mupati mumwaka ooyo, wakasinsima makani aakuti Jesu uleelede kufwida musyobo wa Bajuda. ⁵² Kutali buyo kufwida musyobo ooyo ulikke, pele kuti ayobolole akubungika antoomwe kulinguwe boonse bana ba Leza bamwaikide munyika mboizulwa.

⁵³ Eelyo kuzwa mubuzuba oobo bakakanza kumujaya. ⁵⁴ Akaambo kaako Jesu taakwe naakacili kweenda antangalala mucisi ca Judiya, pele kuzwa ooko wakainka kunyika yakumbali aankanda, kumunzi wa Efulemu. Ooko nkwaakaakukkala abasikwiiya bakwe.

⁵⁵ Lino Pobwe lya Bajuda lya Kwiindilila lyakali aafwiifwi, nkabela bantu banji bazwa mumasi aandeene-andeene bakalibeelezya kuunka ku Jelusalemu kutegwa bakalisalazye kweendelana aciyanza ca Bajuda. ⁵⁶ Bantu bakali kulangaula Jesu ooko, akubuzyanya-buzyanya nibakali kwiimaima muŋanda ya Leza kuti, “Sena muyeeya kuti takoosika kupobwe eeli?” ⁵⁷ Abalo bapaizi basilutwe a Bafalisi bakapede malailile aakuti kufumbwa muntu uuzi nkwabede abazibye kutegwa bamujate.