Joni 10
Mweembezi mubotu
1 “Ncobeni ndamwaambila kasimpe, ooyo uutanjilili kumulyango wacaanda cambelele, uutantila aambi buyo, mmubbi amufumpi. 2 Pele ooyo uunjilila kumulyango ngomweembezi wambelele. 3 Mulindizi wamulyango ulamujalwida, mbelele zilalimvwa jwi lyakwe. Ulaziita mbelele zyakwe mazina akuzisolweda kumacelelo. 4 Amana kuzigwisya anze ulazisololela, azyalo zilamuccilila nkaambo zililizi jwi lyakwe. 5 Mweenzu tazimuccilili, zilamutija, nkaambo tazyaazi majwi aabeenzu.”
6 Jesu wakabaambila cikonzyanyo eeci, pele balo tiibakaziba ncocaamba. 7 Aboobo Jesu wakabaambila alimwi wakati, “Ncobeni, ndime mulyango wambelele. 8 Boonse bakasaanguna kusika mebo nketana, mbafumpi ababbi, nkabela mbelele taakwe nizyakabaswiilila pe. 9 Ndime mulyango, kufumbwa uunjilila mulindime ulafutulwa. Unoonjila akuzwa anze, uyoojana cakulya. 10 Mubbi uzida buyo kubba akujaya, pele mebo ndakazida kuti bantu babe aabuumi, ncobeni buumi buzwide.
11 “Ndime mweembezi mubotu. Mweembezi mubotu ulatuula buumi bwakwe akaambo kambelele. 12 Pele mubelesi buyo, simali, uutali ngomwini mbelele, nabona umpe kazida mbelele, ulatija akusiya mbelele, eelyo umpe ulazijata zimwi, zimwi zilamwaika. 13 Ncatijila nkaambo mmubelesi buyo. Takwe makani ambelele pe. 14 Pele mebo ndime mweembezi mubotu, ndilizi mbelele zyangu, azyalo zilindizi, 15 mbubonya Taata mbwandizi, ambebo ndilimuzi Taata. Nkakaambo aaka ncekonzya kutuula buumi bwangu akaambo kambelele. 16 Nkozili azimbi mbelele, zitali zyacaanda eeci. Azyalo ndiyoozileta, ziyoomvwa jwi lyangu, eelyo ziyooba butanga bomwe, amweembezi omwe.
17 “Taata ncandiyandila nkaambo kakuti ndilatuula buumi bwangu kutegwa nkabujole alimwi. 18 Taakwe muntu uuyoondinyanga buumi pe, pele njoobutuula ndemwini. Ndijisi nguzu zyakubutuula azyakububweza ndemwini. Aaya ngamalailile ngendakapegwa a Taata.”
19 Kwakaba kwaandaana mukati kabantu akaambo kamajwi aaya. 20 Bunji bwabo bakaamba kuti, “Ooyu muntu unjidwe sikazwa, ulisondokede. Mumuswiililila nzi ooyu?” 21 Pele bamwi bakati, “Muntu uunjidwe takonzyi kwaamba boobo pe. Sena inga sikazwa wakonzya kubonya muntu moofu?”
Bajuda mbubakakaka Jesu
22 Cakali ciindi capobwe lyakuyeeya kumana kwakuyakwa kwaŋanda ya Leza mu Jelusalemu, alimwi wakali mupeyo. 23 Lino Jesu wakali kweendeenda muŋanda ya Leza mukkota lya Solomoni. 24 Nkabela bantu bakazoomubunganina akwaamba kuti, “Ino uyooliyubununa lili antangalala kutegwa katutazumbauzyi kuti nduwe Munanike wa Leza? Kotwaambila antangalala tusalalilwe.” 25 Jesu wakaingula kuti, “Ndakamwaambila kale, pele tamusyomi pe. Milimo eeyi njecita muzina lya Taata njiindilungulula. 26 Nikuba boobo tamusyomi nywebo akaambo kakuti tamuli babutanga bwambelele zyangu. 27 Mbelele zyangu zilamvwa jwi lyangu, ambebo ndilizizi, azyalo zilanditobela. 28 Mebo ndilazipa buumi butamani. Tazikooyoofwa, alimwi taakwe uunga ulandinyanga pe. 29 Nkaambo Taata wakandipa mmupati kwiinda boonse cakuti taakwe uunga wakonzya kuzigwisya kuzwa mujanza lyakwe. 30 Mebo a Taata tuli omwe buyo.”
31 Bantu bakabweza mabwe kuti bamufuse. 32 Jesu wakabaambila kuti, “Ndakamutondezya milimo mibotu minji iizwa kwa Taata. Ino njiili yamilimo mibotu eeyi njomuyanda kunduumina mabwe?” 33 Bantu bakamwiingula kuti, “Tatukuumini zyamilimo mibotu pe, pele akaambo kakusampaula Leza. Nkaambo yebo omuntu buyo, walicita kuba Leza.”
34 Jesu wakati kulimbabo, “Sena takulembedwe mu Mulawo wanu kuti Leza wakati, ‘Muli baleza!’ 35 Leza wakabaita kuti mbaaleza bantu aabo bakakanana majwi aakwe. Nkokuti Malembe ngamasimpe lyoonse. 36 Lino nywebo mwaambila ndime Taata ngwaakasala akutuma ansi aano kuti, nsampula Leza, akaambo kakuti ndaamba kuti, ‘Ndi Mwanaa Leza!’ 37 Kuti naa nsiciti milimo ya Taata, mutandisyomi. 38 Pele naa ndiicita, nimutandisyomi mebo lwangu, amwiisyome milimo eeyo kutegwa mukonzye kuziba akumvwisisya kuti Taata uli mulindime, ambebo ndi muli Taata.” 39 Aawa alimwi bakasoleka kumujata, pele wakabapuzumuka.
40 Lino Jesu wakainka alimwi kutala lyamulonga wa Jolodani, kubusena ooko Joni nkwaakali kubbapatizya kusaanguna, waakukkala.
41 Eelyo bantu banji bakaza kulinguwe, bakaamba kuti, “Joni taakwe naakacita citondezyo canguzu pe, pele zyoonse nzyaakaamba amuntu ooyu zili kasimpe.” 42 Ooko bantu banji-banji bakasyoma Jesu.