Joni 1

Ijwi mbulyakaba muntu

¹ Kumatalikilo ooyo uutegwa Jwi wakaliko kale. Lino wakali aantoomwe a Leza, alimwi ngu Leza. ² Ngonguwe wakali a Leza kumatalikilo, ³ zintu zyoonse zyakalengwa anguwe naatali nguwe nikwatakalengwa cintu niciba comwe. ⁴ Muli nguwe momwakali buumi, nkabela buumi oobu bwakali mumuni wabantu. ⁵ Mumuni ooyu ulamunika mumudima, pele mudima tuukonzyi kuuzunda pe.

⁶ Kwakali muntu umwi uutegwa Joni wakatumwa a Leza. ⁷ Joni wakaboolela kuzoopa bumboni bwa Mumuni ooyu, kutegwa mubumboni bwakwe bantu boonse basyome Mumuni. ⁸ Joni teensi ngo Mumuni, pele wakazida kuzoopa bumboni bwa Mumuni.

⁹ Ooyu ngonguwe Mumuni wini-wini wakaza ansi kuzoomunikila bantu boonse. ¹⁰ Walo wakalimo munyika muno, nyika yakalengwa kwiindila muli nguwe, nikuba boobo bantu bamunyika tiibakamuzi pe. ¹¹ Wakaza kucisi cokwabo, pele bantu bakwe tiibakamutambula. ¹² Pele aabo bakamutambula akumusyoma wakabapa nguzu zyakuba bana ba Leza. ¹³ Kuba bana ba Leza tiikwakazwida kubazyali babo, nikuba kukuyanda kwamuntu, pele mbana bazyedwe kunguzu zya Leza.

¹⁴ Nkabela Jwi eelyo lyakaba muntu, wakasika kuzookkala akati kesu kazwide luzyalo abwini. Swebo twakeebela bulemu bwakwe, bulemu bwa Simuzyalwa alikke wa Wisi. Wakali aaluse akwaamba zyakasimpe lyoonse. ¹⁵ Joni wakali kumucitila bumboni. Wakoompolola kuti, “Ngonguwe ooyu ngwendakali kumwaambila kuti, ‘Uuza munsi lyangu ulandiinda, nkaambo wakaliko kale mebo nketanazyalwa!’” ¹⁶ Muluse lwakwe lupati swebo twakatambula zileleko zinji kwiindilila. ¹⁷ Milawo yakapegwa kwiindila muli Mozesi, pele luse abwini zyakazibwa kwiindila muli Jesu Kilisito. ¹⁸ Noliba lili taakwe muntu wakabona Leza, nokuba kaindi kaniini buyo Mwana Simuzyalwa alikke uuyandisigwa nguwakatwaambila zyakwe.

Bumboni Bwa Joni Mubbapatizi

¹⁹ Mboobu bumboni bwa Joni ciindi naakabuzigwa abapaizi a Balevi bakatumwa abapati ba Bajuda baku Jelusalemu kuzoomubuzya kuti, “Ino nduweni?” ²⁰ Wakaingula katakaki waambisya kuti, “Nsili ndime Munanike wa Leza pe.” ²¹ Bakamubuzya kuti, “Ino nduweni? Sena nduwe Elija?” Wakaingula kuti, “Peepe, nsili ndime nguwe.” Bakati, “Sena nduwe Musinsimi uuyooboola?” Joni wakati, “Nsili nguwe.” ²² Nkaako bakamubuzisisya bati, “Kotwaambila we naa nduweni kutegwa tukaambe kuli aabo batutuma. Ino uti nduweni?” ²³ Joni wakati, “Ndime yooyo ngwaakaamba musinsimi Izaya kuti,

‘Kuli waambilizya munkanda kuti,

Amululamike nzila zya Mwami!’”

²⁴ Aabo bantu bakali kumubuzya bakatumidwe a Bafalisi. ²⁵ Alimwi bakamubuzya kuti, “Ino nkaambo nzi ncobbapatizya kuti kotali Munanike, naa Elija, naa musinsimi uuyooboola?” ²⁶ Joni wakabaingula kuti, “Mebo ndibbapatizya amaanzi buyo. Pele akati kanu mpali umwi ngomutazi. ²⁷ Ooyo ngonguwe uuza munsi lyangu, ngonguwe ngweteelede akwaangununa kaanzyo kandyasyo yakwe.” ²⁸ Makani aaya oonse akacitikila kumunzi wa Betani, uuli mutala lyamulonga wa Jolodani, oomo Joni mwaakali kubbapatizya.

Mwanaa Mbelele wa Leza

²⁹ Nibwakaca Joni wakabona Jesu kaza kulinguwe, mpoonya wakati, “Amubone Mwanaa Mbelele wa Leza, uugwisya zinyonyoono zyanyika! ³⁰ Ngonguwe ngwendakali kwaamba nindakati, ‘Uuza munsi lyangu ulandiinda, nkaambo wakaliwo kale mebo nketanazyalwa.’ ³¹ Mebo lwangu tiindakamuzi, pele ndakazida kubbapatizya amaanzi kuti ayubununwe ku Baisilayeli.”

³² Alimwi Joni wakalungulula kuti, “Ndakabona Muuya Uusalala kuuseluka kuzwa kujulu mbuli nkwilimba akukkala ali nguwe. ³³ Mebo nsiindakamuzi, pele Leza wakandituma kubbapatizya amaanzi wakati kulindime, ‘Kufumbwa waakubona muntu uutikaselukilwe Muuya wangu kuzwa kujulu akumukkala, ukazibe kuti ngonguwe ooyo uubbapatizya a Muuya Uusalala.’ ³⁴ Lino lwangu ndemwini ndalibonena, nkankakaako ndapa bumboni bwakuti, ‘Ooyu ngo Mwanaa Leza!’”

Basikwiiya ba Jesu bataanzi

³⁵ Nibwakaca Joni wakaliimvwi abasikwiiya bakwe bobilo, ³⁶ Naakabona Jesu keenda wakati, “Amulange nguulya Mwanaa Mbelele wa Leza.” ³⁷ Basikwiiya bobilo aabo nibakamvwa boobo bakaccilila Jesu. ³⁸ Jesu naakacebuka, wakababona kabamuccilila, eelyo wakabuzya kuti, “Ino muyandaula nzi?” Bakamwiingula kuti, “Rabbi, ino ukkala kuli?” (“Rabbi,” caamba kuti, “Mwiiyi.”) ³⁹ Jesu wakati, “Amuboole mukabone.” Aboobo bakainka akubona nkwaakali kukkala. Bakaakukkala anguwe buzuba oobo boonse, nkaambo kwakali kale kumazuba.

⁴⁰ Umwi wabaabo bakaccilila Jesu, ciindi Joni naakabaambila, wakali Andulu, mwanookwabo Saimoni Pita. ⁴¹ Nkabela Andulu wakasaanguna kuunka kuli Saimoni akuyoomwaambila kuti, “Twamujana Munanike wa Leza.” (Zina eeli lyaamba kuti Kilisito.) ⁴² Andulu wakatolelezya Saimoni kuli Jesu. Jesu nakamubona wakati, “Nduwe Saimoni mwanaa Jona, kuzwa ono unooitwa kuti Kefasi.” (Zina eeli lyaamba kuti, Pita naa bbwe.)

Jesu mbwaakaita Filipo a Natanayeli

⁴³ Nibwakaca Jesu wakayeeya kuunka kucisi ca Galilii, ooko wakajana mwaalumi wiitwa kuti Filipo, mpawo wakamwaambila kuti, “Ndiccilile!” ⁴⁴ Filipo wakali kukkala mu Betesaida. Mumunzi wakali kukkala Andulu a Pita. ⁴⁵ Filipo wakajana Natanayeli, mpoonya wakamwaambila kuti, “Twamujana muntu Mozesi ngwaakalemba mumabbuku aamilawo, ngonguwenya uulembedwe amumabbuku aabasinsimi, ngu Jesu waku Nazaleta, mwanaa Josefa.” ⁴⁶ Natanayeli wakati kuli Filipo, “Sena amwalo mu Nazaleta inga mwazwa cintu cibotu?” Filipo wakaingula wati, “Koboola, ukalibonene omwini.”

⁴⁷ Lino Jesu naakabona Natanayeli uzabuza kulinguwe, wakati, “Ngooyu Muisilayeli mwini-mwini, uutacengi!” ⁴⁸ Natanayeli wakabuzya kuti, “Ino wakandiziba buti?” Jesu wakaingula kuti, “Ndalikubwene kale kocili munsi lyamukuyu, katana akukwiita Filipo.” ⁴⁹ Mpoonya Natanayeli wakaambila Jesu kuti, “O Mufundisi, nduwe Mwanaa Leza! Nduwe Mwami wa Isilayeli!” ⁵⁰ Jesu wakati, “Sena wasyoma oobo nkaambo ndati, ‘Ndakubona kocili munsi lyamukuyu?’ Uyoobona zintu zimbi zipati ziinda ceeci.” ⁵¹ Wakati alimwi, “Ncobeni, muyoobona julu kalijulidwe, abangelo kabatanta akuseluka aa Mwanaa Muntu.”