Jona 4

Kunyema kwa Jona alweengelelo lwa Leza

¹ Pele Jona wakabijilwa kapati, wakakalala. ² Wakakomba ku Mwami Leza wakati, “O Mwami Leza sena eeci tacili ncindakaamba nkecili kwesu? Ncenciceeco ncindakatijilide ku Taasyisyi. Ndakalizi kuti yebo uli Leza siluse sikweetelela, ulamuka kunyema, uli siluyando, uli Leza uutaleteli bantu mapenzi. ³ Nkaako lino O Mwami Leza, ndijaya buyo, nkaambo ncibotu kulindime kufwa kwiinda kupona.”

⁴ Pele Mwami Leza wakaingula kuti, “Sena uleelede kunyema boobu?”

⁵ Jona wakazwa mumunzi waakukkala kujwe kuntumba lyamunzi. Ooko wakaliyakila cilawo, wakkala mucimvule caco, kalindila kuti abone naa ncinzi citicitike kumunzi. ⁶ Mpawo Mwami Leza wakameneka musaansa kutegwa Jona ayuse aleke kubijilwa, Jona wakabotelwa kapati akaambo kamusaansa ooyu. ⁷ Pele kubucedo buzuba bwakatobela Leza wakabamba syaanyungwa wakaluma musaansa ooyo cakuti wakapusama. ⁸ Lino zuba nilyakazwa, Leza wakaleta luuwo lupya lwakujwe, eelyo zuba lyakamuumpa amutwe Jona cakuti wakawizauka. Wakali kuyanda kufwa, aawo wakati, “Ncibotu kuti ndifwe kwiinda kuti nkepona.”

⁹ Pele Leza wakati kuli Jona, “Sena uleelede kunyema boobu akaambo kamusaansa?” Walo wakati, “Iiyi, ndanyema, ndinyemede kapati cakuti ncibotu kufwa.”

¹⁰ Pele Mwami Leza wakati, “Tee wabona mboyandisya musaansa ooyu nokuba kuti tookali kuubambila-bambila nokuba kuukomezya. Wakamena mubusiku bomwe akufwa mubusiku bomwe. ¹¹ Pele munzi wa Nineva ulijisi bantu bainda kuzyuulu zili mwaanda amakumi obilo batakonzyi kuziba cibi acibotu alimwi balijisi ŋombe zinji. Sena nsyeelede kuuengelela munzi mupati uuli mbuli bayooyu?”