Jona 3
Jona mbwaakaswiilila Mwami Leza
1 Mpawo majwi aa Mwami Leza akasikila Jona ciindi cabili, akuti, 2 “Koya kumunzi mupati wa Nineva ukuukambaukile makani ngindakulailila.”
3 Jona wakaswiilila majwi aa Mwami Leza, wakainka ku Nineva. Lino Nineva wakali munzi mupati, wakali kweendwa mazuba otatwe kuuzinguluka. 4 Jona wakali kweendeenda mumunzi. Wakali kweenda lweendo lwabuzuba bomwe buyo, kaambilizya kuti, “Kwasyaala mazuba aali makumi one munzi wa Nineva ulanyonyoonwa.”
5 Bantu bamu Nineva bakasyoma majwi aa Leza. Bakaambilizya kuti kube kuliimya kulya, nkabela boonse, kuzwa kubalemenede kuyoosika kubantu buyo basame masaka.
6 Lino makani aaya naakamusikila mwami wa Nineva, wakaseluka acuuno cakwe cabwami, wasamununa majansi aabwami, wakasama masaka akuyookkala ansi mutwe. 7 Mpawo wakaambilizya mu Nineva kuti, “Kwiindila mukulailila kwamwami abalemenede bakwe, ‘Mutalekeli muntu naba munyama, matanga naa butanga bwambelele kuti bulabile cintu cili coonse, mutalekeli kuti banywe naa balye. 8 Pele amubone kuti bantu abanyama basamikwa masaka. Amubaambile basiye nzila zyabo zibi alupyopyongano. 9 Ino nguni uuzi? Ambweni Leza inga watulekelela akutubeda aankumbu cakuti ulaleka kunyema kapati kuti tutalobi.’”
10 Lino Leza naakabona ncibakacita, ambubakasiya nzila zyabo zibi wakababeda aankumbu cakuti taakabanyonyoona mbuli mbwaakakanzide.