Jobo 7
1 “Sena bukkale bwamuntu tabuli buyumu munyika?
Sena aalo mazuba aabuumi bwakwe taali mbuli aasimilimo?
2 Taali mbuli muzike mbwalilaukila cimvule,
naa mbuli similimo mbwalangila cakuvola cakwe?
3 Mbubonya oobo ambebo mbwepenga mwezi amwezi.
Aalo masiku ngacilabila buyo,
4 ndalala ndayeeya kuti, ‘Ino ndabuka lili?’
Pele masiku malamfu aboobo ndasalauka abulo mane do kubucedo.
5 Mubili wangu ulibumbilidwe amabbabbala aajisi mvunyu,
lukanda lwangu lulaanduka masina alazwa.
6 Mazuba aangu alafwambaana kwiinda cilusyo casikuluka,
akuya kumamanino kakutakwe alulangilo.
7 ‘Koyeeya Leza kuti, buumi bwangu nduuwo buyo.
Meso aangu taakaboni cibotu alimwi pe.’
8 Aabo bandibona ono tabakacindiboni limbi pe,
bayoondilangaula, pele nsikajaniki.
9 Mbuli kkumbi mboliyaaya akumana,
mbubonya oobo awalo uuya kucuumbwe tapilukili limbi pe.
10 Takabooli lwabili kumunzi wakwe pe,
bamukwasyi wakwe boonse baya kumuluba.
11 “Aboobo nsikooleka kukanana pe,
ndinooambaula mukucisa kwamoyo, ndinootongooka mumakatazyo aangu.
12 Sena ndilwizi naa cimpangaliko camumaanzi ncoobikka sikulindila?
13 Nindaamba kuti, ‘Bulo bwangu bulanduumbulizya,
cooneno cangu cilanditontozya,’
14 webo ulandikonga muziloto ulanditilimuna azilengaano,
15 mane inga ndayeeya kuti ncibotu kusinwa akufwa
kwiinda kuti nkepenga boobu.
16 Buumi bwangu ndabusesemwa, nsiciyandi kupona limbi pe.
Amundileke mebo nkaambo mazuba aangu nduuwo buyo.
17 Ino muntu ninzi kuti komuyeeya abulemu O Leza, Kobambilila nzyacita?
18 ulamupenzya cifumo-fumo cili coonse akumusunka ciindi a ciindi.
19 Ino ndilili notileke kundilanga? Ndabula ambwemena mate.
20 Kuti naa ndabisya, ncinzi ncindakucita yebo oolanga bantu?
Nkaambo nzi ncindakubeda mbaakani?
21 Nkaambo nzi ncotandijatili mulandu wangu akulekelela cinyonyoono cangu?
Lino-lino ndoona muvu, uyoondilangaula pele nsikabiwo.”