Jobo 6
Jobo
1 Mpoonya Jobo wakaingula kuti,
2 “Nikwakali kuti kuusa kwangu kulakonzya kweelekwa,
mapenzi aangu abikkwa muceelekelo,
3 ncobeni naali kulema kwiinda musenga wamulwizi.
Lino ncenciceeco majwi aangu ncaali aabukali.
4 Mivwi ya Singuzuzyoonse ilindiyaside,
mubili woonse weendeenda buyoka.
Ziyoosyo zya Leza zilandilwanya.
5 Sena mbongolo yamusokwe ilalila kuti kiijisi bwizu?
Sena musune ulalila kuti kalya?
6 Sena muntu ulakonzya kulya citalungidwe munyo?
Sena cituba caji cilalweela.
7 Eezi zyakulya zitalweeli tazilikki pe.
Zili mbuli cilyo cindicisya.
8 “Akaka nindalikunga ndajana ncekumbila.
Naali kunga Leza wandipa nceyanda.
9 Akaka nikwali kunga Leza wandipwaya buyo,
nikwali kunga ajanza lyakwe kandilobya.
10 Eeci nicanditontozya,
cakuti nindali kukondwa mukucisa kutaleki ooku,
nkaambo taakwe nindatama majwi aa Leza Uusalala.
11 Ino ndicili aanguzu nzi kuti nkecizumanana,
ino nnjane nzi mubuumi oobu, nikuba kuti nkakatile?
12 Sena ndakalya bbwe, naa mubili wangu ndubulo?
13 Kwaamba zyabwini taakwe lugwasyo mulindime pe,
lino zyoonse zyali kundigwasya zyandisiya.
14 “Mumapenzi aali boobu kuyandika beenzinyoko basyomeka,
mukuti inga muntu ulaba nasiya Singuzuzyoonse.
15 Beenzuma balandicenga mbuli mulonga uuyuminina ciindi cacilimo,
16 bali mbuli milonga iisiya mainza,
ilaa maanzi aapaya akaambo kamvula nji.
17 Pele muciindi cacilimo caanda cilanyunguluka,
ciindi ncokupya cilazimaana kuzwa mubusena bwaco.
18 Bantu beenda tanga balaleya kuzwa munzila yabo,
kuti bajane maanzi pele tabaajani, nkaako balafwidilila.
19 Aabo bazwa ku Tema balangaula maanzi,
abalo basilweendo baku Syeba baluusyoma.
20 Lino batyompwa nkaambo baluusyomede,
pele basika kumulonga bagama kuzingauka buyo.
21 Mbombuboobu mbomubede anywebo kuli ndime,
mbumwabona mapenzi aangu, mwayoowa.
22 Sena ndakaamba kuti mundigwasye, naa kuti mundibbadelele?
23 Sena ndati, ‘Amundivune kuzwa kuli basinkondoma,
amundinunune kuzwa kuli basikundidyaminina?’
24 “Amundiiisye ndimvwe. Munditondezye mpindakalubizya.
25 Majwi eeni-eni alayasa, pele kukazya kwanu kwaamba nzi?
26 Ino inga mwandilulamika buti neempengede,
mwamana muti majwi aakwe nduuwo buyo?
27 Masimpe muladyaminina bamusyaala,
alimwi muulisya beenzinyoko.
28 Tubone amundilange, sena inga ndamubejela?
29 Amuleke, ndamukumbila, kutacitwi bubi. Amundileke, taakwe ncendakabisya pe.
30 Sena muyeeya kuti ndabeja, muyeeya kuti nsizi cibotu naa cilubide?