Jobo 4
Kukazyanya kwa Elifazi a Jobo
1 Mpoonya Elifazi Mutemani wakavuwa Jobo
2 wati, “Kuti umwi waamba majwi kulinduwe sena inga ulamunyemena?
Pele nguni unga ulalijata kuti ataambi?
3 Koyeeya, yebo wakazibila kwiisya banji,
alimwi akuyumya bateteete.
4 Majwi aako akapa camba kuli baabo bakali kuzungaana.
Wakayumya baabo bakatiwe.
5 Lino mapenzi mbwaaboolela nduwe watyompwa.
Cakugama nkaako wayoowa kapati.
6 Wali kukomba Leza konyina akampenda?
Ono uleelede kuba aacamba abulangizi.
7 Nkooyeeya, muntu nzi uutajisi mulandu uunga ulafwidilila?
Ndilili nibakanyonyoonwa baluleme.”
8 Mbuli mbwecibwene aabo balima bubi, balatebula bubi.
Aabo basyanga mapenzi bayooatebula ngoonya.
9 Mbuli guwo, Leza ulabanyonyoona,
kubbubbula kwabukali bwakwe kulabalobya.
10 Babi balavuluma mbuli syuumbwa,
pele Leza ulabajala mulomo akutyola meno aabo.
11 Basyuumbwa balaloba akaambo kakubula kulya,
bana basyuumbwa muzyazi balamwaika.
12 Lino kwakaza kumbali kulindime jwi,
kuvwiya-vwiya kwalyo kwakasikila mukutwi kwangu.
13 Eezi zyakacitika kuŋonzi masiku, bantu nibalyoonena,
ndilyo bantu nibalotokwa nilyakasika jwi eeli.
14 Kuyoowa akukankama kwakandijata,
zizo zyangu zyakalebuka.
15 Luuwo lwakainda kubusyu bwangu,
mane masusu akanyanyamuka.
16 Kumbele lyangu kwakaimvwi cintu!
Pele tiindakaciziba kuti ncinzi.
Ciimo eeco cakaliimvwi kumbele lyangu,
kakubateme ndakamvwa jwi kaliti,
17 Sena muntu uulya maila inga walulama kwiinda Leza?
Sena muntu ulakonzya kulondoka kwiinda Leza wakwe?
18 Leza tasyomi babelesi bakwe,
abalo bangelo bakwe ulabapa milandu.
19 Ino mbuti aabo bakabumbwa abulongo,
aabo bali ndusuko buyo, bakonzya kusyobolwa mbuli pempya?
20 Muntu ulakonzya kuba muumi muciindi cacifumo-fumo,
pele kumangolezya wafwa. Ulazikkwa walobela limwi.
21 Buumi bwakwe bulakosolwa, ulafwa tajisi busongo pe.