Jobo 38
Mwami Leza mbwaakaamba
1 Lino Mwami Leza wakaingula Jobo kuzwa mukambizi, wakati,
2 “Nduweni yebo kuti unyansye kulaya kwangu amajwi aatali aabusongo?
3 Libambile cabulombwana, ndilakubuzya, eelyo yebo undiingule.
4 Ino yebo wakali kuli ciindi nindakaimika ntalisyo yanyika?
Ndaambila kuti naa kokonzya.
5 Nguni wakeenga masimpilo aayo, ede ulizi?
Nguni wakalandamuna lukole kwiipima?
6 Ino misemo yayo yakaimvwi aanzi?
Alimwi nguni wakabikka bbwe lyacooko cayo?
7 Sena wakaliko mubuzuba oobo bangelo nibakoompolola cakusekelela
anyenyezi zyakubucedo nizyakali kutangala?
8 Ino nguni wakajalila lwizi azitendele nilwakayutuka, nilwakayutuka mbuli kuti lwazwa mwida lyamutumbu?
9 Ndime ndakavumba lwizi amakumbi, alimwi ndakaluvumbilizya amudima.
10 Ndakaimika minyinza yalwizi akulupingila.
11 Eelyo ndakati, ‘Mpaawa mpotigolele,
utaindilili amayuwe aako aali aanguzu ayoomanina waawa!’
12 Kuzwa kukuzyalwa kwako, sena kuli buzuba mbookalaililide
cifumo-fumo akucitya bucedo kuti buzibe nibweelede kuba?
13 “Sena wakalilailide bucedo kuti bumunikile nyika akugwisya babi bali mumo?
14 Bucedo bulatondezya zilundu amakkuti antangalala
mbuli cisani cisimbidwe mabala-mabala.
15 Bapilingene tabayandi kusalala kwasikati,
nkaambo kulabakasya milimo yabo yabulwani.
16 ‘Sena wakalinjide kale mutusensa twalwizi,
naa wakeenda kale atala aalwizi?’
17 Sena wakiibona kale milyango yakucikkalilo cabafu ooko
kuli mudima walo-walo.
18 Sena ulibuzi bupati bwanyika? Kondaambila zyoonse eezi kuti kokonzya.
19 Ino ili kuli nzila iiya nkuukkala mumuni?
Alimwi amudima nkuli nkuukkala
20 kutegwa ukakonzye kuzitola kubusena bwazyo,
naa kuziba nkozikkala?
21 Nookalizyedwe kale ciindi eeco noolizi,
pele lino mazuba aako mace kapati.
22 Sena wakanjila kale muziyobwedo zyacaanda,
naa wakazibona kale ziyobwedo zyacivulamabwe?
23 Eezyo nzyendakayobweda mapenzi, mubuzuba bwankondo.
24 Ino njili nzila iiya kuzwida zuba?
Alwalo luuwo lwakujwe luzwidayi?
25 Nguni wakabamba mitungo yakuwa kwamvula, anzila zyandabo?
26 “Nguni uucita kuti mvula iwe munkanda iitakkalwi muntu?
27 Kuti ikabombye nyika iisampukide,
iitakwe bukkale kuti yalo imene bwizu?
28 ‘Sena mvula ilijisi wisi,
naa nguni wakazyala malosi aamume?’
29 Nguni banyina caanda acivulamabwe?
30 Nguni uutuma mpeyo kwaanda maanzi aalwizi
kuti aangane nta mbuli bbwe?
31 Sena ulakonzya kwaanga bulilima antoomwe,
naa kwaangununa zyaanzyo zyabanamweenda mulongo?
32 Sena ulakonzya kusolweda ntanda muciindi cayo,
naa ulakonzya kweenzya nyenyezi zyamulalabungu?
33 Sena ulizi milawo yabweende bwazintu zyakujulu?
Sena ulizi nguzu zyazyo mbozyeendelezya nyika?
34 Sena ulakonzya kulailila kkumbi
kuti likuwisizye mucobo-cobo wamaanzi?
35 Naa walailila ndabo kuti zilabe
sena zilakonzya kuboola kulinduwe akuti, ‘Ndiswe waano?’
36 Nguni wakabikka busongo mukkumbi,
naa wakapa maanu kuli sikunku?
37 Nguni uuli aabusongo bwakubala makumbi?
Alimwi nguni uukonzya kukununa nongo zyakujulu kuti mvula iwe?
38 Yalo iitesya nyika akuleta ntimba?
39 Sena ulakonzya kumuyandawida cakulya syuumbwa,
nikuba kukkusya bana bakwe nibafwa nzala,
40 nibalede mumena aabo naa nobalede muziyubilo zyabo?
41 Nguni uujanina cikwangala cakulya cakwe,
bana bakwe nibalilila Leza kumwi kabazelengana
akaambo kakubula cakulya?