Jobo 37
1 Nkaambo kazeezi ndakankama, moyo wangu ulayuntaana.
2 Amuswiilile nyoonse, kundindima kwajwi lyakwe,
akukalauka kuzwa kumulomo wakwe.
3 Ulalekela lulabo lwakwe kuti lulabe,
lulabe munsi aajulu lyoonse lulasika muzyooko zyanyika.
4 Lwamana kulaba, jwi lyakwe lilazuma.
Ulazuma ajwi lyakwe pati, alimwi talesyi ndabo naambaula.
5 Leza ulazuma cigambya ajwi lyakwe,
ulacita zintu zipati eezyo nzyetutakonzyi kumvwisya pe.
6 Nkaambo ulalailila caanda ulati, ‘Wida aanyika.’
Ulalailila lunywaanywa amvula kuti, ‘Ziwisye.’
7 Ulaandya maanza aabantu boonse kutegwa bantu
boonse bazibe nguzu zyakwe.
8 Banyama balanjila mumpangala zyabo,
akukkalilila mumena aabo.
9 Kumusanza kulazwa guwo pati, ampeyo kunyika.
10 Kuyoya kwa Leza kulacita caanda,
aalo maanzi alwizi alaangana nta.
11 Makumbi malemu alazula mvula,
makumbi alamwaisya ndabo zyakwe.
12 Leza uleenzya makumbi cakufwambaana
kuti amaninizye zyoonse eezyo nzyaalailila.
13 Leza ulazituma zyoonse eezi anyika,
kuti zibe cisubulo naa cileleko kubantu mbuli mukuyanda kwakwe.
14 Mvwa ceeci, yebo Jobo, tungumana uyeeye milimo ya Leza iigambya.
15 Sena ulizi Leza mbwabikka milazyo yakwe ali nzizyo,
akucitya ndabo kuti zilabe kuzwa kumakumbi aakwe?
16 Sena ulizi makumbi mbwaaelekwa,
ooyu ngomulimo uugambya wa Leza, Siluzibo loonse.
17 Yebo upenga buyo akweendwa nkasaalo
ciindi luuwo luzwa kumusanza noluleta kupya?
18 Sena ulakonzya kumugwasya Leza kuyala julu,
akuliyumya nta mbuli cimboni-mboni calubulo?
19 Twiisye ncotweelede kumwaambila Leza,
tatukonzyi kulyaambilila nkaambo tunyina luzibo.
20 Sena Leza aambilwe kuti mebo njanda kukanana?
Naa ndacita boobo ndanyonyoonwa!
21 Lino bantu tabakonzyi kulangisya zuba,
ciindi nolibala, ciindi luuwo lwamana kwaamwaisya makumbi.
22 Kumweka kwazuba nokulibonya kujulu,
mbobuyoosya bulemu bwa Leza bugambya oobo.
23 Nkaambo kakuti nguzu zya Leza nzipati,
swebo tatukonzyi kuswena kulinguwe.
Uliluleme alimwi ulalomya mukubeteka kwakwe.
24 Aboobo bantu balamuyoowa
pele tabalanganyi aabo baliyeeya kuti mbasongo.”