Jobo 36
1 Eelyo Elihu wakaindilizya akuti,
2 “Koba sicamba, undiswiilile kwaciindi ciniini buyo,
nkaambo ndicijisi majwi aakwaamba mukwiiminina Leza.
3 Ndisyaabupampu, ndilabelesya luzibo lwangu,
kutondezya kuti Leza, mulengi wangu uliluleme.
4 Kolanga, Leza tasampuli muntu naba ni,
taakwe ncatezi.
5 Bantu babi tabaleki kuti kabapona lyoonse pe,
pele bapenzi ulabaiminina.
6 Ulakwabilila baluleme lyoonse, alimwi ulabacita kuti babe baleli abami,
7 ulabasumpula mubulemu, kwalyoonse alyoonse.
8 Pele kuti bantu baangwa munsimbi akucegwa mutooze twamapenzi,
9 mbombuboobu Leza mbwabatondezya zinyonyoono zyabo ambobalisumpula.
10 Ulajalula matwi aabo kuti baswiilile kulaigwa,
akubalailila kuti basanduke kuzwa kucibi.
11 Kuti naa baswiilila Leza akumumanina milimo bayoovuba akutangala mazuba aabo oonse.
12 Pele kuti naa tabamuswiilili,
balanyonyoonwa apanga, balafwa kabatakwe luzibo.
13 Batazi Leza balaba ankoto mumoyo,
tabalilili lugwasyo ciindi Leza nabasubula.
14 Balafwa mubukubusi bwabo, buumi bwabo babumanina muzijazya ncence.
15 Pele ulabavuna bapenzegwa kwiindila mumapenzi aabo,
akubalaya kwiindila mumakatazyo.
16 Alimwi wakakugwisya mumapenzi, akukubikka aabotu,
cakuti taakwe ncobulide. Wakakupa kulya kunji kubotu atebule lyako.
17 Pele lino wasubulwa bweelede.
18 Kocenjela nkaambo ambweni masinkamulomo alakucita
kuti usampaule naa buvubi bukunyonganye.
19 Sena kulila kwako kulakugwasya kuti utanjili mubuusu,
naa ninguzu zyako zyoonse ziyookugwasya?
20 Utalombozyi kuti busiku busike, ciindi bantu nibanyonyoonwa.
21 Cenjela, utaleyi kuya kububi, nkaambo kaceeci wakasunkwa amapenzi.
22 Kolanga, Leza ngu Singuzu ino nguuli mwiiyi uuli mbuli nguwe?
23 Nguni uunga ulamwiisya Leza nzyeelede kucita?
24 Naa nguni wati kulinguwe, ‘Wakalubizya?’
25 Bantu boonse baliibona milimo yakwe,
pele tabakonzyi kwiimvwisisya.
26 Tatukonzyi kumvwisisya bupati bwakwe Leza,
amweelwe wamyaka yakwe taubaliki pe.
27 Ngu Leza uugwisya maanzi kuzwa anyika,
akwaasandula kuti abe mvula.
28 Nguuzumizya kuti makumbi awisye mvula,
alosezye bantu boonse bamunyika.
29 Sena kuli muntu uuzi ceenzya makumbi
amuzumo mbuuzuma mujulu oomo mwakkala Leza?
30 Bona ulalizingulusya andabo zyakwe,
nguuvumba tako lyalwizi.
31 Nkaambo kazeezi ulabeteka bantu,
ulasanina bantu zilyo cakubakutya.
32 Ulavumba maanza aakwe andabo,
akuzilailila kuti zyuume ambaakani.
33 Kuzuma kwazyo kulamuyubununa,
azyalo zivubwa zilaziba kuti ilawa mvula.