Jobo 35
1 Mpawo Elihu wakati,
2 “Sena uyeeya kuti oobu mbobululami? Sena waamba kuti,
‘Ndililuleme kuli Leza?’
3 Mane ulabuzya kuti,
‘Ino nimpindu nzi njendijisi? Ndilaa mpindu nzi mbwendatabisya?’
4 Ndilamwiingula yebo antoomwe abeenzinyoko.
5 Kolanga kujulu, ubone makumbi aali kule anduwe.
6 Kuti naa koli wakabisya, tacimucisi Leza,
alimwi kuti naa walubizya ziindi zinji, ncinzi ncokonzya kucita kulinguwe?
7 Kuti naa koli uliluleme, ncinzi ncomupa?
Naa ncinzi ncatambula kuzwa kulinduwe?
8 Bubi bwako bulapilukila bantu bali mbuli nduwe omwini,
abwalo bululami bwako ndugwasyo kubantu.
9 “Akaambo kaludyaminino lunji bantu balakwiila,
balaita kuti bagwasigwe kuzwa kuli basinguzu.
10 Pele taakwe naba omwe uuti, ‘Uli kuli Leza Mulengi wangu,
uupa nyimbo zyabusicamba ciindi camapenzi mapati,
11 uutupa maanu kwiinda maanu aa banyama abusongo bwiinda bwabayuni.’
12 Balamulilila Leza kuti abagwasye,
pele tabavuwi akaambo kakulisumpula kwabantu aabo batamuyoowi.
13 Ncobeni Leza tamvwi matongoosi aabuyo,
Singuzuzyoonse taalanganyi pe.
14 Lino Jobo uyooswiililwa buti kakuli waamba kuti nsimuboni?
Koumuna nkaambo mulandu wako uli kuli Leza.
15 Lino nkaambo kakuti tatundululi mubukali bwakwe,
nikuba kuyeeyela zibi,
16 yebo, Jobo, ulaamba majwi aabuyo,
ulavuzya majwi aatali aaluzibo pe.”