Jobo 34
1 Mpoonya Elihu wakati,
2 “Amumvwe majwi aangu, nywebo nobasongo,
amunditeelele nywebo nobasiluzibo,
3 nkaambo kutwi kulasola majwi,
mbubonya mbuli mulaka mbuulabila cilyo.
4 Atulisalile eeco ciluzi, tuyeeyesye akati kesu kuti ino cibotu ncicili.
5 Nkaambo Jobo waamba kuti,
‘Mebo nsikwe mulandu, pele Leza nguukaka kundibeteka kabotu.
6 Nikuba kuti ndililuleme Leza undilanga mbuli kuti ndimubeji.
Cilonda cangu tacisilikiki pe, nikuba kuti nsijisi cinyonyoono.’
7 Ino nguni muntu uuli mbuli Jobo,
uucitila Leza masampu mbuli kunywa maanzi?
8 Walo ulayanzana abasimucita zibi, akweenda abantu babi.
9 Nkaambo ulati,
‘Taakwe mpindu njajana muntu nikuba kuti kakondedwe muli Leza.’
10 Nkaako lino amundiswiilile, nywebo nobaalumi bajisi maanu.
Masimpe Leza takonzyi kucita cinyonyoono.
Tacicitiki kuti Singuzuzyoonse alubizye.
11 Nkaambo ulapilusizya muntu mbubonya mbuli milimo yakwe,
alimwi uyoomucitila eeco cimweelede.
12 Cili kasimpe, Leza tabisyi, singuzuzyoonse tabeteki buteelede pe.
13 Nguni wakamupa bweendelezi bwanyika?
Alimwi nguni wakamupa bwami bwaanyika yoonse?
14 Kuti naa Leza wanyanga bantu buumi kuti buye kulinguwe,
15 bantu boonse inga bafwa, alimwi bapilukila kubulongo.
16 Kuti naa komvwisya, koswiilila eeci, komvwa nceamba.
17 Sena muntu ulasulaika bulelo bulomene?
Sena ulamukaka Leza uululeme uulaanguzu?
18 Leza ulabeteka bami, abantu balemenede ciindi nobabisya akucita zyabuyo.
19 Leza talangi ziimo zyabana babami,
talemekezyi bavubi kwiinda bacete,
nkaambo boonse mmulimo wamaanza aakwe.
20 Mukaindi kaniini bantu balafwa,
akati kamasiku balazungaanyizigwa akuzimina,
basinguzu abalo balaganyuka.
21 Nkaambo meso aa Leza alalanga nzila zyamuntu,
aboobo ulabona ntaamo zyakwe zyoonse.
22 Taakwe musinze nuuba mudima uusiya mbi
kwalo basimucita zeezyo zibanyonyoona nkobakonzya kuyubila Leza pe.
23 Taakwe mulawo wakuti Leza abikke ciindi cakubeteka bantu.
24 Ulapwaya basinguzu kaatakwe akubuzya-buzya,
ulabikka bambi mumasena aabo.
25 Mbokunga ulizi milimo yabo,
ulabatingamuna muciindi camasiku, balapwaigwa.
26 Ulabasubula caantangalala akaambo kabubi bwabo,
bantu boonse kabalangilila.
27 Mukuti bakaleya tabacimutobeli,
alimwi bakanyansya nzila zyakwe,
28 cakuti mane kulila kwabacete kwakamusikila,
aboobo wakakumvwa kulila kwabapenzegwa.
29 Naa kaumwide buyo, nguni uukonzya kumutongooka?
naa tapi zileleko zyakwe nguni uunga wakkala kabotu?
30 Taakwe bantu ncobakonzya kucita kuti babi bataleli,
kuti kutaleli ooyo uuyanda kucenga bantu.
31 Sena Jobo kuli nookaambide kuli Leza kuti,
‘Mebo ndakasubuka, nsikooyoobisya limbi?’
32 Akuti, ‘Naa ndakacita cibi, ndaambile! Nsikooyoocicita limbi.’
33 Nkaambo wakaka eezyo nzyacita Leza, sena ulangila
kuti walo acite nzyoyanda? Nkaako yebo uleelede kusala kutali ndime pe. Lino kwaamba eeco ncozi.
34 Bantu bali aamaanu bayoondaambila kuti,
abalo bantu basongo aabo bandimvwa bayooti,
35 ‘Jobo ulaamba cakubula luzibo, majwi aakwe taali aabusongo pe!
36 Nikwali kuti nzyaamba Jobo zyalangisigwa zyoonse,
nikwajanika kuti waambaula mbuli muntu uulubizizye.
37 Kuzinyonyoono zyakwe wayungizya buzangi,
usampaula Leza katumvwide toonse.’”