Jobo 33
1 “Pele lino komvwa kukanana kwangu, yebo Jobo,
koswiililisya majwi aangu oonse.
2 Lino njanda kukanana, alimwi mulaka wangu uyanda kwaambaula.
3 Majwi aangu alalungulula bululami bwamoyo wangu,
nkabela eeco milomo yangu nciizi ilacaamba cakasimpe.
4 Muuya wa Leza nguwakandilenga,
akwalo kuyoya kwa Singuzuzyoonse nkokundipa buumi.
5 Kuti naa kokonzya ndiingule, kolibambila undikazye.
6 Yebo andime tuleelene kumbele lya Leza,
ambebo ndakalengwa kuzwa kubulongo.
7 Aboobo toelede kundiingula pe, nzentaambe tazitikulemene.
8 “Ncobeni wakakanana nkeswiilide, alimwi ndakamvwa kwaamba kwamajwi aako.
9 Waamba kuti, ‘Ndilisalede, nsijisi cinyonyoono,
tamukwe cibi mulindime pe.
10 Langa, Leza nguunditalika, ulandibala mbuli sinkondonyina.
11 Ulaanga maulu aangu, akulangilila nzila zyangu zyoonse.’
12 Yebo Jobo, muli ceeci toluleme pe.
Ndakwaambila boobo. Leza mmupati kwiinda muntu.
13 Ino nkaambo nzi nokazyanya anguwe?
Waamba kuti, ‘Tavuwi matongoosi aangu pe!’
14 Tee Leza ulaambaula munzila zyaandeene-andeene,
muntu katazi kuti wavuwa.
15 Ciindi nibalala bantu mumalo aabo,
mposuntukila muciloto amucilengaano masiku,
16 Leza ulayubununa kulimbabo zintu zyakubacenjezya zibayoosya.
17 Kutegwa anyone muntu kuzwa kuzintu zinyonyoona,
kutegwa amubombye aleke kulisumpula.
18 Kuti afutule buumi bwakwe kuzwa kumulindi walufu,
akuti buumi bwakwe butayi kucikkalilo cabafu.
19 ‘Alimwi muntu ulatundululwa ciindi naciswa mubulo,
kuminwa takumani muzifuwa zyakwe pe.
20 Cakunga cakulya cimusizya kumoyo, tacilyi atulyo tulweela.
21 Awalo mubili wakwe ulakotela,
zifuwa zyakwe zyatakali kubonwa zyazwida aanze.
22 Uyabuswena kucuumbwe,
buumi bwakwe bulaswena kuli baabo basikuleta lufu.’
23 Cimwi ciindi kumusikila mungelo kuzwa akati kabaabo banji,
kuti amuyeezye eezyo nzyayanda Leza.
24 Mukumufwida luse mungelo ulati,
‘Mununune kutegwa atabi nafwa, nkaambo ndamujanina cinunuzyo.’
25 Mubili wakwe kuuba mbuli wakubwana abe aanguzu mbuli zyamukubusi.
26 Muntu ooyo ulakomba kuli Leza, nkabela ulamutambula,
aboobo ulaboola kuli Leza cakukondwa. Ulaambila bantu mbuli Leza mbwaamufutula.
27 Ulaima kumbele lyabantu ulati,
‘Ndakabisya akulubizya cakaluleme,
taakwe nindakabweedezezelwa bweelede.’
28 Wakanununa muuya wangu kuti intayi mucuumbwe
wazumizya kuti buumi bwangu kabucibona mumuni.
29 “Masimpe, Leza nguucita zintu zyoonse eezi kubantu lyoonse,
30 kuti abajole kuzwa kunzila iiya kulufu kutegwa basekelele mumuni wabuumi.
31 Koteelelesya yebo Jobo, ndiswiilila, koumuna nkwaambile.
32 Naa ulaacakwaamba, koamba, ndakwaambila naa uliluleme.
33 Naa unyina cakwaamba, undiswiilile, uumune zi,
nkabela ndakwiisya zyabusongo.”