Jobo 32
Elihu
1 Aboobo baalumi botatwe bakaleka kwiingula Jobo nkaambo walo wakali kulilulamika lwakwe mwini. 2 Pele Elihu mwanaa Balakeli Mubuzi wamukwasyi wa Lamu wakanyema kapati. Wakakalalila Jobo, nkaambo wakali kulilulamika lwakwe kwiinda Leza. 3 Alimwi wakakalalila beenzinyina Jobo botatwe nkaambo tiibakakonzya kumwiingula nikuba kuti bakali kuti Jobo ulizulidwe. 4 Lino Elihu wakalindila kuti akanane kuli Jobo nkaambo beenzinyina bakali bapati kulinguwe. 5 Elihu naakabona kuti baalumi aaba botatwe bakakacilwa kwiingula Jobo, wakanyema kapati. 6 Mpawo Elihu mwanaa Balakeli Mubuzi wakaingula kuti,
“Ime ndili musyoonto, nywebo muli bapati.
Ncenciceeco ncindali kuyoowa kuti ndimwaambile mizeezo yangu.
7 Ndalikuyeeya kuti bapati basaangune kwaamba mbabo nkaambo bakati,
‘Munene ulamusiya kulubilo kumaanu tomusiyi.’
8 Pele muuya uuli mumuntu, nkuyoya kwa Singuzuzyoonse,
ooyo uumucitya kuti amvwisye.
9 Tabuli bupati buyo bupa maanu,
naa kuti bacembeede balikke mbabamvwa ciluleme.
10 Aboobo ndati, ‘Amundiswiilile, ambebo andaambe nceyeeya.’
11 Amulange, mebo ndakalindila majwi aanu,
ndakaswiilila twaambyo twanu twabusongo,
ciindi nimwakacili kuyandaula cakwaamba.
12 Ndakamuswiililisya, lino amulange taakwe naba omwe wazula Jobo,
alimwi taakwe naba omwe akati kanu wakaingula majwi aakwe pe.
13 Amucenjele kuti mutabi nimwaamba kuti, ‘Twajana busongo,’
nkaambo Leza nguukonzya kumukazya kutali muntu pe.
14 Jobo taakwe naakakazyanya andime,
nkaako nsimwiinguli mbomwakamwiingula nywebo.
15 Bakatazigwa tabakonzyi kuvuwa limbi nkaambo babula majwi aakwaamba.
16 Aboobo sena ndilindile buyo nkaambo tabaambauli?
Nkaambo balizingimene, tabakonzyi kuvuwa.
17 Ambebo ndalipa muzeezo wangu, akwaamba ncendiyeeya.
18 Nkaambo mebo ndijisi majwi manji, moyo wangu ulabbubba.
19 Masimpe, mizeezo yangu ili mbuli waini uubila uutajisi mpuuzwida,
mouli munkomo mpya yacikutu campongo wamaanikizigwa, pele nkomo iili aafwiifwi kwaanduka.
20 Ndeelede kwaamba kutegwa ndijane aakuyoyela,
ndeelede kuti ndiingule.
21 Nsikootondezya lusalululo kumuntu nabani,
naa kuupaika nsikuciti pe.
22 Nkaambo nsizi mbokuupaikwa,
kuti naa ndacita oobo inga Mulengi wangu ulandinyonyoona cakufwambaana.