Jobo 31
1 “Ndakacita kale cizuminano ameso aangu,
ino kayi mbubuti mbwenga ndamekela musimbi?
2 Ino calikunooba caabilo nzi Leza wakujulu ncaalikunoondipa,
alwalo lukono lwangu noluli buti kuzwa kuli Singuzuzyoonse?
3 Sena malweza taababooleli bantu bataluleme,
amapenzi sena taakasikili basizinyonyoono?
4 Sena Leza taboni nzila zyangu akubala ntaamo zyangu?
5 Kuti naa ndakeenda mulweeno aalo maulu aangu naa akafwambaanina lucengo,
6 Leza andipime mucipimyo ciluleme.
Abone bulome bwangu.
7 Kuti naa ntaamo zyangu zyakaleya munzila,
naa moyo wangu wakatobela zibi,
akuti naa kuli cibi cili mumaanza aangu,
8 Leza aleke bamwi balye ncindasyanga,
nikuba kuzyula zeezyo nzindakasyanga.
9 Kuti naa moyo wangu wakoongelezegwa amukaintu,
kuti naa ndakajulila mukasimunzima,
10 mukaintu wangu ajikile uumbi akulalikwa anguwe.
11 Nkaambo ooyu nuwali mulandu wacinyonyoono cipati,
muntu neelede kupegwa mulandu walufu.
12 Nkaambo cinyonyoono eeci cili mbuli bbibi lyamulilo uutazimi,
uyoomanizya zyoonse nzejisi.
13 “Kuti naa ndakadyaminina kaambo kamuzike wangu mwaalumi naba mukaintu,
ciindi naakandeetela tongoosi lyakwe,
14 ino inga mebo ndacita buti ciindi Leza nandibeteka?
Aakubuzya-buzya, ino njomwiingula buti?
15 Sena ooyo wakandibumba mwida lyabaama, engwe wakamubumba awalo?
Sena taakwe naakatweelanya?
16 Taakwe nindakamwiima mucete ncaakali kuyanda,
naa kumulekelezya mukamufu kuti abule zyeelede.
17 Taakwe nindakalya cilyo endikke, akutamwaabila musyaala,
18 ooyo kuzwa kubukubusi bwakwe ngwindakalela
mbuli kuti ndime wisi,
walo ngwinda kalela kuzwa naakazyalwa.
19 Nindakabona muntu wakapengede akaambo kakubula zyakusama,
naa muntu mucete kabula cakulivumba,
20 ndakali kumupa zyakusama zyangu ndemwini zyakapangidwe aboya bwambelele.
Eelyo wakali kundilumbaizya amoyo wakwe woonse.
21 Taakwe nindakacenga musyaala
nkaambo ndakalizi kuti kukosola mulandu wakwe nkukwangu.
22 Kuti naa ndakacita oobo kkuko lyangu kaliwa kuzwa aciwezo cangu,
akwalo kuboko kwangu kakuwa kuzwa kukakokola kalyo.
23 Nkaambo ndayoowa malweza aa Leza,
nkaako tiindakakonzya kucita cintu cili boobo,
24 Taakwe nindakasyoma mungolida,
nikuba kulisumpwida ngolida iini-ini njejisi.
25 Taakwe nindakasekelela akaambo kabuvubi bwangu bunji,
nikuba kuti maanza aangu akabungika lubono.
26 Taakwe nindakabotelwa akubala kwazuba,
nikuba kukondwa nindakabona mwezi mubulemu bwawo.
27 Aboobo tiindakoongelezegwa kuti ndimyonte janza lyangu mukukomba nzizyo.
28 Kucita boobo ncinyonyoono ceelede cisubulo cipati,
nkaambo caamba kutasyomeka kuli Leza uusumpukide.
29 “Taakwe nindakakondwa mukunyonyoonwa kwayooyo wakandisulide,
nikuba kulumbaizya muciindi naakasikilwa bubi.
30 Taakwe nindakalekela mulomo wangu kubisya,
nikuba kumusinganya sinkondoma pe.
31 Batwanga bangu balandilumbaizya kuti,
‘Nguni uutakkuti cakulya cakwe?’
32 Taakwe mweenzu wakalekwa kuti aone cakutabambwa,
ndakali kutambula beenzu cakusamauka.
33 Taakwe nindakasisa zinyonyoono zyangu kubantu,
naa kukkala muŋanda nkengumwine,
34 nkaambo kakuyoowa ncibayooamba aabo bandizingulukide,
ancobayeeya babuleya.
35 Akaka, nindali aaundiswiilila!
Mboobu bulembo bwangu Singuzuzyoonse andivuwe!
Akaka, nikwali kuti ndijisi kutamikizigwa kwakalembwa asinkondoma.
36 Ncobeni nindakuyumuna akkuko lyangu,
nindakusama mbuli musini.
37 Nindakamwaambila Leza makani oonse aabweende bwangu,
nindakalitondezya kulinguwe mbubonya mbuli mwanaa mwami.
38 Nsiindakabba nyika eeyi njelima, akunyanga uulaayo.
39 Nsiindakalya buyo micelo yayo,
akulekelezya baabo bakali kulima kuti ibatole nzala.
40 Naa mbwindakacita oobo mamvwa akomene mucilawo camaila,
mubusena bwanzembwe kube nsaku.
Nkaambo nindakatama Leza uuli kujulu.”
Majwi aa Jobo mpaasimpila aawa.