Jobo 21
Jobo
1 Lino Jobo wakaingula kuti,
2 “Amuswiililisye kumajwi aangu,
nokutibe mbuli kuti mwanduumbulizya.
3 Amundizumizye kuti ndaambe, ndamana kukanana inga kamucindinonga.
4 Mebo lwangu, sena nditongookela muntu?
Nkaambo nzi nceelede kukkazika moyo?
5 Amundilange mukankamane, mulijate kumulomo.
6 Ndayeeya zicitika kulindime inga kweendeenda mubili, inga ndabwembwa.
7 Nkaambo nzi babi ncoboongola,
balacembaala kabajisi nguzu?
8 Balazyala bana akuba aabazyukulu, balababona kabakomena.
9 Mikwasyi yabo tiiyoowi, ikkede cakuliiba cisubulo ca Leza tacikabasikili.
10 Bapoho babo balatanta lyoonse,
mpwizi zyabo zilazyala tazisowi.
11 Bana babo balazuza akusobana mbuli tubelele, balazyana cakukondwa.
12 Balauma kantimbwa akooma, balasekelela kulwiimbo lwa kantolilo.
13 Balakkala cakuliiba, balafwa lufu ŋanda.
14 Babi balati kuli Leza, ‘Kozwa kuli ndiswe!
Tatuyandi kuziba nzila zyako.
15 Ino nguni Singuzuzyoonse kuti swebo tumumanine milimo?
Nimpindu nzi njetujana kuti naa twamukomba?’
16 Lusumpuko lwako taluli mumaanza aabo pe.
Nkaako malailile aabasizinyonyoono nsyaatambuli.
17 Munzenge wasizimbi tuuzimwi, alimwi bubi bwakwe tabumubooleli.
Leza tabasubuli basizibi mukunyema kwakwe pe.
18 Nziindi zyongaye nobabbubbula mbuli bwizu,
naa mbuli bungu bwapepulwa akambizi?
19 Mulati, ‘Leza ulasubula bana akaambo kazibi zyabazyali babo.
Peepe amumuleke Leza abasubule basizibi beni, kutegwa balibonene.’
20 Babi balibonene! Bubasikile bukali bwa Singuzuzyoonse.
21 Nkaambo kuti mazuba aamuntu amana,
Sena uciyeeya abaŋanda yakwe?
22 Sena mpali muntu uunga ulaiisya Leza, Leza uubeteka aabo bakujulu?
23 Umwi ulafwa kakupukide kapati, alimwi kaliibide, kakkede kabotu.
24 Mubili wakwe kuuneneede, kasaninwa kabotu.
25 Umwi ulafwa katyompedwe, katanalabide bubotu bwabuumi pe.
26 Boonse bobilo, aaba baloona mubulongo, kabavumbidwe amulanzyi.
27 Masimpe, ndizi ncomuyeeya, ambomuyanda kundibisizya.
28 Mwaamba kuti, ‘Ili kuli ŋanda yamuntu mupati,
uulya wakali kucita zibi?’
29 Sena tamubuzyi beenda mazila?
Sena tamwaazumini makani aabo?
30 Aakuti mubuzuba bwamapenzi, uupilingene takaaboni
mapenzi aayo, ulafutulwa mubuzuba bwabukali?
31 Nguni uunga ulamupa mulandu mumpelenge?
Naa uunga ulamusubula akaambo kazeezyo nzyaakacita?
32 Pele natembaizigwa kutolwa kucuumbwe, banji balalindila.
33 Uloona muluumuno mubulongo. Banji bakali kumutobela,
abaabo bamusolwedele tababaliki pe.
34 Ino kayi mbubuti mbomunga mulanduumuzya amajwi aabuyo?
Taakwe ancomwaamba pele kubeja buyo.”