Jobo 15
Kukazyanya kwabili a Jobo
1 Mpoonya Elifazi Mutemani wakavuwa wakati,
2 “Mwati muntu musongo ulakonzya kwaamba boobu?
3 Sena muntu musongo ulavuwa majwi aabuyo mbuli luuwo?
Mwati ulakonzya kukazya amajwi abuyo, ulakonzya kwaambaula majwi aanyina mpindu?
4 Pele yebo uti bantu batali kuyoowi Leza,
kuti baleke kumukomba.
5 Bubi bwako bwalibonya mukwaambaula kwako
uyanda kulilulamika akucenjela kwamulaka wako.
6 Majwi aako omwini ngaakuzula, teensi ndime pe,
kukanana kwako nkokukubejelezya.
7 “Sena nduwe muntu mutaanzi kuzyalwa?
Sena wakalengwa kaatana lengwa malundu?
8 Sena wakaswiilila kulailila kwa Leza?
Uli sibusongo boonse na?
9 Ino yebo uzi nzi swebo ncotutazi?
Ino yebo wamvwisya nzi swebo ncotwatamvwisisisya?
10 Akati kesu nkobali basimvwi abacembeede,
bajisi myaka minji kwiinda uso.
11 Sena kuumuzya kwa Leza kwakuceela,
naa majwi ngaamba mulubomba?
12 Nkaambo nzi ncoociswa moyo, ino ncinzi ncozwisyila meso?
13 Sena uti unyemene Leza, nokanana majwi aaya?
14 Muntu ninzi kuti akonzye kulondoka?
Ooyo uuzyalwa kumukaintu ninzi kuti akonzye kululama?
15 Langa, Leza tasyomi batumwa bakwe basalala,
nibaba bakujulu tabasalali kulinguwe.
16 Ino mbuti muntu uusesemya uusofweede,
kulinguwe kubisya kuli mbuli kunywa maanzi!
17 Ndiswiilila nkwaambile, nkupandulwide eeco ncindakabona.
18 Ncibakalungulula basongo, basikale babo ncibatakasisa.
19 Munyika yabo kwakanyina bazwamasi,
kwakanyina muntu uukonzya kubalubya.
20 Muntu mubi ulapenga mubuumi bwakwe boonse,
alimwi myaka yayooyo uudyaminina bantu ilafwiinsigwa.
21 Lyoonse ulamvwa ziyoosya.
Sikunyonyoona uyoomusikila nayeeya kuti uli muluumuno.
22 Tasyomi kuti ulakonzya kuzwa mumudima walufu,
kayi uyoofwa buyo apanga.
23 Ulazunga kuya buyandaula cakulya mbuli basikube,
Nkaambo ulizi kuti buzuba bwakwe bwamudima buli aafwiifwi.
24 Buusu amakatazyo zilamuyoosya,
zilamukonga muntu mubi mbuli mwami uulibambilide nkondo.
25 Nkaambo wakali kuyanda kusoka Leza,
akulisumpula kuli Singuzuzyoonse.
26 Kamuvuumukila, Leza, cakulikankaizya antobo njumu.
27 Ulineneede nkaambo wakali ngusyaandyaa bantu,
akuneneesya mukuvuba kwakwe.
28 Nguwakali kusaala minzi akukkala mumaanda,
maanda ngobakasiya bantu bakatandwa, aalo ayooba matongo buyo.
29 Nikuba boobo tacinooli muvubi pe,
lubono talukookkala pe, niiba myuunda yakwe tiikamupi kulya.
30 Takooyoozwa mumudima, uyooba mbuli cisamu cakapululwa amulilo.
uyoobbubbulwa aluuwo luzwa kuli Leza.
31 Teelede kulicenga kuti kasyoma zyabuyo, ulalyeena,
nkaambo bubi buyooba ncecakuvola cakwe.
32 Uyoovola ciindi cakwe kacitanasika,
awalo mutabi wakwe uyooyuma nta.
33 Uyooba mbuli musaansa uukulumbula micelo yawo iitanabizwa,
mbuli muoliva uukulumbula amaoliva aatanasima.
34 Nkaambo batasyomi Leza tabakazyali bana.
Alimwi mulilo ulasyukuta maanda aabasikuyanda masinka milomo.
35 Aaba mbabayanda zyabuzangi akucita zibi,
ziindi zyoonse bayeeya buyo zyakucenga.”