Jobo 13
1 “Meso aangu alibonena eezi zyoonse,
aalo matwi aangu aswiilila akuzimvwa eezi.
2 Eezyo nzyomuzi ambebo ndizizi nywebo tamundiindi pe.
3 Pele njanda kukanana kuli Singuzuzyoonse,
njanda kuti tukazyanye a Leza.
4 Nywebo musola kubotezya makani aakubeja kwanu, muli basilisi babuyo.
5 Nicabota nimwaumuna buyo, nimwalibonya mbuli kuti muli basongo!
6 Lino amuswiilile kaambo kangu mbokabede, muteelele nceamba.
7 Sena mulaambilila Leza cakubeja, akumwaambilila calweeno?
8 Sena mulatondezya lusalululo kulinguwe?
Sena mukombelezezya Leza mulandu?
9 Sena kuyooba kabotu ciindi aakumwiingula,
naa mulakonzya kumucenga mbuli muntu mbwaenwa?
10 Ncobeni walo uyoomutapatila,
kuti naa kamubakomanisya bantu mukusisikizya.
11 Sena bulemu bwakwe tabukamuyoosyi,
abwalo bukandu, sena tabukamusikili akaambo kanguwe.
12 Tusimpi twanu ntwabuyo mbubonya mbuli twe,
nkazyanyo zyanu zili mbuli bulongo.
13 “Amuumune buyo ndaambe, kufumbwa citibe acibe.
14 Njoolibikka kumulomo wasyuumbwa, njoobikka buumi bwangu muntenda.
15 Amubone uyoondijaya nikuba boobo ndiyoolyaambilila
kaambo kangu kulinguwe.
16 Oolu luyooba ndolufutuko lwangu,
nkaambo mubi takooyooboola kumbele kuli Leza.
17 Amuswiililisye kumajwi aangu, amucimvwe ncendaamba.
18 Amubone ndilibambilide mulandu wangu,
ndilizi kuti njoozwidilila.
19 Ino nguni uukonzya kukazyanya andime,
aboobo ndileelede kuti nduumune ndifwe.
20 Undicitile buyo zintu zyobilo ndendilyo nentakoolisisa kubusyu bwako.
21 Leka kundidyaminina ajanza lyako.
Alimwi utandiyoosyi pe.
22 Eelyo undiite nkabela ndilaingula, naa nkanane, wiingule.
23 Ino nzingaye zibi zyangu azinyonyoono zyangu?
Ndizibye mulandu acibi cangu.
24 Nkaambo nzi ncolisisa, akundilanga mbuli kuti ndisinkondonyoko?
25 Sena uyanda kundipenzya akunditandaanya,
mebo neeli mbuli tu lipepaulwa aluuwo?
26 Mpaawa undiletela milandu mipati,
mane azibi nzindakacita kubwana.
27 Ulangisisya nzila zyangu, cakuti ndabula ambweenda.
28 Muntu ulabozoka mbuli cintu cakabola, mbuli cibaki cakaligwa amapempya.