Jemusi 5

Ucenjezya bavubide

¹ Amuswiilile lino nobavubi, amulile akoomoka nkaambo kamapenzi aatimusikile. ² Buvubi bwanu bwabola, zyakusama zyanu zyaligwa mapempya. ³ Ngolida ansiliva zyanu zyaba aankalaya, nkabela nkalaya eeyo buyooba bukamboni bwakumuzula buyoonyonyoona mibili yanu mbuli mulilo. Mwalundika lubono mumazuba aano aamamanino. ⁴ Amulange, tiimwabbadela aabo bamutebwida. Mwabanyanzya calucengo. Amumvwe matongoosi aabo, alo amvwigwa ku Mwami Leza Mutalabala. ⁵ Mwalibukkede ansi aano. Mwalinenesya mukulibambilila buzuba bwakujaigwa. ⁶ Mwapa mulandu akujaya baluleme batakamukazya pe.

Kukkazika moyo akukomba

⁷ Bakwesu, amukkazike myoyo mane kusikila Mwami akaboole. Amubone, mulimi mbwalindila micelo mibotu mane iboneke mumuunda wakwe. Ulakkazika moyo mane itange mvula alimwi ayabili iwe. ⁸ Anywebo amukkazike myoyo, muyume, nkaambo Mwami uli aafwiifwi kuboola.

⁹ Nobakwesu, mutanoobejelani, kutegwa mutabetekwi a Leza. Amubone mubetesi uliimvwi aamulyango. ¹⁰ Nobakwesu, amubone citondezyo cabasinsimi bakakambauka muzina lya Mwami Leza. Nikuba kuti bakapenzegwa pele bakakkazika myoyo. ¹¹ Amubone, tulaamba kuti, “Balilelekedwe aabo bakakatila.” Mwakamvwa zyakukakatila kwa Jobo, alimwi mulizi eezyo zyakamucitila Mwami kumamanino, nkaambo ngusilweengelelo ngusilubomba.

¹² Pele kwiinda zyoonse, bakwesu, mutanookonki pe. Mutakonki nikuba kuti, “Kujulu buya!” nikuba kuti, “Ansi buya!” nikuba muli cimwi. Pele mukuzumina kamuti, “Iiyi,” mukukaka kamuti, “Peepe,” kuti mutajaninwi mulandu.

¹³ Naa umwi wanu uli mumapenzi, akombe. Naa umwi wanu ulikondedwe aimbe nyimbo zyakutangala. ¹⁴ Naa umwi wanu waciswa, aite bapati bambungano kuti bamukombele, bamunanike mafuta muzina lya Mwami. ¹⁵ Naa bakomba calusyomo mulwazi ulapona. Mwami ulamubusya, nkabela kufumbwa zibi nzyaakacita zilalekelelwa. ¹⁶ Amwaambilane zibi zyanu alimwi amukombelane, kuti muponyezegwe. Kukomba kwamuntu uululeme kulaanguzu mpati. ¹⁷ Elija wakali muntu uulya maila mbubonya mbuli ndiswe. Wakakomba kuti mvula itawi, nkabela tiiyakawa kwamyaka yotatwe amyezi iili cisambomwe. ¹⁸ Naakamana wakakomba lwabili, eelyo mvula yakawa, ayalo nyika yakazyala micelo yayo.

¹⁹ Nobakwesu, naa umwi wanu wasweeka akusiya zyabwini, kwamana umwi wamuboozya, ²⁰ amuzibe kuti uuboozya sizibi kuzwa munzila yakwe iisweekede, uyoofutula muuya wayooyo kulufu, alimwi azibi zyakwe zinji-zinji ziyoolekelelwa.