Jemusi 4

Zyakulibombya kuli Leza

¹ Ino kuzwangana akupampana akati kanu kuzwa kuli? Sena tazizwi kuzisuzi zyabuntunsi zilwana mulindinywe? ² Mulayandisya zintu pele tamuzijani pe, nkaako mulajaya. Mulanyonokela, pele tamukonzyi kuzijana pe, nkaako mulalwana akupampana. Tamujani zintu, nkaambo tamukumbili kuli Leza. ³ Nikuba kuti mulakumbila, tamupegwi nkaambo mulaimpya mukulomba. Nzyomukumbila muzimwaila mukucita ziyanda zisusi zyanu. ⁴ Nywebo nobantu batasyomeki! Sena tamuzi kuti kuyanda zyabuntunsi mbusinkondonyina Leza? Nkaambo kaako ooyo uuyandisisya zyabuntunsi ngusinkondonyina a Leza. ⁵ Ambweni muyeeya kuti Malembe aamba zyabuyo naati, “Muuya uuli mulindiswe ulatuyandisisya kapati.” ⁶ Pele ulatubeda aaluse lunji kapati, ncenciceeco Malembe ncaati, “Leza ulabakaka basikulisumpula, pele ubabeda aaluse aabo balibombya.” ⁷ Lino amulibombye kuli Leza. Amumukazye Saatani, ndendilyo nayoomutija. ⁸ Amuswene kuli Leza, eelyo awalo ulaswena kulindinywe. Amuleke zibi nywebo nobasizinyonyoono. Amusalazye myoyo yanu, nywebo nobasimyoyo yobilo. ⁹ Amoomoke, muungumane, akulila. Kuseka kwanu kube kulila, akwalo kukondwa kwanu kube kuusa. ¹⁰ Amulibombye ku Mwami, ndendilyo nayoomusumpula.

Batabetekani

¹¹ Nobakwesu, mutanoovwiyani pe. Nkaambo ooyo uuvwiya naa kubeteka mweenzinyina ulabisya akubeteka Mulawo wa Leza. Pele kuti naa wabeteka Mulawo, totobeli Mulawo pe, pele uli mubetesi wawo. ¹² Leza alikke nguupa Mulawo alimwi nguubeteka, alimwi nguukonzya kufutula akunyonyoona. Ino nduweni yebo oobeteka mweenzinyoko?

Batalikankaizyi

¹³ Akaka nywebo nomwaamba kuti, “Sunu naa juunza tuzooinka kumunzi uuli boobu, tukakkale ooko mwaka woonse, tukasambale, tukajane mpindu.” ¹⁴ Pele tamuzi zyajuunza pe. Ino buumi bwanu ninzi? Nkaambo nywebo muli mbuli sikunku uulibonya mukaindi kaniini buyo, amana ulazimaana. ¹⁵ Kapati mweelede kwaamba kuti, “Naa Mwami wayanda, twanoocipona, tuzoocita boobuya aboobuya.” ¹⁶ Pele lino mulalisumpula akulisyoma. Coonse eeci ncibi. ¹⁷ Lino kufumbwa ooyo uuzi nzyeelede kucita, kwamana taziciti, wabisya.