Jemusi 2

Ubacenjezya kuti batanoosalululani

¹ Nobakwesu, mukuti mulasyoma mu Mwami wesu Jesu Kilisito wabulemu, mutasalululani. ² Atwaambe, muntu umwi wanjila momubungene kasamide nweenwe yangolida azisani zyeebeka, kwamana kwanjila muntu mucete uusamide muzazawu. ³ Lino mwalemeka yooyo uusamide kabotu akuti, “Amukkalile waawa aabotu!” pele kumucete mwaamba kuti, “Yebo, ima aalya,” naa, “Kkala aawa mpentandabalide.” ⁴ Tee mwacita boobo mwasalululana akutalika kubeteka amizeezo mibi?

⁵ Amuswiilile, nobakwesu bayandwa. Sena Leza taakasala aabo bacete munyika kuti bakabe bavubi mulusyomo akuba basikukona bwami mbwaakasyomezya kuli baabo bamuyanda? ⁶ Pele nywebo mwamusampaula muntu mucete. Tee kayi bavubide mbabamudyaminina akumutola munkuta? ⁷ Tee mbambabonya basampaula zina lilemekwa lya Kilisito eelyo ndemwiitwa?

⁸ Kuti naa ncobeni mwatobela mulawo wa Mwami uulembedwe mu Malembe kuti, “Yanda mweenzinyoko mbuli mboliyanda omwini,” mulacita kabotu. ⁹ Pele kuti kamusalululana mwabisya nkaambo mwazulwa amulawo. ¹⁰ Kufumbwa uubamba milawo yoonse, amana watyola omwe buyo, ulijisi mulandu wakutyola yoonse. ¹¹ Nkaambo Leza waamba kuti, “Utaciti bumambi,” ngonguwenya uuti, “Utajayi.” Kuti naa tociti bumambi, pele kojaya, waba sikutyola mulawo. ¹² Amwaambe akucita lyoonse mbuli mbubeelede bantu bayoobetekwa amulawo walwaangunuko. ¹³ Nkaambo ooyo uubeteka kanyina lweengelelo, awalo Leza uyoomubeteka cakutamweengelela. Pele ooyo weengelela teelede kuyoowa lubeta lwa Leza.

Zyalusyomo amilimo yalo

¹⁴ Ino cigwasya nzi kuti muntu kati ulijisi lusyomo, pele kakunyina ancacita andulo? Sena lusyomo lwakwe lulakonzya kumufutula? ¹⁵ Atwaambe, mukwesu naa mucizi uusyoma wabula zyakusama azilyo, ¹⁶ kwamana umwi wanu wati, “Koya muluumuno, ujane zyakulivumba azilyo,” kali taamupa zintu zyeelede zyamubili, ino cigwasya nzi? ¹⁷ Mbubonya oobo alwalo lusyomo lutajisi milimo lulifwide.

¹⁸ Ambweni inga umwi ulati, “Yebo ulijisi lusyomo, mebo ndijisi milimo mibotu.” Ime inga ndati, “Nditondezye lusyomo lwako lutajisi milimo mibotu, ambebo amilimo yangu ndilakutondezya lusyomo ndwejisi.” ¹⁹ Nywebo mulazumina kuti Leza ngumwi buyo, ncibotu. Ayalo myuuya mibi ilazumina oobo akukankama.

²⁰ Sena yebo omuntu mufuba-fuba ulayanda kutondezegwa kuti lusyomo lutajisi milimo ndwabuyo? ²¹ Tee kayi Abulahamu taata wakalulamikwa akaambo kamilimo ciindi naakatuuzya mwanaakwe Izaka acipaililo? ²² Mwabona kuti lusyomo amilimo zyakacitikila antoomwe. Kwiindila mumilimo lusyomo lwakwe lwakazuzikizika. ²³ Nkabela zyakacitika zyakaamba Malembe kuti, “Abulahamu wakasyoma Leza, nkabela wakaambwa kuti mululami.” Nkaako Leza wakamwiita kuti mweenzinyina. ²⁴ Mwabona kuti zicita muntu nzezimululamika kutali buyo lusyomo lulikke.

²⁵ Aboobo munzila njiyonya buyo awalo Lahabu mwaamu wakalulamikwa nkaambo kamilimo ciindi naakatambula basikutwela akubainzya nzila iimbi. ²⁶ Nkaambo mbubonya mbuli mubili uunyina muuya mbuufwide, alwalo lusyomo lunyina milimo lulifwide.