Jelemiya 9
1 Nicabota mutwe wangu nuwali kasensa kamaanzi, ameso aangu naali buntolo!
Nendilila sikati amasiku akaambo kabantu bokwesu bajaidwe.
2 Nicabota nindajisi busena bwabasinyendo munkanda bwakoonena,
nindasiya bantu bokwesu kanduunka kulaale, kuzwa kulimbabo nkaambo boonse mbaasimamambe, ninkamu yabantu batasyomeki.
3 Balabambilila milaka yabo mbuli muntu mbwalibambilila abuta
kuti bagwisye zyakubeja,
takuli kuti balazunda akaambo kakwaamba zyabwini pe.
Balacita zinyonyoono ziindene-indene, tabandizi pe. Mbwaamba Mwami Leza.
4 Amubacenjelele beenzinyoko, mutanoosyomi babunyoko.
Nkaako munyoko uuli woonse mucengi, mweenzinyoko uuli woonse ulabejelezya.
5 Mulongwe ucenga mulongwe wakwe, kunyina uukanana zyabwini.
Bakaiisya milaka yabo kwaamba zyakubeja, balalikatazya mukucita zinyonyoono.
6 Mukkala akati kalucengo, mulucengo lwanu mulakaka kundiziba. Mbwaamba Mwami Leza.
7 Nkaako mboobu mbwaamba Mwami Leza Singuzuzyoonse, “Bona njoobasefwa-sefwa akubasunka,
iiyi, ino ncinzi cimbi ncendikonzya kucita akaambo kazinyonyoono zyabantu bangu?
8 Milaka yabo mivwi mibi, ilakanana zyakucenga. Umwi aumwi ulaambaula
angobabambene limwi kabotu-kabotu, pele mumoyo wakwe ulamuteya.
9 Sena intabasubuli akaambo kaceeci? Mbwaamba Mwami Leza.
Sena intaupilusizyi bubi musyobo uuli mbuli bayooyu?”
10 Njoocwema akulilila zilundu, njooumbaalila macelelo aamunkanda.
Akaba matongo taakwe wiinda mumo kulila kwaŋombe takucimvwigwi pe.
Bayuni bamuluuwo bauluka, abalo banyama tabaciwo.
11 Mwami Leza ulati, “Njoocita kuti munzi wa Jelusalemu
ube tongo lyazitantaala, kakukkala bamwaaba, njoonyonyoona minzi yacisi ca Juda,
cakuti taakwe muntu uuyookonzya kukkala oomo.”
12 Nguni muntu musongo ooyo uukonzya kumvwa ceeci? Nguni ooyo wakaiisigwa a Mwami Leza alimwi uukonzya kucipandulula eeci? Ino nkaambo nzi nyika noyanyonyoonwa akuba tongo mbuli nkanda eeyo muntu njatakonzyi kukosola?
13 Mwami Leza wakati, “Nkaambo kakuti bakasiya mulawo wangu, ooyo ngondakababikkila, taakwe nibakandiswiilila nikuba kutobela mulawo wangu pe. 14 Pele bakatobela busicinguni bwamyoyo yabo, bakatobela ba Baali, mbubonya mbuli bamawisi mbubakabaiisya.” 15 Nkaako, mboobu mbwaamba Mwami Leza Singuzuzyoonse, Leza wa Isilayeli ulati, “Bona njoocita bantu kuti bakalye zilyo zilula akunywa maanzi aancefu. 16 Njoobamwaisizya akati kabamasi aabo basikale babo nobaba lwabo beni mbobatazi pe, njoobatandaanya apanga kusikila nkabanyonyoone.”
Bantu bamu Jelusalemu mbubakalilila kugwasigwa
17 Mboobu mbwaamba Mwami Leza Singuzuzyoonse ulati, “Lino amuyeeye!
Amwiite bamakaintu balila baboole, aabo bacibwene kapati kweema.”
18 Bantu bakati, “Ababoole cakufwambaana, bazootulilile
kusikila meso eesu afwasuke misozi, misozi muzikoye zyesu.
19 “Kwamvwigwa kulila kuzwa ku Ziyoni bati,
‘Twanyonyoonwa! Akomena mause eesu!
Tweelede kusiya nyika yesu, nkaambo maanda eesu anyonyoonwa.’”
20 Lino nobakaintu amumvwe majwi aa Mwami Leza, amuswiilile majwi aayo ngaamba.
Amuiisye bana banu mbokulilwa, amuiisyanye mbokweemwa.
21 Lufu lwatunjilila kwiindila mumpulungwido zyamaanda eesu,
lwanjila munkwakwa zyesu, lwanyonyoona bana mumigwagwa, abakubusi kuzwa muzisambalilo.
22 Baambile kuti, “Mboobu mbwaamba Mwami Leza ulati, ‘Mitumba yabantu
iyooalabana mbuli makwisyilili musokwe, mbuli maila aajwidwe musule lyamutebuzi, aanyina waabungika.’”
23 Mboobu mbwaamba Mwami Leza ulati, “Muntu musongo atabi nalikankaizya abusongo bwakwe,
naa muntu sintanze kuba nalikankaizya akaambo kanguzu zyakwe,
naba muvubi kuba nalikankaizya akaambo kabuvubi bwakwe.
24 Pele ooyo uulikankaizya alikankaizizye ceeci,
cakuti ulamvwa alimwi ulindizi kuti mebo ndime Mwami Leza
ooyo uufwida luzyalo, uuluzi, uululeme aano anyika, nkaambo zintu eezi ndazikkomanina, mbwaamba Mwami Leza.
25 “Mazuba ayoosika. Mbwaamba Mwami Leza, nenjoosubula baabo bapalwidwe pele kutali mumoyo, 26 mbuli baku Ijipiti, baku Juda, baku Edomu, baku Amoni, baku Mowabu abaabo bali muzisi zili kulaale. Nkaambo misyobo yoonse eeyi tiilipede kulindime pe, nobaba Baisilayeli boonse tabalipede.”