Jelemiya 8
1 Kuciindi eeco, mbwaamba Mwami Leza, mafuwa aabamami abalupati-pati bamu Juda, mafuwa aabapaizi abasinsimi, amafuwa aabantu bamu Jelusalemu ayoogwisigwa muzyuumbwe zyabo. 2 Ayoobikkwa antangalala akabalwe zuba, mwezi, anyenyezi zyakujulu, eezyo nzibakali kuyandisya akuzimanina milimo, eezyo nzibakali kutobela, kubuzya-buzya akukomba. Tabakayobololwi nikuba kuzikkwa, pele bayooba mbuli makwisyilili atala aanyika. 3 Kuli koonse nkwenjoobatandila, boonse basyeede bamusyobo mubi ooyu bayoolombozya lufu kwiinda buumi. Mbwaamba Mwami Leza Singuzuzyoonse.
Cinyonyoono acisubulo
4 Baambile kuti, “Mboobu mbwaamba Mwami Leza ulati, ‘Kuti muntu wawa sena tabuki? Kuti na waleya sena tapiluki? 5 Ino nkaambo nzi bantu aaba nobaleede? Nkaambo nzi bamu Jelusalemu lyoonse nobagamide kumbi? Balazumanana muli zyalucengo, balakaka kupiluluka.’ 6 Ndaswiilila cakuteya matwi, pele tabaambi ciluleme pe. Taakwe weempa kububi bwakwe, akulibuzya kuti, ‘Ino ncinzi ncindacita?’ Umwi aumwi utobela buyo nzila yakwe, mbuli bbiza lizuza munkondo. 7 Matongola aamujulu alizi ziindi zyawo, nziba, tumembya, basikolyo balizi ziindi zyabo zyakulonga. Pele bantu bangu tabazi eezyo Mwami Leza nzyabayanzya pe.” 8 Ino mbubuti mbomunga mwati, “Tuli basongo, nkaambo tujisi mulawo wa Mwami Leza, kakuli balembi azilembyo zyabo balemba zyakubeja? 9 Basongo bayoousigwa nsoni, bayooyoowa akucengwa. Mukuti bakaka majwi aa Mwami Leza. Ino mbusongo nzi oobo mbobajisi?” 10 Nkaako bamakaintu babo njoobapa kubaalumi bambi, myuunda yabo njooipa kubeenzu. Kuzwa kubantu buyo kuyoosika kubalemenede, boonse mbaasyaacivulemwangu, basinsimi abapaizi boonse bacita zyalucengo. 11 Basilika zilonda zyabantu bangu mbuli kuti tazili zipati pe. Balati, “Kuli luumuno, kuli luumuno,” kakuli kunyina luumuno pe. 12 Mwati bantu aaba balausa buya azisesemya nzyobacita? Peepe, tabausi aasyoonto, kunyina nobalisenda pe. Nkaako bayoowida akati kabawide, bayoonyonyooka baakusubulwa. Mbwaamba Mwami Leza.
13 Njoobanyanga butebuzi bwabo. Mbwaamba Mwami Leza. Njoobanyanga nsaansa mumisaansa. Kunoonyina nkuyu mumikuyu, matu aayo ayooyuma. Eezyo nzindakabapa bayoonyangwa.
14 Ino tukkalide nzi aano? Atubungane! Atutijile kuminzi iikwabililidwe tukalobele nkuko! Mukuti Mwami Leza wesu ukanzide kuti tulobe, watunywisya maanzi aancefu, nkaambo twakamubisizya. 15 Twakali kulangila luumuno, pele taakwe zibotu nzitwakabona pe, twakali kulangila kuponyezegwa, pele kwakali buyo ziyoosya. 16 Kumbululuzya kwamabbiza aabasinkondoma kulamvwigwa aku Dani, mabbiza aabo naalila nyika yoonse ilatenkaana. Baboolela kuzoonyonyoona nyika azyoonse zili mulinjiyo, munzi aboonse bali mulinguwo.
17 Amubone njootumina nzoka nkali akati kanu, bacipile batasyaanizigwi, nkabela ziyoomuluma. Mbwaamba Mwami Leza.
Jelemiya mbwaakausila bantu bokwabo
18 Yebo oonduumbulizya mubuumba, moyo wangu wawizuka.
19 Swiilila kulila kwabantu bangu kuzwa kunyika iili kulaale.
Sena Mwami Leza tamo mu Ziyoni? Sena Mwami tacimo oomo?
Leza ulati, “Nkaambo nzi ncimwandinyemya azikozyanyo zyanu, mituni yabamasi?
20 Kutebula kwamana, ncilimo, pele taakwe uutuvuna.”
21 Mbokunga bantu bangu bapwaigwa, ambebo ndapwaigwa. Ndalila ndiyoowede.
22 Sena kunyina bbona mu Giliyadi? Sena kunyina musilisi kuya?
Ino nkaambo nzi bantu bangu nobatasilikwi zilonda zyabo?