Jelemiya 7
Jelemiya mbwaakakambauka muŋanda ya Leza
1 Ngaaya majwi aakasika kuli Jelemiya kuzwa ku Mwami Leza. 2 Leza wakati, “Imina amulyango waŋanda ya Mwami Leza, kocili waawo waambilizye kuti, Amuswiilile majwi aa Mwami Leza, nywebo nyoonse nobantu bamu Juda nomwainda mumilyango eeyi kuti muzookombe Mwami Leza.”
3 Mboobu mbwaamba Mwami Leza Singuzuzyoonse, Leza wa Isilayeli ulati, “Amusiye nzila zyanu amicito yanu, ndendilyo neyoomulekela kuti mukkale mubusena oobu.” 4 Mutasyomi majwi aakubeja aakuti, “Eeyi neŋanda ya Mwami Leza, neŋanda ya Mwami Leza, neŋanda ya Mwami Leza!”
5 Kuti naa musiye nzila zyanu ncobeni, amicito yanu, akucitila bweelede umwi aumwi, 6 kuti naa kamutadyaminini bazwakule, bamusyaala, nobaba bamukabafu, akutatila bulowa bwabatakwe milandu mubusena oobu, alimwi kuti naa kamutatobeli baleza bambi akuliletela mapenzi, 7 eelyo njoomulekela kuti mukakkale mubusena oobu, munyika eeyo njindakapa kuli basikale banu kwalyoonse alyoonse.
8 Pele ono mubone nywebo musyoma mumajwi aabubeji, aabuyo. 9 Sena muyanda kuti kamubba, kamujaya, kucita bumambe, mulakonka cakubeja, kuumpa tununkilizyo kuli Baali akukomba baleza aabo mbomutazi, 10 kwamana muboole muzooime muno muŋanda iitwa azina lyangu kamuti, “Tuli kabotu.” Muli kabotu akaambo kakucita zintu zyoonse eezi zisesemya na? 11 Sena ŋanda eeyi iitwa zina lyangu yamubeda ciyubilo cababbi? Pele mebo ndilangilide. Mbwaamba Mwami Leza. 12 Kamuya lino kubusena buli ku Syilo ooko nkundakasaanguna kukombelwa mukabone ncindakacita ooko akaambo kabubi bwabantu bangu Baisilayeli. 13 Kamucili mukucita zintu zyoonse eezi, ndakamwiita kanji-kanji. Mbwaamba Mwami Leza. Ndakali kukanana kulindinywe lyoonse, pele tiimwakaswiilila, ndakamwiita pele tiimwakavuwa pe. 14 Nkaako eeco ncindakacita ku Syilo njoocicita akuŋanda eeyi iitwa azina lyangu, ŋanda ya Leza eeyo njomusyoma, busena mbundakamupa nywebo abasikale banu. 15 Njoomutanda kuzwa kulindime mbuli mbundakacita babunyoko ba Efulemu.
Kutaswiilila kwabantu
16 Lino yebo Jelemiya utatobeli bantu aaba, nikuba kubalilila, nikuba kubalombelela nikuba kubakombelezezya, nkaambo nsikookuswiilila pe. 17 Sena tozibwene nzyobacita muminzi yacisi ca Juda amumigwagwa yamu Jelusalemu! 18 Bana batebba nkuni, bamawisi bayasya mulilo, bamakaintu bakandila busu akupanga zinkwa zinona kupangila mwami mukaintu wajulu. Batila zipaizyo zyazyakunywa kuli baleza bambi kuti bandikalazye. 19 Balati, ini inga wacita buti? Sena bakalazya ndime? Mbwaamba Mwami Leza. Sena tabalicisi lwabo beni akulyuusya nsoni?
20 Nkaako mboobu mbwaamba Mwami Leza ulati, “Kunyema abukali bwangu bupati ndabutila abusena oobu abantu, banyama, masamu, aamicelo yamunyika buyootenta akutazima pe.”
21 Mboobu mbwaamba Mwami Leza Singuzuzyoonse ulati, “Kamucita buyo, amuyungizye zipaizyo zyanu zyakutenta kuzipaizyo zimwi eezyo nzyomupa, mwamana mwiilye nyama eeyo nobeni! 22 Nkaambo nindakagwisya basikale banu mu Ijipiti akukanana kulimbabo, tiindakabapa buyo malailile aazipaizyo zyakutenta azituuzyo pe, 23 pele ndakabapa amulawo ooyu wakuti, ‘Kamundiswiilila, eelyo njooba Leza wanu anywebo muyooba bantu bangu. Amweende munzila zyoonse nzindakamulailila kutegwa zintu zikamweendele kabotu.’ 24 Pele tiibakaswiilila nikuba kuteelela pe, bakatobela miyeeyo yabusicinguni bwamyoyo yabo mibi. Bakapilukila musule muciindi cakuti baye kumbele. 25 Kuzwa ciindi basikale banu nibakazwa mu Ijipiti kusikila sunu, buzuba abuzuba kwaziindi zinji ndakali kumutumina babelesi bangu basinsimi. 26 Pele taakwe nimwakandiswiilila nikuba kuteelela pe. Mwakali basicinguni akubisya kwiinda basikale banu.”
27 Lino yebo waakubaambila zyoonse eezi, tabakakuswiilili, waakubaita, tabakakuvuwi pe. 28 Nkaako baambile kuti, “Ooyu ngomusyobo uutaswiilili Mwami Leza wabo uutayandi kulaigwa. Bwini bwakamana, bwakazimaana mumilomo yabo.”
Zibi zyakali kucitwa mukkuti lya Benihinomu
29 Amugele masusu aanu mwaasowe,
mwamana mukalilile akalundu kanyina bwizu,
nkaambo kakuti Mwami Leza wamukaka wamusiya nywebo
nobazyalani eeli ndyanyemenede.
30 Bantu bamu Juda bakacita zibi kumbele lyangu. Mbwaamba Mwami Leza. Bakaimika mituni iisesemya muŋanda eeyo iitwa azina lyangu akwiisofwaazya. 31 Bakayaka malende ku Tofeti mukkuti lya Benihinomu kuti kabatenta bana babo balombe abasimbi mukupaizya, cintu eeco ncindatakabalailila, ncentayeeyi akuyeeya pe. 32 Aboobo amucenjele, ciindi ciyoosika mbwaamba Mwami Leza, bantu nobataciyoobwiiti limbi busena oobu kuti Tofeti, Pele bayooti, ikkuti lyakujailwa, nkaambo bayoozikka bafu mu Tofeti lili ndekkuti lya Benihinomu mane kusikila kukabule abusena. 33 Eelyo mitumba yabantu aaba iyooba zilyo zyabayuni bamuluuwo banyama bamusokwe, nkabela taakwe amuntu uuyoobasoola pe. 34 Takukamvwigwi limbi majwi aakutangala akukondwa, amajwi aanabwiinga mu minzi yacisi ca Juda amumigwagwa yamu Jelusalemu, nkaambo nyika iiyooba tongo.