Jelemiya 6
Munzi wa Jelusalemu mbuwakasinkilizigwa
1 “Amutije mufutuke, nobantu ba Benjamini! Amutije mu Jelusalemu! Amusibe mweembo mu Tekowa! Amulizye mweembo wankondo mu Betihakelemu! Mapenzi aaboola aazwida kunyika aleta lunyonyooko lupati. 2 Ndiyoonyonyoona mwana musimbi wa Ziyoni, weebeka uusumbula. 3 Beembezi amatanga aabo aambelele bayooboola kuzooulwana, bayoosimpa matente aabo kuuzinguluka, umwi aumwi kayoocezya butanga bwakwe kulubazu lwakwe.” Amulibambilile kulwana! 4 Amunyamuke tuulwane acilungu-lungu! Pele maawe zuba liyanda kutubbilila, zimvule zyakumazuba ziya bulampa. 5 Nkaako amunyamuke, atulwane masiku, atunyonyoone matijilo aawo.
6 Mboobu mbwaamba Mwami Leza, Singuzuzyoonse ulati, “Amugonke masamu muyake zitantaala zyakulwanina Jelusalemu. Munzi ooyu weelede kusubulwa, uzwide ludyaminino. 7 Mbuli mukalo mbuupoomoka maanzi aawo, mbubonya oobo awalo ugwisya bubi bwawo. Mulinguwo kuli lupyopyongano alunyonyooko kuciswa azilonda zyawo lyoonse ndizibwene. 8 Komvwa kucenjezya ooku O Jelusalemu, kwataba boobo ndakufutatila, nyika yako ndiicita tongo cakuti taakwe muntu uuyookonzya kukkala mulinjiyo pe.”
Buzangi bwa Baisilayeli
9 Mboobu mbwaamba Mwami Leza Singuzuzyoonse ulati, “Abavululwe Baisilayeli basyeede, mbubonya mbuli buvululwa misaansa, kabacilangisisya alimwi bacela nsaansa mumitabi, mbuli bucita uucela nsaansa.”
10 Ndakaingula kuti, “Mbaani mbendeelede kukananina akubacenjezya? Mbaani banga bandiswiilila? Matwi aabo alisinkidwe kutegwa batakonzyi kumvwa. Majwi aa Mwami Leza alabalebya, tababotelelwi angawo pe.” 11 Pele mebo ndizwide bukali bwa Mwami Leza, nsikonzyi kubujata.
“Koya waambile bana mumigwagwa abakubusi kuti boonse bobilo mwaalumi amukaintu, boonse bapati bamacembele babungane aantoomwe. 12 Maanda aabo ayoopegwa bantu bambi, kubikkilizya myuunda abamakaintu babo, ndaakutandabika janza lyangu kuuma baabo bakkala munyika, Mbwaamba Mwami Leza. 13 Kuzwa kubantu buyo kuyoosika kuli balupati-pati, boonse bayanda busyaacivulemwangu, basinsimi abapaizi boonse ncimwi buyo, boonse balacita zyalucengo. 14 Balasilika zilonda zyabantu bangu mbuli kuti tazili zipati pe. Balati, ‘Kuli luumuno kuli luumuno,’ kakuli kunyina luumuno pe. 15 Sena baluuside akaambo kakutalilemeka kwabo kusesemya? Peepe, tabausi akuusa pe, tabalisendi. Nkaambo bayoowa mbubonya mbuli buwide bamwi, bayooloba ndaakubasubula.” Mbwaamba Mwami Leza.
Baisilayeli mbubakakaka nzila ya Leza
16 Mboobu mbwaamba Mwami Leza ulati, “Amwiime mwaandaanina nzila, mulange amubuzye zyatuzila twakale-kale, amubuzye kujanwa mugwagwa mubotu, mweende mulinguwo, myoyo yanu iyookatalukwa. Pele nywebo mulati, ‘Tatukooenda mulinguwo pe.’ 17 Ndakamubikkila balindizi ndakati, ‘Amukaswiilile kujwi lyamweembo!’ Pele mwakati, ‘Tatukooyooswiilila pe.’
18 “Nkaako amuswiilile nomusyobo, amulange nywebo nobakamboni, ciyanda kucitika kulimbabo. 19 Koswiilila onyika, ndiyanda kubaletela mapenzi bantu aaba, micelo yamilimo yabo mibi, nkaambo tabaswiilili majwi aangu, bakaka mulawo wangu. 20 Ino ndaampindu nzi mutununkilizyo twaku Syeba, naa tukalamusi tuzwa kunyika yakulaale? Zipaizyo zyanu zyakutenta tazitambuliki, zipaizyo eezyo tazindibotelezyi pe. 21 Nkaako mboobu mbwaamba Mwami Leza ulati, ‘Ndiyoobikka zifumpuzyo kumbele lyabantu aaba.’ Bamawisi abana babo balombe bayoolifumpula, mbobabambene abeenzinyina bayooloba.”
Mbubakasaalwa abakunyika
22 Mboobu mbwaamba Mwami Leza ulati, “Amulange kuli mpi yabasilumamba iiboola iizwa kucisi cakunyika, musyobo wanguzu wabusilwa nkondo, kuzwa kumagolelo aanyika. 23 Balijisi mata amasumo, mbaasilunya, tabeengeleli pe. Bayooma mbuli lwizi luvuuma, nobatantide amabbiza aabo, balilibambilide kale mumindando kuti bakulwane omwana musimbi wa Ziyoni.”
24 Twakamvwa zyampuwo yabo, maboko eesu alebuka. Mapenzi atujata, nsungo iili kuli mbuli yamukaintu uutumbuka ilitujisi. 25 Mutainki mumyuunda, nikuba kweendeenda mumigwagwa, nkaambo basinkondonyoko basika amapanga, kuli koonse kulayoosya.
26 Nywebo nobantu bangu, amusame masaka kutondezya kuusa, amulibbunte mutwe, amulile cakweema mbuli muntu uulila mwanaakwe mulombe omwe buyo ngwaajisi, cakufwambaana sikunyonyoona ulatusikila. 27 Jelemiya ndakakucita kuti ube sikulingula asikusunka bantu bangu, kutegwa uzibe akulingula nzila zyabo. 28 Boonse mbazangi mbaasicinguni, baleendeenda kuya bubejelezya bantu twaambo. Mbayumu mbuli mukuba alubulo. Boonse bacita zitayandiki. 29 Mavuba alavukuta canguzu, kuti eenzemune mundalila mumulilo, pele kusalazya ooko nkwabuyo, babi tabazwi pe. 30 Baitwa kuti ninsiliva iitayandiki, nkaambo Mwami Leza wabakaka.