Jelemiya 52

Kuzundwa kwa Jelusalemu

¹ Zedekiya wakajisi myaka iili makumi obilo aumwi naakatalika kulela. Wakalela kwamyaka iili kkumi aumwi mu Jelusalemu. Banyina bakali ba Hamutali mwanaa Jelemiya waku Libuna. ² Awalo ooyu wakabisizya Mwami Leza mbubonya mbuli Jehoyiyakini mbwaakacita. ³ Eeci cakacitika kumunzi wa Jelusalemu akucisi ca Juda akaambo kakunyemya Mwami Leza, mpawo wakabatanda kuzwa kulinguwe. ⁴ Lino mumwaka wafuka wakulela kwa Zedekiya, mubuzuba bwakkumi, bwamwezi wakkumi Nebukadineza mwami waku Babuloni wakaya kuyoolwana munzi wa Jelusalemu abasilumamba bakwe boonse. Wakayaka zivuka anze lyamunzi wakuyaka zitantaala zyakuusinkilizya kuuzinguluka oonse. ⁵ Munzi ooyu wakalisinkilizidwe mane kusika mumwaka wakkumi aumwi wakulela kwamwami Zedekiya. ⁶ Eelyo buzuba bwafuka bwamwezi wane wanzala yakabbebba kapati cakuti bantu mumunzi bakabula cakulya. ⁷ Mpoonya bakaandula bwaanda, nikuba kuti ba Babuloni bakazingulukide munzi, balo basilumamba ba Zedekiya boonse bakatija ciindi camasiku, bakainda kumulyango uuli akati kabwaanda bobilo kumbali aamuunda wamwami. Bakatijila kufwiifwi aku Alaba. ⁸ Pele basilumamba ba Bababuloni bakatandaanya mwami Zedekiya akuyoomweenzya kumabanda aa Jeliko. Nibakabona boobo basilumamba bakwe bakamumwaika akutija, ⁹ mwami Zedekiya wakajatwa. Wakatolwa kumwami waku Babuloni ku Libula munyika ya Hamati nkubakamupeda mulandu. ¹⁰ Zedekiya kalangilila, bakajaya bana bakwe balombe antoomwe abalupati-pati baba Juda ku Libula. ¹¹ Bamane bakamudonkola meso akumwaanga anketani zyamukuba, bamutola ku Babuloni ooko nkubakamwaanga kusikila kulufu lwakwe.

Ŋanda ya Mwami Leza mbuyakamwaigwa

¹² Lino mubuzuba bwaciloba, bwamwezi wasanu mumwaka wakkumi afuka wakulela kwa Nebukadineza mwami waku Babuloni, Nebuzaladani mulailili wabalindizi uuli ngoumwi wabapati-pati bamwami waku Babuloni, wakasika ku Jelusalemu. ¹³ Wakatenta ŋanda ya Mwami Leza, ŋanda yabwami, alimwi amaanda naali buti oonse mu Jelusalemu. Wakatenta amaanda aabalemenede oonse. ¹⁴ Basilumamba ba Bababuloni boonse bakali kusolwedwa amulailili wabalindizi, bakamwaya bwaanda boonse bwakazingulukide munzi wa Jelusalemu. ¹⁵ Mpawo Nebuzaladani mulailili wabo wakatola bantu mubuzike aabo bakasyeede mumunzi abamwi kubikkilizya abaabo bakalyaabide kumwami waku Babuloni. ¹⁶ Pele mulailili ooyu wakasiya bamwi bacete babacete munyika kuti kabalima mumisaansa amumyuunda.

¹⁷ Lino Bababuloni bakapwaya zicinda zyamukuba, zikkazikilo acibumbe caziba eezyo zyakali muŋanda ya Mwami Leza. Bamane bakabweza mukuba wazyo akuutola ku Babuloni. ¹⁸ Alimwi bakatola azibiya, mafocolo, tuzimyo twamalambe, mitiba, tulongo twatununkilizyo azibelesyo zyoonse zyamukuba zyakali kubelesegwa muŋanda ya Mwami Leza. ¹⁹ Mulailili ooyu wakatola ankaye zyoonse alimwi amitiba yakusansaizya yakali yangolida naa yansiliva. ²⁰ Mukuba wakali wazicinda zyobilo, abapoho bali kkumi ababili bakaimvwi kunsi lya tanki eelyo Solomoni ndyaakapangilide ŋanda ya Leza. Mukuba tiiwakali kukonzeka kweelekwa bulemu bwawo pe. ²¹ Cicinda comwe-comwe mutika waco wakali kulampa tukokola tuli kkumi alusele. Mutika waco wakali kukomena tukokola tuli kkumi atubili bwaasa bwakali ndiya yaminwe yone, mukati mwakali mpako. ²² Ali ncico kwakali cipumpu camukuba. Kuzinguluka cipumpu kwakali tubulo tupatangene amapomegileneti, zyoonse zyakali zyamukuba. Cicinda comwe-comwe cakali mbubonya, cakali aa mapomegileneti. ²³ Kwakali mapomegileneti aali makumi aali fuka acisambomwe kulubazu lomwe, mweelwe wamapomegileneti aakazingulukide atala atubulo tupatangene wakali mwaanda.

Bantu Bajuda mbubakatolwa ku Babuloni

²⁴ Lino mulailili wabalindizi wakatola Selaiya mupaizi mupati a Zefaniya uuccilila yooyu mumulimo, alimwi abalindizi baamulyango botatwe mubuzike. ²⁵ Akati kabaabo bakasyeede mumunzi, wakatola awakali mupati wabasilumamba kubikkilizya abalailili bamwami bali ciloba. Wakatola ooyo amulembi wakali mupati wampi yakulemba beelede munkondo abamwi bamugwasya bali makumi aali cisambomwe bakajanika mumunzi. ²⁶ Nebuzaladani mulailili wakatola bantu aabo boonse akuyoobasiya kumwami waku Babuloni ku Libula. ²⁷ Ooko ku Libula mucisi ca Hamati mwami wakasungula kuti bajaigwe.

Mbombubooobu bantu ba Juda mbubakatolwa mubuzike kulaale anyika yabo.

²⁸ Ngooyu mweelwe wabantu Nebukadineza ngwaakatola mubwaange. Mumwaka waciloba wakatola Bajuda bali zyuulu zyotatwe abantu bali makumi obilo abatatu. ²⁹ Mumwaka wakkumi alusele wakulela kwa Nebukadineza, wakatola bantu bali myaanda iili lusele amakumi otatwe ababili bamu Jelusalemu. ³⁰ Mumwaka wamakumi obilo aitatu wakulela kwakwe, wakatola bantu mubwaange bali myaanda iili ciloba amakumi onse aabo bakatolwa a Nebuzaladani silutwe wasilumamba. Antoomwe bakali zyuulu zyone amyaanda iili cisambomwe.

Jehoiyakini mbwaakaangununwa

³¹ Lino mumwaka wamakumi otatwe aciloba Jehoiyakini mwami wacisi Cajuda katoledwe mubuzike, mumwaka Evilimelodaki wakaba mwami wacisi Cababuloni. Evilimelodaki wakaangununa Jehoiyakini mwami wacisi Cajuda kuzwa muntolongo. Wakamwaangununa mubuzuba bwamakumi obilo aasanu bwamwezi wakkumi aibili. ³² Wakaamba calubomba anguwe wamusumpula akumupa cuuno cabulemu kwiinda baminyina mbaakali aabo mu Babuloni. ³³ Nkaako Jehoiyakini wakasamununa zyantolongo, alimwi mumazuba abuumi bwakwe boonse wakalikulida antoomwe amwami. ³⁴ Buzuba abuzuba mwami wakali kupa Jehoiyakini zyakuvola kwakwe kwabuumi bwakwe boonse.