Jelemiya 51
Cisi ca Babuloni mbociyoosubulwa
1 Lino mboobu mbwaamba Mwami Leza ulati, “Amubone njoobusya umwi sikunyonyoona uyoolwana bamu Babuloni abantu bamu Lebukamayi. 2 Njootuma bazwamasi ku Babuloni kuti bakapupulule munzi ooyu akunyonyoona cisi cawo, bayooulwana kumabazu oonse mubuzuba bwamapenzi aawo. 3 Basimata mutabapi ciindi cakumufusa pe, nokuba kubalekela kuti babweze zilwanyo. Bakubusi bawo mutabaleki pe, basilumamba bawo mubanyonyweede limwi. 4 Bayoowida ansi kabajaidwe mu Babuloni, bayoocisigwa kapati mumigwagwa yawo. 5 Nkaambo Mwami Leza wabo Singuzuzyoonse tasiide bantu ba Isilayeli aba Juda nokuba kuti cisi cabo cizwide milandu kumbele lya Uusalala wa Isilayeli. 6 Amutije muzwe mu Babuloni! Amulivune! Mutanyonyoonwi akaambo kazibi zyawo. Ciindi casika cakuti Mwami Leza apilusye bubi, uyoocita mbuli bweelede. 7 Babuloni wakali mbuli nkomeki yangolida mujanza lya Mwami Leza. Wakacita kuti misyobo yoonse ikolwe. Bamasi bakanywa waini wakwe, nkaako baba mbuli kuti basondoka. 8 Babuloni uyoozundwa cakufwambaana akutyoloolwa. Amumulilile! Amulangaulile bbona lyakuponya maciswe aakwe. Ambweni inga ulaponyezegwa. 9 Nitwasilika Babuloni, pele tasilikiki. Ino kuti twamusiya buyo umwi aumwi abweede kunyika yokwabo, cisubulo cakwe cilasika amujulu, mane nceeco mumakumbi.”
10 Mwami Leza watondezya kuti tuliluleme. Amuboole twaambilizye mu Ziyoni eezyo Mwami Leza wesu nzyaatucitila.
11 Amukwenge mivwi, amubweze ntobo. Mwami Leza wabusya bami baku Mede, nkaambo ukanzide kunyonyoona Babuloni.
Mwami Leza nguuyoobweedezezya bubi bwakacitwa kuŋanda yakwe. 12 Amunyamune ndembela mulwane munzi wa Babuloni! Amuvuzye basilumamba bacibwene, amwiimike balindizi, amulibambilile kulwana!
Mwami Leza uyoocita eeco ncakanzide, eezyo nzyaakalailila kuti zicitwe kumunzi wa Babuloni. 13 Nywebo nomukkala munsi aamaanzi manji nomujisi lubono lunji, mamanino eenu asika, casika ciindi calufu lwanu. 14 Mwami Leza wakonka muzina lyakwe wati, “Njooleta bantu banji mbuli cikwikwi kuti bazoolwane cisi ca Babuloni, bazooyobeka cakuzunda.”
Lwiimbo lwakulumba Leza
15 Mwami Leza wakabamba nyika anguzu zyakwe,
mubusongo bwakwe wakalenga nsi, akulandabula julu.
16 Akulailila kwakwe maanzi aamujulu alavuuma,
ulaleta makumbi kuzwa kumagolelo aanyika,
nguucita kuti ndabo kazilaba liba mvula,
ulatumya muuwo kuzwa kuciyobwedo cakwe.
17 Bantu nibabona ceeci baba bafuba-fuba akubula maanu,
aabo bapanga mituni bausa nsoni beni, nkaambo mituni yabo njabuyo, alimwi tiijisi buumi.
18 Taigwasyi, yeelede buyo kusampaulwa,
iyoonyonyoonwa a Mwami Leza aakwiiboolela.
19 Leza wa Jakobo tali mbuli njiyo pe, nguwakabamba zyoonse,
nguwakasala Baisilayeli kuti babe bantu bakwe. Mwami Leza ndezina lyakwe.
Nsando ya Mwami Leza
20 Mwami Leza ulati, “Babuloni uli nsando yangu,
cilwanyo cangu munkondo, ndakacibelesya mukupwayaula bamisyobo amalelo aawo,
21 kujazya mabbiza abasikutanta, ankalaki abasikutanta.
22 Anduwe ndapwaya mwaalumi amukaintu, anduwe ndapwaya
mudaala amukubusi, anduwe ndapwaya mukubusi amusimbi,
23 anduwe ndapwaya mweembezi ambelele, anduwe ndapwaya mulimi abasune, anduwe ndapwaya beendelezi abalupati-pati.”
Cisubulo cacisi ca Babuloni
24 “Yebo, kolangilide ndapilusizya bamu Babuloni aboonse bakkala mucisi ca Bakalodiya akaambo kabubi boonse mbubakacita mu Ziyoni. Mbwaamba Mwami Leza. 25 Ndikusulide yebo ocilundu cinyonyoona, yebo oonyonyoona nyika yoonse. Mbwaamba Mwami Leza. Njootandabika janza lyangu kuti ndikulwane, njookukunkulisizya ajeleele, njoocita kuti ube cilundu citentedwe. 26 Taakwe bbwe noliba lyomwe liyoogwisigwa alinduwe kuti libe lyacooko. Noliba bbwe lyomwe libe lyantalisyo, nkaambo uyoonyonyweedwa limwi kukabe kutamani.” Mbwaamba Mwami Leza.
27 “Amwiimike ndembela mucisi! Amulizye mweembo akati kabamasi! Amundandamike bamasi kuti bacilwane, amuciitile malelo aaya, Alalati, Mini a Asyikenazi. Amusale mulailili wabasilumamba kuti acilwane, amutumine mabbiza manji mbuli makata aazikwikwi. 28 Amubambe bamasi kuti balwane cisi eeci, Bamedi, beendelezi babo, antoomwe abalupati-pati babo boonse, alimwi amasi oonse ngobalela. 29 Nyika ilatenkaana akupenga, nkaambo makanze aa Mwami Leza ngakanzide munzi wa Babuloni ayoocitika ncobeni. Uyoonyonyoona ncobeni cisi ca Bakalodiya cakuti taakwe muntu uuciyookkala oomo. 30 Basilumamba bamu Babuloni baleka kulwana, balisunsumene muziyubilo zyabo. Nguzu zyabo zyamana, baba mbuli bakaintu. Maanda aabo atentwa amulilo, zipingizyo zyabo zyatyoloolwa. 31 Basimposo balitobelene, batumwa balitobelene, kuti bainke bakaambilizye kumwami wa Babuloni kuti munzi wakwe wazundwa, 32 zito zyoonse bazisinkilizya, mayubilo mayumu oonse atentwa, abalo basilumamba baliyoowede. 33 Mboobu mbwaamba Mwami Leza Singuzuzyoonse, wa Isilayeli ulati, ‘Munzi wa Babuloni waba mbuli cuumino camaila, ciindi niwalyataukwa, ciindi cakutebulwa cawo cilasika.’”
34 “Nebukadineza mwami waku Babuloni watumana, wacita kuti tunyongane,
watucita mbuli nongo iitakwe cakunywa. Watutema mbuli nzoka
akukkuta zilyo zyesu zinona, watugwisya mwida lyakwe watuswida.
35 Bubi oobo mbutwakacitwa abube ali Babuloni. Bulowa bwesu abube ali
baabo bakkala mu Kalodiya.” Mbobaamba bamu Jelusalemu.
36 Nkaako mboobu mbwaamba Mwami Leza ulati, “Amubone njookosola makani aanu, njoopilusya bubi kuli bamulwana, njooyuminizya lwizi lwacisi cabo, akucita kuti tusensa tukayume. 37 Munzi wa Babuloni uyooba cilwi cazitantaala, uyooba luumbo lwabamwaaba, uyooba ciyoosyo acisampuzyo, tuukakkalwi limbi pe. 38 Bantu bawo boonse bavuluma mbuli twana twasyuumbwa, balanduluma mbuli zyana zyasyuumbwa. 39 Myoyo niiciyandisisya, ndiyoobabambila pobwe, akucita kuti bakolwe, nkaambo bayoogwegwemuka kuseka, nkabela bayooona kwalyoonse, batakasinsimuki pe. Mbwaamba Mwami Leza. 40 Njoobaleta, bakabe mbuli tubelele twakujaya, mbuli bagutu ampongo.”
Kunyonyoonwa kwa Babuloni
41 Maawe Syesyaki wazundwa, munzi ooyo ngubalisumpwida bamunyika yoonse wajatwa! Babuloni buyooba busena buyoosya kapati akati kabamasi! 42 Lwizi luyoobukila Babuloni, mayuwe aalo aavuuma ayoouvumba. 43 Minzi yawo iyooba matongo, iyooba cimpayuma ankanda, nyika eeyo iitakkalwi bantu pe, nyika iitaindwi bantu. 44 Bamasi tabaciyooguumukili kulinguwe.
Bwaanda bwa Babuloni buyoowa. 45 Amuzwe mulinguwo, nobantu bangu! Amulivune! Amutije bukali bupati bwa Mwami Leza. 46 Mutatyompwi nokuba kuyoowa mwamvwa mavwambukila mucisi, mavwambukila amwi amvwigwa mwaka uuno, amwi mwaka uuboola, mavwambukila aalupyopyongano mucisi, muleli ulwana mulelinyina. 47 Kasimpe ciindi ciyoosika nenjoosubula mituni yabantu bamu Babuloni, cisi coonse ciyoousigwa nsoni, bantu boonse bamulinguwo bayoolala mumigwagwa kabajaidwe. 48 Mpawo julu anyika azyoonse zili mulinzizyo ziyoopozomoka cakusekelela kuzundwa kwa Babuloni, nkaambo kuzwa kunyika kuyooboola basikunyonyoona bazooulwana, Mbwaamba Mwami Leza. 49 Babuloni uleelede koolwa akaambo kabantu ba Isilayeli bajaidwe, mbubonya mbuli bajaidwe munyika yoonse mbubakajaigwa akaambo ka Babuloni.
Makani aa Leza ngaakatumina Baisilayeli bali mu Kalodiya
50 “Nywebo nomwatija panga amuzwe muunke, mutanooide kwiingaila! Amuyeeye Mwami Leza munyika iili kulaale, amuyeeye a Jelusalemu. 51 Twausigwa nsoni, nkaambo twalikusampaulwa, nsoni zilitujisi kapati, nkaambo bazwamasi bakanjila mumasena aasalala aaŋanda ya Mwami Leza. 52 Pele mazuba ayoosika, mbwaamba Mwami Leza, nenjoosubula mituni yawo, mucisi cawo coonse bacisidwe bayootongela. 53 Nikuba kuti Babuloni kiisika kujulu akuyaka nkwakwa ndamfu zyamayubilo ndiyootuma basikunyonyoona.” Mbwaamba Mwami Leza.
Kunyonyoonwa kwa Babuloni
54 “Amumvwe kulila ku Babuloni, nkulila kwalunyonyooko lupati, mucisi ca Bakalodiya.
55 Mwami Leza ulanyonyoona Babuloni, ulaumuzya kuyobeka kwamapobwe aawo.
Basinkondonyina bavuuma mbuli mayuwe aamaanzi manji, kuvuuma kwamajwi aabo kuyooyooma.
56 Sikunyonyoona uyooboola kuzoolwana Babuloni, basilumamba bawo bayoojatwa,
mata aabo ayootyoloolwa. Nkaambo Mwami Leza ngu Leza uubweedezezya cisubulo, bayoobasubula buzwide.
57 Njoocita kuti balupati-pati abasongo bawo bakakolwe, beendelezi bawo bapati,
antoomwe abasilumamba abalo mbubonya, bayooona akutamani tabakasinsimuki pe.
Mbwaamba Mwami Leza, uuli zina lyakwe ngu Mwami Leza Singuzuzyoonse.
58 “Mboobu mbwaamba Mwami Leza Singuzuzyoonse ulati,
Bwaanda bwa Babuloni bulemu buyoobambasigwa,
milyango yawo milamfu iyootentwa amulilo, bantu balipenzya buyo,
milimo yabamasi iyooba nkuni zyamulilo.”
Makani aa Jelemiya ngaakatumina ku Bakalodiya
59 Aaya ngamakani Jelemiya ngaakalailila Selaiya silutwe mwanaa Neliya mwanaa Maaseiya ciindi naakainka ku Babuloni a Zedekiya mwami wacisi ca Juda mumwaka wane wakulela kwakwe. 60 Jelemiya wakalilembede mubbuku zyamapenzi oonse ayoosikila munzi wa Babuloni, nkokuti oonse aayo aakalembedwe aaamba azya Babuloni. 61 Wakati kuli Selaiya, “Waakusika buyo ku Babuloni, weelede kuyooabala majwi aaya oonse cakupozomoka. 62 Ukati, ‘Mwami Leza, wakati uyoonyonyoona busena oobu, kutegwa muntu naba munyama atakakkali mulimbubo, buyooba tongo kwalyoonse alyoonse.’ 63 Waakumana kubala bbuku eeli, ukaangilile bbwe alindilyo ukalisowele mumulonga wa Yufuletisi. 64 Ukati, ‘Mbombubo oobu Babuloni mbuuyoobbila mbombombombo, tuukabuki limbi akaambo kamapenzi ngenjooleta alinguwo. Nkabela bantu bayoojaigwa.’”
Mpaagolela majwi aa Jelemiya aawa.