Jelemiya 50
Makani aaamba zyakuzundwa kwa Babuloni
1 Ngaaya majwi Mwami Leza ngaakaamba kwiindila muli Jelemiya musinsimi amakani aajatikizya zya Babuloni nyika ya Bakalodiya. Alati, 2 “Amwaambilizye mulungulule akati kabamasi amusimpe ndembela mwaambilizye,
mutasisi pe, pele mwaambe kuti, ‘Babuloni ilazundwa, Beli ukausigwe nsoni,
Maaduki ulakankama. Zikozyanyo zyamu Babuloni zilausigwa nsoni, mituni yaco yapwaigwa.’
3 “Musyobo uuzwa kunyika uzoolwana Babuloni, akunyonyoona cisi cawo. Taakwe muntu uuyookkala mulinjiyo, bantu abanyama boonse bayootija.”
Kuboola kwa Baisilayeli
4 “Mumazuba aaya, kuciindi eeco, mbwaamba Mwami Leza, bantu ba Isilayeli abantu ba Juda boonse bayooyandaula Mwami Leza wabo cakulila. 5 Bayoobuzya nzila iitozya ku Ziyoni, akulanga nkuko mukukomba. Bayoobungana akupanga cizuminano a Mwami Leza citakamani alimwi citakooyoolubwa.
6 “Bantu bangu bali mbuli mbelele zisweekede, beembezi babo babasowa, akubacita kuti kabaingaila muzilundu. Bakali kwiingaila muzilundu amutulundu akuluba busena bwabo bwakulyookezezya. 7 Kufumbwa ooyo wakabajana wakabalwana, basinkondonyina bakati, ‘Tunyina mulandu, nkaambo bakabisizya Mwami Leza, uuli nguubabamba, iiyi nguwe Mwami Leza ngubakali kusyoma basikale babo.’
8 “Amutije mu Babuloni, amuzwe munyika ya Bakalodiya, amube mbuli mpongo zisolwedela butanga. 9 Nkaambo ndiyanda kubusya a kuleta bantu bazoolwana Babuloni, bantu bamisyobo mipati bazwida kulubazu lwakunyika lwacisi. Bayoondandama kuti baulwane, bantu aabo bayoozwida kunyika bayoouzunda. Mivwi yabo ili mbuli basilumamba bacibwene kapati, batabooli cinkwamaanza. 10 Aboobo Bakalodiya bayoosaalwa, boonse babasaala bayoolamwa.” Mbwaamba Mwami Leza.
Kuwa kwa Babuloni
11 Akaambo kakuti mulasekelela akutangala nywebo nomusaala lukono lwangu, akaambo kakuti mulatambala mbuli mpwizi yuuma maila, akulila mbuli mabbiza, 12 munzi wanu uyoousigwa nsoni kapati busena oomo mumwakazyalilwa buyoofwisigwa nsoni. Uyooba munzi muniini akati kamisyobo, uyooba nkanda, cimpayuma alukula. 13 Akaambo kabukali bwa Mwami Leza, tukooyookkalwa alimwi pe, pele uyooba tongo lini. Boonse bayooinda ku Babuloni bayooyoowa akusampaula akaambo kamapenzi aawo.
14 Amundandame cakuzinguluka Babuloni, nywebo nyoonse nobasimata. Amuuyase, mutasiyi mivwi yanu, nkaambo wakabisizya Mwami Leza. 15 Amuuyobe koonse-koonse! Ngooyo wakaaba maanda aawo malamfu awa, bwaanda bwawo bwakolomoka. Mukuti Mwami Leza nguupilusizya bubi bwabo, amuupilusizye bubi, amuucite mbuli mbuwali kucita bamwi. 16 Boonse basyanga mu Babuloni amubanyonyoone, kubikkilizya abaabo batebula azigonsyo zyabo. Lino akaambo kapanga lyasikudyaminina bantu boonse abatijile kubantu bokwabo, boonse abatijile kunyika yokwabo.
Baisilayeli mbubakapiluka
17 Baisilayeli bali mbuli mbelele zimwaikide, eezyo zyatandaanyizigwa abasyuumbwa. Ooyo wakasaanguna kubanyonyoona mmwami waku Asiliya, ooyo wakasyaalila, kubapwayaula ngu Nebukadineza mwami waku Babuloni.
18 Nkaako mboobu mbwaamba Mwami Leza Singuzuzyoonse, wa Isilayeli ulati, “Njoosubula mwami waku Babuloni antoomwe abamunyika yakwe, mbubonya mbuli mbundakacita mwami waku Asiliya. 19 Pele ndiyooboozya Baisilayeli kunyika yabo, nkabela bayookkala mucilundu ca Kaameli amucisi ca Basyani, bayoolya zilyo zyabo zikomena mutulundu twa Efulemu amu Giliyadi. 20 Mumazuba aayo, kuciindi eeco, mbwaamba Mwami Leza, milandu ya Baisilayeli iyoovuntauzigwa, pele taakwe iiyoobako pe, azinyonyoono zyabamucisi ca Juda, pele taakwe ciyoojanwa, nkaambo njoolekelela baabo mbenjoosiya.”
Leza mbwayoobeteka cisi ca Babuloni
21 Mwami Leza ulati, “Amulwane cisi ca Melataimu, abaabo bakkala mu Pekodi. Amubatandaanye, mubajaye mubanyonyweede limwi. Mbwaamba Mwami Leza. Amucite zyoonse nzindamulailila.
22 “Amumvwe kuyoobeka kwankondo mucisi, kuyobeka kwalunyonyooko lupati! 23 Ino yatyolwa akupwaigwa buti nsando yamunyika yoonse! Ino Babuloni yaba tongo buti akati kabamasi! 24 Ndakakuteya kakole omunzi wa Babuloni, nkaako wakajatwa kotana ziba pe, wakajanwa akujatwa, nkaambo wakali kukazya Mwami Leza. 25 Mwami Leza wajalula ciyoobwedo cakwe akugwisya zilwanyo zyabukali bwakwe, nkaambo Mwami Leza Singuzuzyoonse ulijisi mulimo wakucita munyika ya Bakalodiya. 26 Amuboole kuzwa kulaale muzoolwane. Amujalule matala aawo, amulundike bantu bawo mbuli maila. Amuunyonyweede limwi mutausiili bantu pe. 27 Amujaye basilumamba bawo boonse, boonse abajaigwe! Maawe kulimbabo! Nkaambo buzuba bwabo bwasika, nciindi cakuti abalo basubulwe.”
28 Amuswiilile kuli baabo basyeede ababo bakazwa ku Babuloni mbobaambilizya mu Ziyoni mbuli Mwami Leza wesu mbwaapilusizya bubi, mbaapilusizya bubi akaambo kaŋanda yakwe.
29 Mwami Leza ulati, “Amwiite basimata kuti bazoolwane bamu Babuloni, boonse aabo bafusa mata. Amuuzinguluke, mutaleki muntu naba omwe kuti atije. Amuubweedezezye bubi akaambo kamilimo yawo, amuucite mbuli mbuwakali kucita. Nkaambo wakavoolozya Mwami Leza, Uusalala wa Isilayeli. 30 Nkaako bakubusi bawo bayoofwida mumigwagwa yawo, basilumamba bawo boonse bayooumuzigwa mubuzuba oobo. Mbwaamba Mwami Leza.”
31 Leza ulati, “Bona ndakulwana yebo oolibikka aantu.” Mbwaamba Mwami Leza Singuzuzyoonse. “Nkaambo buzuba bwako bwasika, nciindi cakuti usubulwe caswena. 32 Uulipa kantu-kantu uyoolekwa akuwa, nkaambo taakwe uuyoomubusya, njookutula mulilo muminzi yawo ooyo uuyoosyukuta boonse babambene anguwo.”
33 Mboobu mbwaamba Mwami Leza Singuzuzyoonse ulati, “Bantu ba Isilayeli balidyaminidwe, abalo bantu ba Juda mbubonya oobo. Boonse basikubajata balibajisi anguzu, kabatabaleki. 34 Pele munununi wabo ngusinguzu, Mwami Leza Singuzuzyoonse ndezina lyakwe. Kasimpe uyoobavuna canguzu kutegwa abaletele luumuno munyika yabo, pele uyoopyopyonganya boonse aabo bakkala mu Babuloni.
35 Mwami Leza ulati, ‘Bakalodiya amubalwane amapanga,
amubalwane aabo bakkala mu Babuloni kubikkilizya abalupati-pati abaalumi basongo!’
36 Amubalwane amapanga basinsimi bawo babeja! Ababe ziyanga.
Amubalwane amapanga basilumamba bawo! Balayoowa kapati.
37 Mabbiza aawo amwaayase amapanga,
kubikkilizya abazwamasi bali mulinguwo!
Balaba mbuli bakaintu. Ziyobwedo zyawo amuzipwaye! Eelyo zilasaalwa.
38 Milonga yawo aisikilwe ciyuma-yuma! Eelyo ilayuminina.
Nkaambo ninyika yamituni, balisondokede amituni yabo.
39 “Nkaako zilenge zyamunkanda abasuntwe mbabayookkala ooko, batumba nkobanookkala. Tuuciyookkalwi limbi pe, mumazyalani oonse. 40 Mbubonya mbuli Leza mbwaakanyonyoona Sodomu a Gomola antoomwe aminzi yakabambene anjiyo. Mwami Leza ulati, ‘Mbombubo oobo mbokutakwe muntu uuyookkala ooko, taakwe muntu uuyooima-ima.’”
41 “Amubone! Kwaboola mpi kuzwa kunyika, musyobo mupati
uujisi bami banji wabusigwa kuzwa kumagolelo aanyika.
42 Balibwezede mata amasumo, mbaasilunya tabeengeleli pe.
Balimvwisya mbuli lwizi luvuuma, nobatantide amabbiza aabo,
baboola mbuli baalumi balibambilide kale kulwana kuti bazoolwane nduwe omunzi wa Babuloni.
43 Mwami waku Babuloni wakamvwa makani aambabo, nkabela wakagonkelwa.
Mapenzi amujata, macise aali mbuli mukaintu wamyongwa akamusikila.
44 “Mbuli syuumbwa uuzwa muzyoonde zya Jolodani, uuboola kumacelelo, njootanda bamu Babuloni mukaindi kasyoonto. Nguni musale ooyo ngwetipe mulimo ooyu? Nguni uuli mbuli ndime uukonzya kundiimina? Nguni mweembezi ooyo uukonzya kundiyumina? 45 Nkaako, amumvwe eezyo Mwami Leza nzyakanzide a Babuloni, eezyo nzyakanza anyika ya Bakalodiya. Tubelele tuyookwelaanyizigwa, uyoonyonyweeda limwi macelelo akaambo kabo. 46 Munzi waakuzundwa, nyika iyootenkaana, kulila kwawo kuyooyooma akati kabamasi.”