Jelemiya 49

Mwami Leza mbwayoobeteka Baamoni

¹ Kwaamba zya Baamoni, mboobu mbwaamba Mwami Leza ulati, “Sena nyika ya Isilayeli tiijisi baalumi? Sena tiijisi bakonzya kwiikwabilila? Ino nkaambo nzi Moleki ncaatola lukono lwacisi ca Gadi? Nkaambo nzi bantu bakwe nobakkede muminzi yaco? ² Pele mazuba ayoosika, mbwaamba Mwami Leza, nenjoosiba mweembo wankondo kulwana munzi wa Labba wa Baamoni, uyooba citantaala camatongo, tunzi tuuzingulukide tuyootentwa amulilo. Eelyo Baisilayeli bayootanda baabo bakabatandide. Mbwaamba Mwami Leza. ³ Nobaku Hesyiboni amulile, nkaambo munzi wa Ai wanyonyoonwa! Amulilisye nywebo nomukkala mu Labba! Amusame masaka moomoke muzembe mukati kabwaanda, nkaambo leza wanu Moleki ulatolwa mubwaange, antoomwe abapaizi abalupati-pati bakwe. ⁴ Ino nkaambo nzi ncomulikankaizya nobantu batasyomeki? Nguzu zyanu zyamana. Nkaambo nzi nomusyoma nguzu akuti, Taakwe uukonzya kumulwana? ⁵ Kasimpe ndiyoomuletela ciyoosya kuzwa kuli baabo boonse bamuzingulukide. Mbwaamba Mwami Leza Singuzuzyoonse. Nyoonse muyootandwa, taakwe muntu naba omwe uuyoobunganya batijide.

⁶ “Musule akooku ndiyoocita kuti Baamoni bakazwidilile alimwi,” mbwaamba Mwami Leza.

Mwami Leza mbwayoobeteka baku Edomu

⁷ Kwaamba zyacisi ca Edomu, mboobu mbwaamba Mwami Leza Singuzuzyoonse ulati, “Sena taacikwe basongo mu Temani? Sena balailili bamaanu bakaloba? Sena busongo bwabo bwakamana? ⁸ Amupilukile mutije, amukayube mumpangala zisiya, nywebo nomukkala mu Dedani. Nkaambo ndilaleta mapenzi kuciinga ca Isau ciindi ndabasubula. ⁹ Kuti naa basikucela nsaansa nibasika kulinduwe, sena nibatakusiila zice? Kuti naa babbi nibaboola masiku, sena nibatabba eezyo nzyobayanda? ¹⁰ Pele baciinga ca Isau ndabasiya aatuba, ndayubununa mayubilo aabo, kutegwa batakonzyi kulisisa. Bana babo, baluzubo lwabo ambobabambene limwi bayooloba, tabaciyoobonwi limbi pe. ¹¹ Amubasiye bamusyaala, njoobakwabilila. Bamukabafu banu abalo bayoondisyoma.

¹² “Mboobu mbwaamba Mwami Leza ulati, ‘Kuti bantu aabo bateelede kusubulwa balo banywa nkomeki yacisubulo, ino nywebo nkaambo nzi nomutilekwe buyo? Tamukalekelelwi, pele muyoonywa. ¹³ Ndakakonkezya muzina lyangu, mbwaamba Mwami Leza, kuti munzi wa Bozila uyoonyonyoonwa akuba ciyoosyo, cisampuzyo acisinganyo, tunzi twayo toonse tuyoonyonyoonwa akutamani.’”

¹⁴ Ndakamvwa makani aakazwida ku Mwami Leza aakuti, kwakatumwa mutumwa wakwe kubamasi aambilizye kuti, “Amunyamuke muulwane munzi ooyu! ¹⁵ Lino njoomucita kuti mube basyoonto akati kabamasi, basampaulwa akati kabantu. ¹⁶ Kusyoma nkomucita, akulisumpula kwamyoyo yanu zyamucenga nywebo nomukkala mumajeleele amandomba, nywebo nomukkala ansonje lyatulundu. Nikuba kuti muyake maanda aanu mujulu mbuli buyaka sikwaze, njoomuleta ansi. Mbwaamba Mwami Leza.

¹⁷ “Edomu buyooba busena buyoosya, boonse bayooinda bayoogambwa akusabula akaambo kazeezyo zyoonse ziyoocitika. ¹⁸ Mbubonya mbuli bwakanyonyoonwa Sodomu a Gomola antoomwe aminzi eeyo yakabambene aanjiyo, mbwaamba Mwami Leza, mbubonya oobo taakwe muntu naba omwe uuyookkala oomo, taakwe uuyooima-ima ooko pe. ¹⁹ Mbubonya mbuli syuumbwa uuzwa muzyoonde zya Jolodani akuboola kumacelelo mabotu, mbwenjootanda Baedomu kuzwa munyika yabo cakufwambaana. Ino nguni musale kuti ndimubikke abe mweendelezi? Nguni uuli mbuli ndime alimwi nguni uukonzya kundikazya? Nguni mweembezi uukonzya kundiyumina? ²⁰ Nkaako amumvwe eezyo Mwami Leza nzyakanzide Edomu, eezyo nzyayanda kucita kuli baabo bakkala mu Temani. Tubelele tuyookwelaanyizigwa, uyoonyonyweeda limwi butanga bwamacelelo aabo akaambo kabo. ²¹ Baakuwa mizinga dde nyika iyootenkaana, kulila kwabo kuyooyooma kulwizi lusalala. ²² Amulange! Sikwaze wafuuma wababamuna mababa aakwe acisi ca Bozila. Mubuzuba oobo myoyo yabasilumamba bamu Edomu iyooba mbuli moyo wamukaintu uutumbuka.”

Mwami Leza mbwayoobeteka baku Damasikasi

²³ Kwaamba zya Damasikasi Leza ulati, “Baku Hamati aku Aapadi bagambwa nkaambo bamvwa makani mabi. Batyompwa kapati, bakatazigwa mbuli mayuwe aalwizi aatabatami pe. ²⁴ Bamu Damasikasi bagonkelwa, babunduluka kuti batije, kuyoowa kwabajata, mapenzi amacise abajata, macise aali mbuli aamukaintu uutumbuka.

²⁵ “Wasiigwa buti munzi uuli aampuwo, munzi wakutangala! ²⁶ Kasimpe bakubusi bamuzi wa Damasikasi bayoowa mumigwagwa, basilumamba bawo bayooumuzigwa mubuzuba oobo. Mbwaamba Mwami Leza Singuzuzyoonse. ²⁷ Lukwakwa lwamunzi wa Damasikasi njoolutenta mayubilo aa Benihadadi ayoosyukuta.”

Kubetekwa kwamusyobo wa Kedaa amunzi wa Hazoo

²⁸ Kwaamba zyamusyobo wa Kedaa amalelo amunzi wa Hazoo, aayo Nebukadineza mwami waku Babuloni ngaakalwana, mboobu mbwaamba Mwami Leza ulati, “Amunyamuke mulwane Bakedaa, Munyonyoone bantu bakujwe. ²⁹ Matente aabo amatanga aabo ayootolwa, ziyubilo zyabo ziyootolwa antoomwe alubono lwabo loonse ankamela. Bantu bayoobapozomokela akuti, ‘Ziyoosya zili koonse-koonse’

³⁰ “Amutije cakufwambaana! Amukkalile mumpangala zisiya nywebo nomukkala mu Hazoo.” Mbwaamba Mwami Leza. “Nkaambo Nebukadineza mwami waku Babuloni ulimukanzide, kuli nzyayeeya andinywe. ³¹ Amunyamuke mulwane musyobo uuliibide, uukkede cakulikwaya.” Mbwaamba Mwami Leza, “Musyobo uutajisi munzi uujisi milyango noziba zipingizyo, bantu bawo balilikkalide.

³² “Nkamela zyabo zilaba zisaalo, matanga aabo ayootolwa. Njoobamwaila mumabazu oonse aabo bali mumasena aali kulaale aabo bagelwa zisumpa. Njoobaletela mapenzi kuzwa mumasena oonse.” Mbwaamba Mwami Leza. ³³ “Munzi wa Hazoo uyooba luumbo lwabamwaaba uyooba tongo kwalyoonse alyoonse. Taakwe uuyookkala ooko, taakwe muntu uuyoima-ima pe.”

Mwami Leza mbwayooaba Elamu

³⁴ Ngaaya majwi aa Mwami Leza aakasikila Jelemiya musinsimi aaamba zyacisi ca Elamu, kumatalikilo aakulela kwa Zedekiya mwami wacisi ca Juda akati, ³⁵ Mboobu mbwaamba Mwami Leza Singuzuzyoonse ulati, “Amubone, njootyoloola mata aabamu Elamu, aabatunzizye. ³⁶ Njoocita kuti luuwo lukaungile cisi ca Elamu kuzwa kumabazu oonse one, njoomwaisya bantu baco koonse-koonse mane kusikila kukabule cisi mobatanoojaniki. ³⁷ Njoopwayaula bamu Elamu kumbele lyababalwana kumbele lyabaabo bayanda kubajaya. Njoobaletela mapenzi mubukali bwangu. Mbwaamba Mwami Leza. Njoobatandaanya apanga mane kusikila nkabalobye.” ³⁸ Njoobikka cuuno cangu cabwami mu Elamu akunyonyoona mwami waco abalupati-pati, mbwaamba Mwami Leza.

³⁹ “Nikuba boobo, mumazuba aaboola njoozwidilizya cisi ca Elamu kuti cikazwidilile. Mbwaamba Mwami Leza.”