Jelemiya 44

Majwi aa Mwami Leza ku Baisilayeli bali mu Ijipiti

¹ Ngaaya majwi aakasikila Jelemiya aakali kwaamba zya Bajuda bakali kukkala mu Ijipiti nkoili kunselelo ku Migidoli, Taapenesi a Memfisi a Ijipiti nkoili kutala. ² Mboobu mbwaamba Mwami Leza Singuzuzyoonse, wa Isilayeli ulati, “Mwakalibonena mapenzi aayo ngindakaletela munzi wa Jelusalemu aminzi yoonse yamu Juda. Sunu minzi isyeede buyo mbuboobu yaba matongo, ³ akaambo kabubi oobo mbobacita. Bakandinyemya mukupaizya tununkilizyo amukukomba baleza bambi aabo balo nomuba ndinywe naa basikale banu mbibatakazi. ⁴ Kanji-kanji ndakali kutuma babelesi bangu basinsimi bakali kuti, ‘Mutaciti cintu eeci cisesemya ncesulaika!’ ⁵ Pele tiibakaswiilila nokuba kuteya matwi aabo, tiibakafutatila zibi zyabo, nokuba kuleka kutentela baleza bambi tununkilizyo. ⁶ Nkaako bukali bwangu buyoosya bwakababukila bamuminzi yamu Juda abakkala mu Jelusalemu akunyonyoona minzi yaba matongo mbuli mbwiibede sunu.”

⁷ Lino mboobu mbwaamba Mwami Leza Singuzuzyoonse, wa Isilayeli ulati, “Ino nkaambo nzi nomuliletela mapenzi mapati aali boobu mukunyonyoona bamu Juda baalumi abakaintu, bana abamvwanda cakuti taakwe bantu mbomwasiya pe? ⁸ Ino nkaambo nzi nomundinyemya azeezyo nzyomwakalipangila, akutentela baleza bambi tununkilizyo muno mu Ijipiti momwakazookkala? Mulalinyonyoona nobeni akulicita citukizyo acisampuzyo akati kamisyobo yoonse yaansi. ⁹ Sena mwaluba bubi oobo basikale banu mbubakacita abubi bwabami abwabami bakaintu, abubi oobo mbumwakacita abakaintu mucisi ca Juda abamu Jelusalemu? ¹⁰ Kusikila sunu tabanalibombya pe, nikuba kuleka nikuba kutobela mulawo amalailile ngindakamupa nywebo abasikale banu.”

¹¹ Nkaako mboobu mbwaamba Mwami Leza Singuzuzyoonse, wa Isilayeli ulati, “Ndikanzide kumuletela mapenzi akunyonyoona cisi coonse ca Juda. ¹² Njootola bamu Juda bacisyeede aabo bakali kuyandisya kuyookkalila ku Ijipiti. Boonse bayooloba mu Ijipiti, bayoojaigwa munkondo nikuba kuyoofwa anzala. Kuzwa kubantu buyo kuyoosika kuli baabo balemenede bayoojaigwa munkondo noiba nzala. Bayooba citukizyo aciyoosyo, bayooba cisinganyo acisampuzyo. ¹³ Njoobasubula aabo bakkala mu Ijipiti munkondo, nzala acuumo, mbubonya mbuli mbundakasubula bamu Jelusalemu. ¹⁴ Taakwe naba omwe wabaabo basyeede bamu Juda aabo bakainka kuyookkala mu Ijipiti uuyootija nokuba kusyaala kuti akapiluke kucisi ca Juda, ooko nkobasukeme. Taakwe uuyoopiluka ccita buyo aabo batijide bace.”

¹⁵ Mpawo baalumi boonse bakazi kuti bakaintu babo bakali kutentela baleza bambi tununkilizyo, kubikkilizya abakaintu boonse bakaliwo, yakali mbungano mpati, antoomwe abantu boonse bakali kukkala kunselelo akutala lya Ijipiti amu Patilosi bakati kuli Jelemiya, ¹⁶ “Tatukooswiilila makani aayo ngootukananina muzina lya Mwami Leza! ¹⁷ Kasimpe swebo tulacita buyo eezyo zyoonse nzitwaamba kuti tuyoozicita. Tuyootentela mwami mukaintu wakujulu tununkilizyo akuyoomupa zituuzyo zyazyakunywa, mbubonya mbuli ndiswe abasikale besu, bami abalupati-pati besu mbubakali kucita muminzi yamu Juda amumigwagwa yamu Jelusalemu. Kuciindi eeco twakalijisi zinji, twakali kabotu, taakwe cakali kutupenzya pe. ¹⁸ Pele mbutwakalekela buyo kutentela mwami mukaintu wakujulu tununkilizyo akupa zituuzyo zyazyakunywa kulinguwe, taacikwe ancotucijisi, alimwi twalobezegwa munkondo anzala.”

¹⁹ Abalo bakaintu bakayungizya akuti, “Ciindi eeco nitwakali kutentela mwami mukaintu wakujulu tununkilizyo akupa zituuzyo zyazyakunywa, sena baalumi besu tiibakazi kuti twakali kumucitila zinkwa mucikozyanyo cakwe akumupa zipaizyo azyazyakunywa?”

²⁰ Mpawo Jelemiya wakati kubantu boonse, baalumi abakaintu aabo bakali kumwiingula, ²¹ “Sena Mwami Leza tayeeyede akuziba zyatununkilizyo twakali kutentwa muminzi yamu Juda amumigwagwa ya Jelusalemu ooto nywebo abasikale banu, bami abalupati-pati banu abantu bamucisi ntumwakali kupa? ²² Mwami Leza naakaleka kuyumina milimo yanu mibi azintu zisesemya nzimwakali kucita, cisi canu cakaba citukizyo, cakaba tongo, kacinyina bantu mbuli mbocibede sunu. ²³ Lino akaambo kakuti mwakatenta tununkilizyo akubisizya Mwami Leza, tiimwakamuswiilila nikuba kutobela mulawo wakwe noziba mbeta naaba malailile aakwe, ncenciceeco mapenzi aaya ncaamusikila mbubonya mbuli mbomwaabwene sunu.”

²⁴ Mpawo Jelemiya wakati kubantu boonse kubikkilizya abakaintu, “Amuswiilile majwi aa Mwami Leza nywebo nyoonse nobantu bangu bali mu Ijipiti. ²⁵ Mboobu mbwaamba Mwami Leza Singuzuzyoonse, wa Isilayeli ulati, ‘Nywebo abakaintu banu mwalitondezya kale kwiindila mumilimo yanu kucita ceeco ncomwakasyomezya nimwakati, kasimpe tulacita mbubonya mbuli mbutwakakonkezya kuti tuyootenta tununkilizyo akupa zituuzyo zyazyakunywa kumwami mukaintu wakujulu.’

“Mbubo kamucita mbumwakasyomezya! Amuzuzikizye zikonke zyanu! ²⁶ Pele amuswiilile majwi aa Mwami Leza nywebo nyoonse Nobajuda bakkala mu Ijipiti. Ndakonka muzina lyangu pati, mbwaamba Mwami Leza, Kuti taakwe muntu naba omwe uuzwa ku Juda uukkala kuli koonse mu Ijipiti uyookumbila nikuba kukonkezya muzina lyangu alimwi akwaamba kuti, ‘Mbubonya mbuli Mwami Leza mbwali muumi pe.’ ²⁷ Nkaambo ndilibalangilide kuti ndibacise, kutali kubacitila cibotu. Bajuda mu Ijipiti bayoolobezegwa munkondo anzala mane kusikila boonse bakanyonyooke. ²⁸ Aabo bayootija munkondo akupilukila kucisi ca Juda kuzwa mu Ijipiti banooli bace. Eelyo Bajuda aabo basyeede aabo bakaboola ku Ijipiti kuti bazookkale bayooziba naa nguni uulaamajwi aayoozuzikizigwa naa ngaangu naa ngaabo. ²⁹ Nceeci ciyooba citondezyo kuti njoomusubula mubusena buno, mbwaamba Mwami Leza, kutegwa mukazibe kuti zisubulo nzindakali kwaamba kuti ziyoomusikila, ziyoocitika ncobeni. ³⁰ Mboobu mbwaamba Mwami Leza ulati, njooaba Falo Hofula mwami wacisi ca Ijipiti kuli basinkondonyina aabo bayanda kumujaya, mbubonya mbuli mbundakaaba Zedekiya mwami wacisi ca Juda kuli Nebukadineza mwami waku Babuloni, sinkondonyina ooyo wakasukamine kumujaya.”