Jelemiya 43

Jelemiya watolwa ku Ijipiti

¹ Lino Jelemiya naakamana kwaambila bantu majwi oonse aa Mwami Leza nkokuti zyoonse eezyo Mwami Leza nzyaakamwaambila kuti abaambile, ² Azaliya mwanaa Hosyaiya a Johanani mwanaa Kaleya antoomwe abaalumi boonse basilutuzi bakati kuli Jelemiya, “Ulabeja. Mwami Leza wesu taakutuma kuti uzooambe kuti, ‘Tamweelede kuunka ku Ijipiti kuti mukakkalile nkuko.’ ³ Tulizi Baluki mwanaa Neliya nguukuyunga-yunga kuti utwaabe ku Bakalodiya kutegwa batujaye nokuba kututola mubwaange ku Babuloni.”

⁴ Nkaako Johanani mwanaa Kaleya abapati babasilumamba boonse antoomwe abantu boonse tiibakaswiilila malailile aa Mwami Leza aakuti kabakkede mucisi ca Juda. ⁵ Aboobo Johanani mwanaa Kaleya antoomwe abapati babasilumamba boonse bakatola bantu bamu Juda boonse aabo basyeede abakapilukide kuti bazookkale mucisi ca Juda kuzwa mumasi oonse oomo mobakamwaikilide. ⁶ Alimwi bakatola baalumi, bakaintu abana kubikkilizya abana basimbi bamwami aabo Nebuzaladani silutwe wabasilumamba mbaakasiilide Gedaliya mwana wa Ahikamu, mwanaa Syafani antoomwe a Jelemiya musinsimi a Baluki mwanaa Neliya. ⁷ Aboobo bakanjila mucisi ca Ijipiti mukutaswiilila Mwami Leza mane mbaabo baakusika ku Taapenesi.

⁸ Kabali mu Taapenesi, majwi aa Mwami Leza akasika kuli Jelemiya akati, ⁹ “Bajuda kabalangilide bweza mabwe mapati, waazikke mubulongo mukkoce lyazitina kumanjililo aaŋanda yabwami ya Falo mu Taapenesi. ¹⁰ Omana ubaambile kuti, mboobu mbwaamba Mwami Leza Singuzuzyoonse, wa Isilayeli ulati, ‘Ndaita mubelesi wangu Nebukadineza mwami waku Babuloni, eelyo njoobikka cuuno cakwe cabwami atala aamabwe aaya ngindazikka, ciluli cabwami bwakwe ciyooabumbilila. ¹¹ Nebukadineza uzoozunda Ijipiti.’ Aboobo beelede kufwa kubulwazi bayoofwa abulwazi, aabo beelede kutolwa mubwaange bayootolwa mubwaange, aabo beelede kufwa bayoofwa munkondo. ¹² Uyootenta maanda aayo aakombelwa baleza bamu Ijipiti, uyootenta maanda aabo aakukombela akuyootola baleza babo mubwaange. Mbubonya mbuli mweembezi mbwaanga cisani cakwe mukopo, mbubonya oobo mbwayookoba akuyoozwa ooko katakwe akacisa. ¹³ Oomo muŋanda yakukombela zuba mu Ijipiti uyoomwayaula mituni akuyootenta maanda aakombelwa baleza bamu Ijipiti.”