Jelemiya 42

Bantu balomba Jelemiya kuti abapailile

¹ Mpawo bapati babasilumamba kubikkilizya a Johanani mwanaa Kaleya antoomwe a Jezaniya mwanaa Hosyaiya kutalikila kubantu buyo boonse kuyoosikila kuli balemenede bakasika ² kuli Jelemiya musinsimi aakuti kulinguwe, “Koswiilila kulomba kwesu ku Mwami, upailile bantu aabo boonse basyeede ku Mwami Leza wako. Nkaambo ulibwene ayebo kuti twakali banji, pele sunu basyeede mbace. ³ Komba ku Mwami Leza wako kuti atwaambile nkotweelede kuunka ancotweelede kucita.”

⁴ Jelemiya musinsimi wakaingula kuti, “Ndamvwa ncomwaamba. Kasimpe ndakomba ku Mwami Leza wanu mbubonya mbuli mbumwakumbila. Ndilamwaambila zyoonse eezyo Mwami Leza nzyati ndaambile, taakwe ncetimusise pe.”

⁵ Mpoonya bakati kuli Jelemiya, “Mwami Leza abe kamboni wakasimpe uusyomeka kulindiswe kuti naa katutaciti kweendelana azeezyo zyoonse Mwami Leza wako nzyakwaambila kuti utwaambile. ⁶ Nokuba kuti zili kabotu naa kazitali kabotu tuyooswiilila Mwami Leza wesu, ncitwakutuma, nkuti zintu zitweendele kabotu, masimpe tuyooswiilila Mwami Leza wesu.”

Mwami Leza mbwaakaingula kukomba kwa Jelemiya

⁷ Nikwakainda mazuba aali kkumi majwi aa Mwami Leza akasika kuli Jelemiya. ⁸ Aboobo Jelemiya wakaita Johanani mwanaa Kaleya antoomwe abapati babasilumamba boonse bakali aanguwe, abantu boonse kutalikila kubantu buyo kuyoosika kuli balemenede. ⁹ Wakati kulimbabo, “Mboobu mbwaamba Mwami Leza, wa Isilayeli nkumwakandituma kuti nkaambe kulomba kwanu ulati, ¹⁰ ‘Kuti naa mukkale mucisi eeci, ndamuyaka nsikoomumwaya, ndamwiimika nsikoomuzyula pe, nkaambo nduuside akaambo kamapenzi aayo ngindakamuletela. ¹¹ Mutabwembwi akaambo kamwami waku Babuloni, ooyo ono ngomuyoowa. Mutamuyoowi mbwaamba Mwami Leza, nkaambo ndili aandinywe, ndamuvuna akumufutula kuzwa kulinguwe. ¹² Mukuti njoomubeda aankumbu awalo uyoomubeda aankumbu akumubukulusya munyika yanu.’”

¹³ Pele kuti naa mwaambe kuti, “Tatukookkala mucisi eeci pe, akutaswiilila Mwami Leza wanu, ¹⁴ alimwi kuti naa mwaambe kuti, ‘Peepe, tulainka tukakkalile ku Ijipiti, ooko nkotutakaboni nkondo, nokuba kumvwa mweembo nokuba kufwa nzala.’ ¹⁵ Nkaako amumvwe majwi aa Mwami Leza nywebo noluzubo lwa Juda lusyeede. Mboobu mbwaamba Mwami Leza Singuzuzyoonse, wa Isilayeli ulati, ‘Kuti naa muzumanane zyakuunka ku Ijipiti kuti mukakkalile nkuko, ¹⁶ nkondo njomuyoowa iyoomujana ooko ayalo nzala njomulibilika iyoomujana mu Ijipiti, nkabela nkomuyoofwida ooko. ¹⁷ Kasimpe boonse aabo bazumanene zyakuya ku Ijipiti kuti bakakkale nkuko bayoojazigwa nkondo, nzala acuumo, taakwe naba omwe wabo uyoosyaala nokuba kutija mapenzi ngendiyoobaletela.’ ¹⁸ Mboobu mbwaamba Mwami Leza Singuzuzyoonse, wa Isilayeli ulati, ‘Mbubonya mbuli bukali akunyema kwangu mbukwakasikila aabo bakali kukkala mu Jelusalemu, mbubonya oobo anywebo bukali bwangu buyoomusikila mwaakuya ku Ijipiti. Muyooba citukanyo aciyoosyo calusinganyo acisampuzyo, tamukapilukili limbi kubusena oobu alimwi pe.’”

¹⁹ Jelemiya wakati, “Nywebo noluzubo lwa Juda lusyeede, Mwami Leza wamwaambila kuti, ‘Mutainki ku Ijipiti. Amuzibe ceeci, ndiyanda kumucenjezya sunu,’ ²⁰ mwakalubizya kapati nimwakandituma ku Mwami Leza wanu akuti, ‘Tukombele ku Mwami Leza wesu, twaambile zyoonse eezyo nzyakwaambila tulazicita.’ ²¹ Ndamwaambila sunu, pele nikuba boobo tamuna muswiilila Mwami Leza wanu muli zyoonse nzyaakandaambila kuti nzoomwaambile. ²² Nkaako lino, amuzibe eeci. Muyoojaigwa munkondo, nzala acuumo mubusena oobo mbomuyanda kuyookkala.”