Jelemiya 38

Jelemiya mbwaakabikkwa mucitelekezezyo

¹ Lino Syefatiya mwanaa Matani, Gedaliya mwanaa Pasyuu, Jukali mwanaa Syelemiya a Pasyuu mwanaa Malikija bakamvwa eeco Jelemiya ncaakali kwaambila bantu naakati, ² “Mboobu mbwaamba Mwami Leza ulati, ‘Kufumbwa ooyo uunookkede mumunzi ooyu ulajaigwa munkondo, nzala acuumo. Pele ooyo uuyoolisisya ku Bakalodiya uyoopona. Takafwi uyoopona.’ ³ Mboobu mbwaamba Mwami Leza ulati, ‘Munzi ooyu uyooabwa ncobeni kumpi yamwami waku Babuloni, walo uyoouzunda.’”

⁴ Mpawo balupati-pati bakati kumwami, “Muntu ooyu weelede kujaigwa. Utyompya basilumamba basyeede mumunzi ooyu antoomwe abantu boonse muzintu eezyo nzyabaambila. Muntu ooyu tayandauli bubotu bwabantu aaba, pele lunyonyooko lwabo.”

⁵ Mwami Zedekiya wakaingula kuti, “Uli mumaanza aanu, nsikonzyi kumulesya nywebo pe.”

⁶ Mpawo bakatola Jelemiya akuyoomubikka mucitelekezezyo ca Malikija mwanaa mwami, cakali mubbuwa lyabalindizi. Bakaselusya Jelemiya mucitelekezezyo eeco amakole, tiicakajisi maanzi, cakali antimba buyo, eelyo Jelemiya wakabbila-bbila muntimba eeyo.

⁷ Pele Ebedimeleki Mukusyi, muzibe wamuŋanda yabwami, wakamvwa kuti Jelemiya wakabikkwa mucitelekezezyo. Mwami naakacikkede amulyango wa Benjamini, ⁸ Ebedimeleki wakazwa kuŋanda yabwami akuyooti kumwami, ⁹ “Omwami simalelo wangu, bantu babisya kapati kuli zyoonse nzibacita kuli Jelemiya musinsimi. Bamuwaalila mucitelekezezyo oomo mwiiyoomujaya nzala, nkaambo kucinyina cakulya mumunzi.”

¹⁰ Mpawo mwami wakalailila Ebedimeleki kuti, “Tolelezya baalumi botatwe mukagwisye Jelemiya musinsimi kuzwa mucitelekezezyo natanafwa.”

¹¹ Eelyo Ebedimeleki wakatolelezya baalumi akuunka kukaanda kacibeela caciyobwedo caŋanda yabwami. Wakabweza zisani zikulumpede azizapaukide kuzwa oomo akuziselusya antoomwe amakole kuya ansi kuli Jelemiya mucitelekezezyo. ¹² Ebedimeleki wakati kuti Jelemiya, “Bikka zisani eezi zikulumpede azizapaukide munkwa kuti makole atakucisi.” Aboobo Jelemiya wakacita oobo, ¹³ eelyo bakamukwela amakole akumugwisya mucitelekezezyo. Nkabela Jelemiya wakakkala mubbuwa lyabalindizi.

Zedekiya mbwaakabuzya-buzya Jelemiya

¹⁴ Mpawo mwami Zedekiya wakatuma kuti Jelemiya musinsimi aletwe kumulyango watatu waŋanda ya Mwami Leza. Mwami wakati kuli Jelemiya, “Ndiyanda kukubuzya cintu cimwi. Utandisisi cili coonse pe.”

¹⁵ Eelyo Jelemiya wakati kuli Zedekiya, “Kuti naa ndakwaambila, sena tokoondijaya? Nikuba kuti nkulailile buti tokoondiswiilila pe.” ¹⁶ Pele mwami Zedekiya wakakonka cakusisikizya kuli Jelemiya akuti, “Mbubonya mbuli Mwami Leza mbwali muumi, ooyo wakatupa buumi, nsikookujaya nikuba kukupa kulibaabo bayandaula buumi bwako.” ¹⁷ Aawo Jelemiya wakati kuli Zedekiya, “Mboobu mbwaamba Mwami Leza Singuzu zyoonse, Leza Waisilayeli ulati, ‘Naa ulipe kuli balupati-pati bamwami waku Babuloni, tokoofwa awalo munzi ooyu tuuti tentwe pe. Yebo abaŋanda yako mulapona. ¹⁸ Pele kuti utalipi kuli balupati-pati bamwami waku Babuloni, munzi ooyu ulaabwa kuli baku Babuloni alimwi baluuumpa, yebo lwako totibatije.’”

¹⁹ Mwami Zedekiya wakati kuli Jelemiya, “Njoowede Bajuda bakainka kale kuba Babuloni, cimwi ciindi Bababuloni bandipe kuli mbabo nkabela inga bandigutaika.” ²⁰ Jelemiya wakati, “Tabati kwaabe kulimbabo pe, swiilila Mwami Leza ucite mbwaakwaambila. Ocita boobo zilakweendela kabotu zintu, alimwi totifwe pe. ²¹ Pele kuti ukake kulipa kuli mbabo, nceeci ncaakuyubwinida Mwami Leza. ²² Boonse bamakaintu basyeede muŋanda yabwami Bwajuda bayooletwa kuli balupati-pati bamwami waku Babuloni. Aabo bakaintu bayooti kuli nduwe,

‘Bakakusowa akukuzunda

aabo beenzinyoko mbosyoma.

Mpaawa zituta zyako zyabbila mbombombombo muntimba,

mbali beenzinyoko bakuloboka.’

²³ Bakaintu bako boonse abana bayoogwisigwa akuletwa kuba Babuloni. Yebo lwako totikabatije, uyoojatwa amwami waku Babuloni, kwaamba munzi ooyu awalo uyooumpwa.” ²⁴ Aawo Zedekiya wakati kuli Jelemiya, “Kutabi muntu naba omwe ngoambila nzitwali kwaamba pe, naa ucite oobo ulafwa. ²⁵ Kuti balupati-pati bangu bazibe kuti ndali kwaamba anduwe, bamana baboole kulinduwe kuzooti, ‘Twaambile ncooambila mwami ancaakwaambila mwami.’ ²⁶ Yebo ubaingule kuti ndali kukombelezya mwami kuti atandipilusyi kuŋanda ya Jonatani kuti nkafwide nkuko pe.”

²⁷ Balupati-pati boonse bakaboola kuli Jelemiya akumubuzya, eelyo wakabaambila zyoonse eezyo mwami nzyaakamulailila kuti aambe. Kumane taakwe ncibakaamba kulinguwe, nkaambo taakwe wakamvwide mubandi ngwaakajisi amwami.

²⁸ Jelemiya wakakkala mubbuwa lyabalindizi mane kusikila mubuzuba munzi wa Jelusalemu nuwakazundwa.