Jelemiya 37
Jelemiya mbwaakaangwa
1 Lino Zedekiya mwanaa Josiya wakabikkwa mubwami a Nebukadineza mwami waku Babuloni, nguwakalela mubusena bwa Jehoyiyakini mwanaa Jehoiyakimu. 2 Walo nobaba batwanga bakwe nobaba bantu bamucisi tiibakaswiilila majwi Mwami Leza ngaakaamba kwiindila muli Jelemiya musinsimi.
3 Pele mwami Zedekiya wakatuma Jehukali mwanaa Syelemiya a Zefaniya mupaizi mwanaa Maaseiya kuli Jelemiya musinsimi amakani aakuti, “Tukombele ku Mwami Leza wesu.” 4 Ciindi eeci Jelemiya wakali kukonzya kweendeenda akati kabantu, nkaambo taakanabikkwa muntolongo. 5 Eelyo impi ya Falo yakazwa mu Ijipiti. Lino Bakalodiya bakasinkilizizye munzi wa Jelusalemu nibakamvwa zyambabo, bakazwa ku Jelusalemu.
6 Mpawo majwi aa Mwami Leza akasikila Jelemiya musinsimi akati, 7 “Mboobu mbwaamba Mwami Leza wa Isilayeli ulati, ‘Ambila mwami wacisi ca Juda wakutuma kuti uzoobuzye kulindime kuti, impi yaboola kuzookugwasya ilapilukila kunyika yayo, ku Ijipiti. 8 Eelyo Bakalodiya bayoopilukila kuti bazoolwane munzi ooyu, bazoouzunda akuutenta.’”
9 Mboobu mbwaamba Mwami Leza ulati, “Mutalicengi mukuyeeya kuti, ‘Bakalodiya balatuleka.’ Tabakoomuleka pe! 10 Nikuba kuti impi ya Bakalodiya eeyo iimulwana kamwiizunda, kakusyaala buyo baalumi bayasidwe mumatente, aabo bali kunooboola akuzootenta munzi ooyu.”
11 Lino impi ya Bakalodiya niyakazwa ku Jelusalemu akaambo kampi ya Falo, 12 awalo Jelemiya wakazwa mumunzi kuti aye kucisi ca Benjamini kuti akapegwe caabilo cakwe akati kabantu ooko. 13 Pele naakaakusika ku Mulyango wa Benjamini mupati wabalindizi wakali kutegwa Ilija mwanaa Syelemiya, mwanaa Hananiya, wakamwaanga akuti, “Utijila ku Bakalodiya!”
14 Jelemiya wakati, “Peepe, tanditijili ku Bakalodiya pe.” Pele Ilija taakaswiilila, wakaanga Jelemiya akumuleta kuli balupati-pati. 15 Balupati-pati aaba bakanyemena Jelemiya bamuuma, bamwaanga akumubikka muŋanda ya Jonatani mulembi, eeyo njibakacita ntolongo.
16 Jelemiya wakabikkwa mukaanda kaansi mumulindi, ooko nkwaakakkala kwaciindi cilamfu. 17 Mpawo mwami Zedekiya wakamwiita eelyo wakaletwa kuŋanda yabwami, ooko wakamubuzya-buzya kumbali kuti, “Sena kuli majwi aazwa ku Mwami Leza?”
Jelemiya wakaingula kuti, “Iiyi, ulaabwa kumwami waku Babuloni.”
18 Mpoonya Jelemiya wakaambila mwami Zedekiya kuti, “Ino mulandu nzi ngundakacita kulinduwe nokuba kuli balupati-pati bako naa kubantu aaba cakuti wakandibikka muntolongo? 19 Ino bali kuli basinsimi bako bakakusinsimina kuti mwami waku Babuloni takooyooboola kuti azookulwane nociba cisi eeci? 20 Pele ono swiilila omwami simalelo wangu. Andilikombelezezye kulinduwe. Utanditumini kuŋanda ya Jonatani mulembi pe, nkaambo inga ndaba nenjoofwa kuya.” 21 Mpawo mwami Zedekiya wakalailila kuti Jelemiya abikkwe mubbuwa lyabalindizi, akuti kapegwa zyakulya kuzwa kumugwagwa wabasikulanga buzuba abuzuba mane kusikila zinkwa zikamane mumunzi. Mbombubo oobu Jelemiya mbwaakakkala mubbuwa lyabalindizi.