Jelemiya 36

Baluki mbwaakabala bbuku muŋanda ya Leza

¹ Mumwaka wane wakulela kwa Jehoiyakimu mwanaa Josiya mwami wacisi ca Juda, majwi akasika kuli Jelemiya kuzwa ku Mwami Leza alati, ² “Bweza bbuku ulembe majwi oonse ngindakwaambila aaamba zyacisi ca Isilayeli, ca Juda amisyobo imwi yoonse kuzwa ciindi nindakatalika kukanana kulinduwe kakucilela Josiya kusikila sunu. ³ Ambweni bantu bamu Juda bamvwa zyamapenzi oonse ngendiyeeya kubaletela, inga umwi aumwi wasiya nzila yakwe mbi eelyo inga ndabalekelela bubi azinyonyoono zyabo.”

⁴ Mpawo Jelemiya wakaita Baluki mwanaa Neliya. Jelemiya wakaamba majwi aa Mwami Leza kuli Baluki, aawo Baluki wakaalemba mubbuku. ⁵ Mpoonya Jelemiya wakaambila Baluki kuti, “Mebo ndakasigwa kweendeenda, nsikonzyi kuunka kuŋanda ya Mwami Leza pe. ⁶ Aboobo yebo ukainke kuŋanda ya Mwami Leza mubuzuba bwakuliimya kulya, kwamana ukababalile majwi aa Mwami Leza kuzwa mubbuku eeli ngoolemba ciindi nindali kwaamba. Ukaabalile bantu bamu Juda boonse aabo baboola kuzwa muminzi yabo. ⁷ Ambweni inga bazoolikombelezya ku Mwami Leza, kuti umwi aumwi asiye nzila zyakwe zibi, nkaambo mbupati bukali oobo Mwami Leza mbwanyemenede bantu aaba.”

⁸ Lino Baluki mwanaa Neliya wakacita zintu zyoonse eezyo Jelemiya musinsimi nzyaakamwaambila kuti acite. Wakabala majwi aa Mwami Leza aakalembedwe mubbuku kuŋanda ya Mwami Leza. ⁹ Mumwezi wafuka, mumwaka wasanu wakulela kwa Jehoiyakimu mwanaa Josiya mwami wacisi ca Juda, bantu boonse bamu Jelusalemu abaabo bakaboolede ku Jelusalemu kuzwa kuminzi yamucisi ca Juda bakabikka ciindi cakuliimya kulya ku Mwami Leza. ¹⁰ Mpawo bantu boonse kabamvwide, Baluki wakabala majwi aa Jelemiya kuzwa mubbuku muŋanda ya Mwami Leza, mukaanda ka Gemaliya mwanaa Syafani mulembi, kakali mujulu kumanjililo aamulyango mupya waŋanda ya Mwami Leza.

Balupati-pati mbubakabalilwa bbuku

¹¹ Ciindi Mikaiya mwanaa Gemaliya mwanaa Syafani, naakamvwa majwi oonse aa Mwami Leza kuzwa mubbuku eelyo, ¹² wakainka kukaanda kamulembi kuŋanda yabwami ooko kwakakkede balupati-pati boonse, ba Elisyama mulembi, Delaiya mwanaa Syemaiya, Elinatani mwana wa Akiboo, Gemaliya mwanaa Syafani, Zedekiya mwanaa Hananiya abalupati-pati bamwi boonse. ¹³ Lino Mikaiya naakamana kubaambila zyoonse eezyo nzyaakamvwa Baluki kabalila bantu kuzwa mubbuku, ¹⁴ balupati-pati boonse bakatuma Jehudi mwanaa Netaniya mwanaa Syelemiya, mwanaa kusyi, kuti akaambile Baluki kuti, “Boola uletelezye abbuku eelyo ndyooli kubalila bantu.” Aboobo Baluki mwanaa Neliya wakainka kulimbabo kajisi abbuku eelyo. ¹⁵ Bakati kulinguwe, “Nkoo kkala musa, utubalile.” Aawo Baluki wakababalila. ¹⁶ Nibakamvwa majwi aayo oonse, bakalangana kumeso cakuyoowa akuti kuli Baluki, “Tweelede kwaambila mwami aaya oonse.” ¹⁷ Mpawo bakabuzya Baluki kuti, “Kotwaambila, ino waalemba-lemba buti majwi aaya oonse? Sena ngu Jelemiya waaamba?”

¹⁸ Baluki wakaingula kuti, “Iiyi, nguwandaambila majwi aaya oonse ngindalemba, nkabela ndaalemba mubbuku ainki.”

¹⁹ Mpawo balupati-pati bakati kuli Baluki, “Yebo a Jelemiya kamuya mukayube. Taakwe muntu weelede kuziba mpomunoobede pe.”

Mwami Jehoiyakimu mbwaakatenta bbuku

²⁰ Lino nibakamana kubikka bbuku mukaanda ka Elisyama mulembi, bakainka kumwami mubbuwa akuyoomwaambila zintu zyoonse. ²¹ Mwami wakatuma Jehudi kuti akalete bbuku, eelyo Jehudi wakalyeeta kuzwa mukaanda ka Elisyama mulembi akulibalila mwami abalupati-pati aabo bakaimvwi munsi lyakwe. ²² Wakali mwezi wafuka mwami naakakkede mukaanda kamupeyo, kakuyaka mulilo acikko kumbele lyakwe. ²³ Kwali kunga Jehudi amana buyo kubala mapepa otatwe naa one mwami wakali kwaatenda akamesi kamulembi akwaasowela mucikko, mane kusikila bbuku lyoonse nilyakatentwa mumulilo. ²⁴ Mwami abatwanga bakwe boonse bakamvwa majwi aaya tiibakayoowa pe, nokuba kuzapaula zisani zyabo. ²⁵ Nikuba kuti ba Elinatani, Delaiya a Gemaliya bakakumbila mwami kuti atatenti bbuku, taakwe naakabaswiilila pe. ²⁶ Pele mwami wakalailila Jelameeli mwanaa mwami, Selaiya mwana wa Aziliyeli a Syelemiya mwana wa Abudeeli kuti baange Baluki mulembi a Jelemiya musinsimi. Pele Mwami Leza wakali basiside.

Jelemiya mbwaakalemba bbuku limbi

²⁷ Lino mwami naakamana kutenta bbuku eelyo lyakajisi majwi aayo Baluki ngaakalembede kaambilwa a Jelemiya, majwi aa Mwami Leza akasika kuli Jelemiya akuti, ²⁸ “Bweza bbuku limbi ulembe mulindilyo majwi oonse aayo aakali muli lyakusaanguna, eelyo Jehoiyakimu mwami wacisi ca Juda ndyaakatenta. ²⁹ Umwaambile a Jehoiyakimu mwami wamu Juda kuti mboobu mbwaamba Mwami Leza ulati, ‘Wakatenta bbuku liya akuti, nkaambo nzi nookalemba mulindilyo kuti mwami waku Babuloni uyooboola ncobeni akuzoonyonyoona cisi eeci akujaya bantu abanyama bali muli ncico?’” ³⁰ Nkaako mboobu mbwaamba Mwami Leza azya Jehoiyakimu mwami wacisi ca Juda ulati, “Taakwe naba omwe ngwayoosiya uuyookkala acuuno cabwami bwa Devedi, mutumba wakwe uyoosoowegwa sikati, uyoobalwa zuba, masiku uyoowidwa mume. ³¹ Ndiyoomusubula abana bakwe abatwanga bakwe akaambo kabubi bwakwe. Njoobaletela balo abaabo bakkala mu Jelusalemu abantu bamucisi ca Juda mapenzi oonse aaya ngindakaamba kuti njoobaletela, nkaambo tiibakaswiilila pe.”

³² Nkaako Jelemiya wakabweza bbuku limbi akulipa kuli Baluki mulembi mwanaa Neliya. Lino Jelemiya naakali kwaamba majwi, Baluki wakali kwaalemba. Wakaalemba majwi oonse aabbuku lyakusaanguna eelyo Jehoiyakimu mwami wacisi ca Juda ndyaakatenta mumulilo. Nkabela majwi manji aaelene akayungizigwa kulingawo.