Jelemiya 35

Jelemiya abaluzubo lwa Lekabu

¹ Ngoonya majwi aakasika kuli Jelemiya kuzwa ku Mwami Leza mumazuba aakulela kwa Jehoiyakimu mwanaa Josiya mwami wacisi ca Juda akati, ² “Koya kuli bamukwasyi wa Lekabu ubatambe baboole muli kamwi kaanda kali mumbali aaŋanda ya Mwami Leza, ubape waini banywe.”

³ Eelyo ndakainka kuyooleta Jaazaniya mwanaa Jelemiya, mwanaa Habaziniya abana bokwabo abana bakwe balombe boonse, aboonse bamukwasyi wa Balekabu. ⁴ Ndakabanjizya muŋanda ya Mwami Leza, mukaanda kabana ba Hanani mwana wa Igidaliya muntu wa Leza. Kakalibambene akaanda kabalupati-pati, kali ajulu akaanda ka Maaseiya mwanaa Syalumu mulindizi waamulyango. ⁵ Mpoonya ndakabikka mitiba yakazwide waini ankomeki kumbele lyabantu bamukwasyi wa Lekabu akuti kulimbabo, “Amunywe tuwaini.”

⁶ Pele balo bakaingula kuti, “Swebo tatunywi pe, nkaambo sikale wesu Jonadabu mwanaa Lekabu wakatulailila kuti, ‘Nywebo abalunyungu lwanu tamweelede kuyoonywa waini.’ ⁷ Alimwi tamweelede kuyooyaka maanda nokuba kusyanga nokuba kuzikkila myuunda yamisaansa, taakwe nomweelede kuyooba azintu eezi pe, pele lyoonse mweelede kunooyookkala mumatente. Ndendilyo nomuyooongola munyika eeyo momuli basimutuntuli.” ⁸ Tulabamba zyoonse eezyo sikale wesu Jonadabu mwanaa Lekabu nzyaakatulailila. Swebo nobaba bakaintu besu naa bana besu balombe abasimbi tatunanywide waini, ⁹ nokuba kuyaka maanda aakukkalila, nokuba kuba amyuunda yamisaansa, myuunda noziba zisyango. ¹⁰ Tukkala buyo mumatente alimwi tulabambisya zyoonse eezyo sikale wesu Jonadabu nzyaakatulailila. ¹¹ Pele ciindi Nebukadineza mwami waku Babuloni naakazoosaala cisi eeci, twakati, “Atutijile ku Jelusalemu kuti tufutuke ku Bakalodiya aaba Baalamu. Nkankakaako ncotucili mu Jelusalemu.”

¹² Mpawo majwi aa Mwami Leza akasika kuli Jelemiya, akuti, ¹³ “Mboobu mbwaamba Mwami Leza Singuzuzyoonse, wa Isilayeli ulati, Koya ukaambile bantu bamucisi ca Juda abantu bamu Jelusalemu kuti, ‘Sena tamukonzyi kwiiya ciiyo akuswiilila majwi aangu? Mbwaamba Mwami Leza.’ ¹⁴ Jonadabu mwanaa Lekabu wakaambila bamukwasyi wakwe kuti kabatanywi waini, nkabela bakaatobela malailile aaya. Kusikila sunu tabanywi waini pe, nkaambo baswiilila malailile aasikale wabo. Pele mebo ndakaambaula kulindinywe kanji-kanji, nikuba boobo tamundiswiilili pe. ¹⁵ Kanji-kanji ndakatuma babelesi bangu basinsimi kulindinywe. Bakamwaambila kuti, ‘Umwi aumwi wanu asiye nzila zyakwe zibi, milimo yanu ibote, mutanootobeli baleza bambi kuti mubamanine milimo pe. Ndendilyo nomuyookkala munyika njindakamupa abasikale banu.’ Pele taakwe nimwakateya matwi aanu nokuba kuswiilila. ¹⁶ ‘Balunyungu lwa Jonadabu mwanaa Lekabu bakatobela malailile aayo sikale wabo ngaakabapa, pele bantu aaba tabandiswiilili pe.’”

¹⁷ Nkaako mboobu mbwaamba Mwami Leza Singuzuzyoonse wa Isilayeli ulati, “Swiilila, ndiyanda kuletela bantu bamu Juda abaabo boonse bakkala mu Jelusalemu mapenzi aayo ngindakaamba kuti ayoobasikila. Ndakakanana kulimbabo, pele tiibakaswiilila, ndakabaita pele taakwe nibakaingula pe.”

¹⁸ Mpoonya Jelemiya wakati kuli bamukwasyi wa Lekabu, “Mboobu mbwaamba Mwami Leza Singuzuzyoonse wa Isilayeli, ulati, ‘Mwakaswiilila malailile aasikale wanu Jonadabu akutobela malailile aakwe oonse, akucita zintu zyoonse eezyo nzyaakaamba.’ ¹⁹ Nkaako mboobu mbwaamba Mwami Leza Singuzuzyoonse, wa Isilayeli ulati ‘Mwaalumi wamukwasyi wa Jonadabu mwanaa Lekabu unooyoondibelekela lyoonse.’”