Jelemiya 34
Zedekiya mbwaakacenjezegwa
1 Lino Nebukadineza mwami waku Babuloni antoomwe abasilumamba bakwe boonse abantu boonse bali mumasi aayo ngalela kabalwana munzi wa Jelusalemu atunzi twawo tuuzingulukide, majwi aaya akasika kuli Jelemiya kuzwa ku Mwami Leza akati, 2 “Mboobu mbwaamba Mwami Leza, wa Isilayeli ulati, ‘Koya kuli Zedekiya mwami wacisi ca Juda’ ukati kulinguwe, mboobu mbwaamba Mwami Leza ulati, ‘Ndiyanda kwaaba munzi ooyu kumwami waku Babuloni, nkabela uyooutenta. 3 Tokooyookonzya kumutija, pele kasimpe uyoojatwa akwaabwa kulinguwe. Uyoomubona mwami waku Babuloni ameso aako, muyookanana mulomo mpande. Yebo uyootolwa ku Babuloni.’
4 “Nikuba boobo komvwa cisyomezyo ca Mwami Leza, yebo Zedekiya mwami wacisi ca Juda. Mboobu mbwaamba Mwami Leza kwaamba zyanduwe ulati, ‘Yebo tokooyoojaigwa munkondo, 5 uyoofwa lufuŋanda. Mbubonya mbuli bantu mbubakali kukunka mulilo wadilwe mukulemeka basikale bako, bami aabo bakakusaangunina, mbubonya oobo mbobayookunka mulilo mukukulemeka akuyookulila kuti, maawe osimalelo wesu!’ Mebo nde Mwami Leza ndime ndaamba cisyomezyo eeci. Mbwaamba Mwami Leza.”
6 Mpawo Jelemiya musinsimi wakaambila Zedekiya mwami wacisi ca Juda makani oonse aaya mu Jelusalemu, 7 ciindi basilumamba bamwami waku Babuloni nibakali kulwana munzi wa Jelusalemu, aminzi imwi yacisi ca Juda eeyo yakacili kukwabilila minzi ya Lakisyi a Azeka. Eeyi njeminzi ilikke buyo yakakwabililidwe mu Juda.
8 Mpawo kwakasika majwi kuli Jelemiya kuzwa ku Mwami Leza, ciindi mwami Zedekiya naakamana kupanga cizuminano abantu boonse bamu Jelusalemu, kuti kwaambilizigwe kwaangununwa kwabazike. 9 Muntu uuli woonse weelede kwaangununa Bahibulunyina bazike, baalumi abakaintu boonse, taakwe wakeelede kucita Mujudanyina buzike pe. 10 Aboobo balupati-pati boonse abantu aabo baalumi abakaintu, taakwe naba omwe uunoojisi muzike. Bakazumina akubaangununa. 11 Pele kabe kaindi bakacinca mizeezo yabo akuboozya bazike babo mbibakaangunwide babacita bazike alimwi.
12 Mpawo majwi aa Mwami Leza akasika kuli Jelemiya akuti, 13 “Mboobu mbwaamba Mwami Leza, wa Isilayeli ulati, ‘Ndakapanga cizuminano abasikale banu ciindi nindakabagwisya mu Ijipiti, kuzwa munyika yabuzike.’ Ndakati, 14 ‘Mumwaka woonse waciloba, umwi aumwi wanu weelede kwaangununa Muhibulunyina ooyo wakalisisya kulinguwe. Amana kukubelekela kwamyaka iili cisambomwe weelede kumwaangununa, nikuba boobo basikale banu tiibakandiswiilila nokuba kuteya matwi aabo kulindime.’ 15 Mazuba aamana aaya mwakeempa, akucita ziluleme kumbele lyangu. Umwi aumwi wanu wakaambilizya zyalwaangunuko lwabasicisinyina. Mwakapanga cizuminano kumbele lyangu muŋanda eeyo iitwa zina lyangu. 16 Pele ono mwasandula mizeezo akusampaula zina lyangu, umwi aumwi waboozya bazike bakwe baalumi abakaintu aabo mbimwakaangunwide kuti bainke kuli koonse ooko nkobayanda. Mwabasungilizya kuti babe bazike banu alimwi.”
17 Nkaako mboobu mbwaamba Mwami Leza ulati, “Tiimwakandiswiilila, tiimwakaambilizya kuti basicisinyoko baangununwe. Aboobo lino mebo ndaambilizya lwaangunuko, mbwaamba Mwami Leza, lwaangunuko lwakuti mujaigwe munkondo, cuumo, anzala. Njoocita kuti mube cisesemyo kumalelo aansi aano. 18 Bantu aabo bakatyola cizuminano cangu akutazuzikizya majwi aacizuminano eeco ncibakapanga, njoobacita mbuli moombe ngubakosoola zipaanzi zyobilo bamana beenda akati kazipaanzi eezyo. 19 Basololi bamu Juda amu Jelusalemu, bazibe, bapaizi, abantu boonse bamucisi bakainda akati kazipaanzi zyamoombe, 20 njoobaaba kuli basinkondonyina aabo bayanda kubajaya. Mitumba yabo iyooba cilyo cabayuni bamuluuwo abanyama bamusokwe.
21 “Njooaba Zedekiya mwami wacisi ca Juda abalupati-pati bakwe kuli basinkondonyina aabo bayanda kubajaya, kuli basilumamba bamwami waku Babuloni bamulekede. 22 Njoobapa malailile mbwaamba Mwami Leza, eelyo njoobaboozya kumunzi ooyu. Bayooulwana, bayoouzunda akuutenta. Njoonyonyoona minzi yacisi ca Juda kutegwa kutakabi muntu uyookonzya kukkala oomo pe.”