Jelemiya 33
Acimwi cisyomezyo cacileleko
1 Lino Jelemiya kacaangidwe mubbuwa lyabalindizi, majwi aa Mwami Leza akamusikila lwabili akuti, 2 “Mboobu mbwaamba Mwami Leza, walo uuli nguwakalenga julu anyika, ooyo wakiibumba akwiibikka. Mwami Leza ndeziba lyakwe. 3 Ndiita ambebo ndiyookuvuwa akukwaambila zintu zipati eezyo zisisidwe nzyotazi. 4 Oobu mbwaamba Mwami Leza, wa Isilayeli ulati, ‘Kwaamba zyamaanda aabwami aayo aakamwaigwa mukulivuna kuti zibe zitantaala zyakulisinkilizya munkondo. 5 Mukulwana a Bakalodiya, ayoozula mitumba yabantu, ndiyoobajaya mubukali bwangu. Alimwi ndiyoolisisa kumunzi ooyu akaambo kazinyonyoono zyabo.’
6 “Nikuba boobo ndiyoobaletela buumi abuponi. Njoobaponya bantu bangu akubaletela lutangalo, luumuno alukwabililo lunji. 7 Ndiyoopilulusya Bajuda a Baisilayeli kuzwa mubwaange, alimwi ndiyoobacita mbuli mbubakabede kusaanguna. 8 Ndiyoobasalazya kuzibi zyoonse nzibakandicitilide, ndiyoolekelela zibi zyoonse zyakundizangila. 9 Nkabela munzi ooyu ndiyooucita kuti udume, kukondwa, kulemekwa akulumbaizigwa kuli bamisyobo yoonse yaanyika aano, baakumvwa zibotu zyoonse eezyo nzindakacita, bayooyoowa akukankama akaambo kakuzwidilila kunji aluumuno ndweyoobapa.”
10 Mboobu mbwaamba Mwami Leza ulati, “Busena buno muti buli mbuli nkanda iitakwe bantu nibaba banyama bakkala mumo. Balo baliluzi, minzi amigwagwa ya Jelusalemu tiijisi bantu nibaba banyama bakkala mumo.” 11 Kwamana kuyoomvwigwa kuyobeka kwakukondwa akutangala kwabaabo basekelela, nabwiinga asibwiinga. Muyoomvwa bantu kabaimba nibayooleta zipaizyo kuŋanda ya Mwami Leza banooti,
“Amulumbe Mwami Leza Singuzuzyoonse,
nkaambo Mwami Leza Mmubotu,
luyando lwakwe talumani.
Ndiyoobapilusizya coolwe kumazuba aaboola, mbubonya mbuli mbubakabede kaindi.” Mbwaamba Mwami Leza.
12 Mboobu mbwaamba Mwami Leza Singuzuzyoonse ulati, “Mubusena oobu butakwe bantu nibaba banyama, muminzi yabo muyooba macelelo abeembezi akulyookezya amatanga aabo. 13 Muminzi yanyika yatulundu-lundu, kumbo kunselelo aazilundu alimwi aku Negevu kumusanza mucisi ca Benjamini, muminzi iizingulukide Jelusalemu, muminzi ya Juda, matanga ayoobalwa asikubala.
14 “Mazuba ayoosika, mbwaamba Mwami Leza, eelyo neyoozuzikizya cisyomezyo cangu, eeco ncindakasyomezya Baisilayeli a Bajuda. 15 Mumazuba aayo kwaciindi eeco ndiyoosala omwe kuba mwami uululeme akati kabaciinga ca Devedi. Mwami ooyo uyoocita ziluleme akweendelezya kabotu.” 16 Mumazuba aayo Juda uyoonunuka, a Jelusalemu uyoolikkalila kabotu. Ndeeli zina ndyayooitwa, “Mwami Leza wesu mbululami bwesu. 17 Mboobu mbwaamba Mwami Leza ulati, ‘Devedi takabuli muntu wakukkala acuuno cabulemu cabwami akati kabaluzubo lwa Isilayeli, 18 nibaba bapaizi aabo bali Mbalevi, nikuba kubula muntu uutinooima lyoonse kupa zipaizyo zyakutenta, kutenta zipaizyo zyamaila akupa zituuzyo.’”
19 Ijwi lya Mwami Leza lyakasika kuli Jelemiya akuti, 20 “Ndakabikka cizuminano cangu akati kabuzuba abusiku cakuti buzuba abusiku zitobele ziindi zyazyo. 21 Mbubonya oobo mbocibede cizuminano ncindakacita amubelesi wangu Devedi tacikatyolwi pe. Lyoonse kunooli waluzubo lwakwe acuuno cabwami. 22 Ndiyoovuzya lunyungu lwa Devedi mubelesi wangu abapaizi bamusyobo wa Levi, bandibelekela cakuti tabakabaliki, mbubonya mbozitabaliki nyenyezi naa musenga wakunkomwe yalwizi. 23 Ijwi lya Mwami Leza lyakasika kuli Jelemiya akuti, 24 Sena wabamvwa aaba mbobaamba balati, ‘Mwami Leza wakaka mikwasyi yobilo eeyi njaakasala? Nkaako basampula bantu bangu kuti tuucili musyobo uulemekwa.’ 25 Mbwaamba Mwami Leza, majwi aakwe ati, ‘Nindatakaanza cizuminano cangu akati kabuzuba akubikka milawo yeenzya zyakujulu azyaansi, 26 nikwali kunga ndakaka balunyungu lwa Jakobo a Devedi mubelesi wangu. Kwamana nindatali kusala umwi wabana bakwe kweendelezya balunyungu lwa Abulahamu, Izaka a Jakobo. Nkaako njoobazwidilizya akubabeda aalweengelelo.’”