Jelemiya 32
Jelemiya mbwaakaula muunda
1 Ngaaya majwi aakasikila Jelemiya kuzwa ku Mwami Leza, mumwaka wakkumi alusele wakulela kwa Zedekiya mwami wa Juda, ooyu wakali ngomwaka wakkumi wakulela kwa Nebukadineza. 2 Basinkondo bamwami waku Babuloni bakasinkilizya Jelusalemu, Jelemiya musinsimi wakalijalilidwe munkuta yaŋanda yabwami. 3 Mwami Zedekiya wakalindaangide, akwaamba kuti, “Nkaambo nzi ncokambauka kuti, Mwami Leza ulati, ‘Ndiyooaba munzi ooyu kumwami waku Babuloni.’ 4 Awalo Mwami Zedekiya uyoojaigwa takafutuki kuzwa kumaanza aa Bakalodiya. Pele walo uyooabwa kumwami waku Babuloni, ngwayoolibonena akwaambaula anguwe lwakwe mwini. 5 Uyootola Zedekiya ku Babuloni, kwalo nkwayookkala kusikila nkamucite. Mbwaamba Mwami Leza. Kuti naa nkalwane Bakalodiya taakwe nayoozwidilila.” Ndime Mwami Leza ndaamba.
6 Jelemiya wakati, “Majwi aa Mwami Leza akandisikila, akati, 7 Hanameli mwanaa Syalumu simizyaako uyooboola amakani aakuti, ‘uule muunda wangu uuli ku Anatoti, nkaambo uli wamukowa, nduwe weelede kuula muunda ooyu.’
8 “Mbubonya mbuli bwakaambide Mwami Leza, Hanameli wakaza akuzoondaambila kuti nduule muunda waku Anatoti munyika ya Benjamini. Mukuti neyookonzya kuunununa kuti ube wangu.” Ndakaziba kuti majwi akazwide ku Mwami Leza ncobeni, 9 mpawo ndakauula muunda kuzwa kuli Hanameli, ansiliva yakali kulema masyekeli aali kkumi aciloba. 10 Ndakalemba makani mubbuku, ndanamatika, ndaita bakamboni, akupima bulemu bwansiliva azyeelekelo. 11 Eelyo ndakabweza lugwalo lwamuulo, lwakalembedwe cizuminano, lulamatidwe alutalamatidwe. 12 Ndimane ndakapa, Baluki mwanaa Neliya mwanaa Mesaiya, lugwalo lwacizuminano kumbele lya Hanameli abakamboni aabo bakalemba cizuminano a Bajuda bakakkede mubbuwa kabali balindizi. 13 Kabalibwenene ndakalailila Baluki kuti, 14 “Mboobu mbwaamba Mwami Leza Singuzuzyoonse wa Isilayeli ulati, ‘Tambula lugwalo oolu, lunamatikidwe alutana, ubikke mucipali cabulongo, kutegwa magwalo aaya akkale ciindi cilamfu.’ 15 Mboobu mbwaamba Mwami Leza Singuzuzyoonse, wa Isilayeli ulati, ‘Maanda amyuunda yamisaansa, ziyooulwa alimwi munyika iino.’”
Mupaili wa Jelemiya
16 Lino ndimane kupa Baluki mwanaa Neliya lugwalo oolu, ndakakomba ku Mwami Leza. 17 “A! Mwami Leza, nduwe wakapanga julu anyika anguzu mpati zyajanza lyako litandabede. Taakwe nociba comwe ciyumu kulinduwe. 18 Ulatondezya luyando kuzyuulu zyabantu, pele ulasubula bana akaambo kazinyonyoono zyamawisi. O Leza mupati Singuzuzyoonse, olaazina lya Mwami Leza Singuzuzyoonse. 19 Mizeezo yako njabusongo, ulabona bantu nzibacita akubalumbula mumicito yabo. 20 Nduwe wakacita zitondezyo azigambya mu Ijipiti, alimwi ucizicita asunu koonse. 21 Wakagwisya bantu bako boonse Baisilayeli boonse kuzwa mu Ijipiti, ajanza lyako lyanguzu wakacita zitondezyo azigambya zyakayoosya basinkondoma. 22 Wakabapa nyika njiyonya iino, njookasyomezya kuli basikale babo, nyika iikunka mukupa abuci. 23 Bakaboola akuzooivuba, pele taakwe nibakaswiilila nikuba kutobela mulawo wako, tiibakacita nzyookabalailila. Ncenciceeco ncookabaletela mapenzi aaya oonse.
24 “Bakalodiya bayaka zitantaala kuzinguluka munzi kuti bautole. Nkondo, nzala, azyuumo ziyoocita kuti munzi ukabe mumaanza aabo. Caba mbubonya mbuli mbookaamba. Masimpe mbubonya oobo. 25 Lino O Mwami nduwe wakandaambila kuti ula muunda, akwiita bakamboni, kuuli munzi waabwa kale mumaanza aa Bakalodiya.”
26 Kumane majwi aa Mwami Leza akasikila Jelemiya akuti, 27 “Ndime Mwami Leza, wabantu boonse. Sena kuli cintu cindikakila? 28 Nkaako mboobu mbwaamba Mwami Leza ulati, ‘Ndiyooaba munzi ooyu ku Bakalodiya kuli Nebukadineza mwami waku Babuloni.’ 29 Bakalodiya bayoolwana munzi ooyu, bayoosika akuutenta, nkabela uyoolota amaanda oonse, ooko bantu nkobakandikalazya nibakali kutenta tununkilizyo aziluli kuli Baali akupa zituuzyo zyazyakunywa kuli baleza bambi. 30 Bantu boonse ba Isilayeli aba Juda bakacita bubi kuzwa kubukubusi bwabo. Baisilayeli bandinyemya, amilimo yamaanza aabo, mbwaamba Mwami Leza. 31 Kuzwa kubuzuba niwakayakwa munzi ooyu kusikila sunu wandikalazya kapati akundinyemya cakuti ndilaumwaya nketacuuboni limbi. 32 Bantu ba Isilayeli aba Juda bakandikalazya kuzibi nzibakacita, bamami babo, balupati-pati, bapaizi, basinsimi abantu bamu Juda abamu Jelusalemu. 33 Bakandifutatila taakwe nibakandilanganya nikuba kuti ndakali kubaiisya lyoonse alyoonse taakwe nibakandiswiilila, nikuba kutambula lulayo lwangu. 34 Bakabikka mituni yabo iisesemya muŋanda iiitwa zina lyangu akwiisofwaazya. 35 Bakayaka zipaililo zya Baali mukkuti lya Benihinomu akupaizya bana babo balombe abasimbi kuli Moleki, nikuba kuti tiindakabatuma, nikuba kuyeeya kuti bacite cisesemyo cili boobu akucita kuti Juda ibisye.”
36 Mboobu mbwaamba Mwami Leza amunzi ooyu ngomuti waabwa kumwami waku Babuloni munkondo, nzala acuumo ulati, 37 “Ncobeni njoobabunganya kuzwa kumanyika ooko nkwindakabamwaisizye mubukali amukunyema kwangu, ndiyoobapilusya kuno, alimwi ndiyoocita kuti bakalikkalile. 38 Bayooba bantu bangu, ambebo ndiyooba Leza wabo. 39 Njoocita kuti kabandiyoowa amoyo omwe, kuti balo abana babo zintu zibeendele kabotu. 40 Ndiyoobamba cizuminano citamani ambabo, nsikaleki kubacitila zibotu, nkabela njoocita kuti kabandiyoowa amyoyo yabo yoonse, kuti batakandifutatili limbi. 41 Ndiyoobotelwa mukubacitila zibotu ndiyoobakkazikka munyika iini cakusyomeka amoyo omwe.” 42 Mboobu mbwaamba Mwami Leza ulati, “Mbubonya mbuli mbundakaletela bantu aaba mapenzi mapati, mbubonya oobo ndiyoocita kuti bakazwidilile mbuli mbundakasyomezya. 43 Kuyooulwa myuunda minji munyika njiyonya njomuti, matongo, tiijisi bantu nibaba banyama nkaambo yaabwa ku Bakalodiya. 44 Myuunda iyooulwa amali aansiliva, aalo magwalo aamyuulo ayoolembwa akunamatikwa kumbele lyabakamboni, munyika ya Benjamini, amuminzi iizingulukide Jelusalemu, muminzi ya Juda, amuminzi yanyika yatulundu-lundu, yakunselelo azilundu akumusanza ku Negevu, nkaambo ndiyoobapilusya kuzwa mubwange. Mbwaamba Mwami Leza.”