Jelemiya 30
Cisyomezyo ca Mwami Leza kubantu bakwe
1 Ngaaya majwi aakasika kuli Jelemiya kuzwa ku Mwami Leza. 2 Mboobu mbwaamba Mwami Leza wa Isilayeli ulati, “Lemba majwi oonse ngindakwaambila mubbuku. 3 Mazuba ayoosika, mbwaamba Mwami Leza, Nenjoopilusya bantu aabo bakatoledwe mubwaange mu Isilayeli amu Juda, akubabikka munyika eeyo njindakapa basikale babo, mbwaamba Mwami Leza.”
4 Aaya ngamajwi Mwami Leza ngaakaamba aajatikizya cisi ca Isilayeli aca Juda.
5 Mboobu mbwaamba Mwami Leza.
“Kulila kwakuyoowa kulalimvwisya, manyongwe aalo taakwe aluumuno.
6 Buzya akubona, sena mwaalumi ulakonzya kutumbuka bana?
Ino nkaambo nzi ncebona mwaalumi wanguzu kabikkide maanza aakwe ada,
mbuli mukaintu wamyongwa?
Masyu oonse akasanduka mbuli muntu uuyanda kufwa.
7 Ino buzuba buyoosya oobu buyooba buti!
Taakwe abomwe buyooba mbuli mbubo.
Ciyooba ciindi camapenzi kuli Jakobo, pele uyoovunwa.
8 “Mubuzuba oobo, mbwaamba Mwami Leza Singuzuzyoonse, Ndiyootyola nsimbi nzyobaangidwe, alimwi njoozapaula zyaanzyo zyabaange, taakwe limbi bamasi nibayoomucita buzike. 9 Mucilawo cabaabo bayoobelekela Mwami Leza wabo, a Devedi mwami wabo, walo ooyo ngweyoosumpula kuti abe mwami wabo.
10 “Nkaako utayoowi, yebo Jakobo omubelesi wangu, utatyompwi, yebo Isilayeli,
mbwaamba Mwami Leza. Masimpe njookuvuna kuzwa kulaale,
balunyungu lwako kuzwa munyika yabwaange balo bayoojana luumuno akukwabililwa, taakwe naba omwe uyoobakonga.
11 Ndili aandinywe alimwi ndiyoomuvuna. Mbwaamba Mwami Leza.
Nikuba kuti ndakanyonyoona misyobo yoonse, mundakamumwaide.
Pele nywebo nsikamunyonyweedi limwi. Njoomulaya buluzi. Alimwi nsikamuleki buyo nketamusubuli.”
12 Mboobu mbwaamba Mwami Leza, “Zilonda zyanu tazisilikiki, zilacisa taziponi.
13 Taakwe naba omwe uukonzya kumukombelezezya,
taakwe musamu uukonzya kusilika, zilonda zyanu zitasilikiki.
14 Boonse bali kulubazu lwanu bakamuluba, tabacikwe lubazu andinywe.
Ndakamuuma mbuli sinkondo, ndakamusubula mbuli silunya,
nkaambo mwakacita milandu mipati, alimwi zinyonyoono zyanu nzinji kapati.
15 Ino mulilaukila nzi azilonda zyanu, akucisa kutakwe busilike?
Nkaambo zyoonse eezi nzyamulandu wanu mupati azinyonyoono zinji!
16 Pele aabo bamunyonyoona bayoonyonyoonwa abalo, boonse basinkondonyoko bayootolwa mubwaange.
Aabo bamusaala abalo bayoosaalwa, abalo bamunyanga zintu ndiyoobanyanga.
17 Pele nywebo ndiyoomupa buumi bubotu, alimwi ndiyooponya zilonda zyanu,
mbwaamba Mwami Leza, nikuba kuti basinkondonyoko balati taakwe uumubamba.
18 “Mboobu mbwaamba Mwami Leza. Njakuboozya bantu bangu kunyika yabo,
alimwi njootondezya luzyalo kumukwasyi omwe-omwe, munzi wa Jelusalemu
uyooyakululwa, aŋanda yabwami iyooyakwa aawo mpuyakabede.
19 Balo bayooimba nyimbo zyakulumba, akuyoba kwalutangalo.
Ndiyoobavuzya tabakaceyi pe, cileleko cabo ciyoobapa kulemekwa.
20 Bana babo bayooba mbuli mbubakali kaindi, bayoolikkalila kumbele lyangu.
Ndiyoobasubula aabo babadyaminina.
21 Musololi wabo uyoozwa akati kabo, muleli wabo uyoosumpulwa kuzwa kulimbabo.
Ndiyoomuleta aafwiifwi, cakuti uyooba aafwiifwi andime, mukuti taakwe uukonzya kuba
aacamba kuti aswene aafwiifwi andime? Mbwaamba Mwami Leza.
22 Nkaako muyooba bantu bangu, ambebo ndiyooba Leza wanu.”
23 Amubone guwo lizwa ku Mwami Leza, liyoobbubbula akuwisya zyoonse, atala aamitwe yabasizibi. 24 Bukali bwa Mwami Leza tabukajokoloki alimwi, mane kusikila akacite zyoonse zili kumoyo wakwe. Mumazuba aaboola muyoozimvwisya eezi.