Jelemiya 29
Lugwalo Jelemiya ndwaakalembela Bajuda bali ku Babuloni
1 Ngaaya majwi aalugwalo Jelemiya musinsimi ndwaakatumya kuzwa ku Jelusalemu, kubapati bamwi aabo bakatoledwe mubwaange, kubasinsimi akubantu boonse Nebukadineza mbaakatolede ku Babuloni kuzwa ku Jelusalemu. 2 Eeci cakacitika ciindi mwami Jehoyiyakini, banyina, bazibe, balupati-pati bamu Juda amu Jelusalemu, babezi abauya kumilimo yamaanza nibakatolwa mubwaange kuzwa ku Jelusalemu. 3 Lugwalo oolu lwakapegwa kuli Elasa mwanaa Syafati a Gemaliya mwanaa Hilikiya, aabo Zedekiya mwami wa Juda mbaakatuma kumwami Nebukadineza ku Babuloni lwakati,
4 “Mboobu mbwaamba Mwami Leza Singuzuzyoonse, wa Isilayeli, waamba kuti kuli baabo boonse bakatolwa mubwaange kuzwa ku Jelusalemu kuya ku Babuloni, 5 Amuyake maanda mukkalilile, mulime myuunda akulya zyabutebuzi bwanu. 6 Mukwate akuzyala bana balombe abasimbi, mukwatile bana banu balombe, alimwi amukwasye bana banu basimbi. Muvule mutaceyi. 7 Amukkale kabotu oomo momuli baange, kuti zintu zyoonse zikamweendele kabotu. Amuukombe Mwami Leza amakani aaceeci, ndendilyo nimunga mwazwidilila. 8 Iiyi oobu mbwaamba Mwami Leza Singuzuzyoonse wa Isilayeli ulati, ‘Mutazumizyi basinsimi abasondi akati kanu kuti bamuunine. 9 Balasinsima zyakubeja muzina lyangu, nsili ndime ndakabatuma. Mbwaamba Mwami Leza. 10 Mboobu mbwaamba Mwami Leza. Myaka iili makumi aali ciloba yaakumana ku Babuloni mbuli mbwindakasyomezya, njoomuyeeya akuzuzikizya cizuminano ncindakasyomezya akumuleta kubusena buno. 11 Nkaambo ndizi kale makanze ngindakamubambila. Mbwaamba Mwami Leza. Makanze oonse ayoozwidilila, alimwi nsikooyoomucisa pe. Makanze aapa lulangilo kumazuba aaboola. 12 Mpoonya muyoondiita akundikomba, ambebo ndiyoomuswiilila. 13 Muyoondilangaula akundijana, kuti naa mukandilangaule amoyo omwe. 14 Njooba aandinywe alimwi njoomupa coolwe, ndiyoomubunganya kuzwa kumisyobo yakumasena ooko nkwindakamutandila, mbwaamba Mwami Leza. Kwamana ndiyoomuleta kuzwa ooko nkwindakamutolede mubwaange.’”
15 Mulakonzya kwaamba kuti, “Mwami Leza nguwakatupa basinsimi mu Babuloni.” 16 Pele mboobu mbwaamba Mwami Leza ulati, “Kumwami ooyu uukkala acuuno cabwami ca Devedi akubantu boonse basyeede mumunzi basicisinyoko batakainka aandinywe mubwaange, 17 Mwami Leza Singuzuzyoonse ulati, ‘Ndiyoobanyonyoona munkondo, nzala acuumo, alimwi njoobacita kuti babe mbuli nkuyu zibolede, muntu nzyatakonzyi kulya. 18 Ncobeni ndiyoobajaya munkondo, nzala acuumo akubaaba kumisyobo imwi yaanyika kuti ibasinganye akubapenzya, ndiyoobakaka alimwi bayooba cisesyo akati kamisyobo eeyo njindakabatandila.’ 19 Nkaambo tiibakaswiilila majwi aangu, mbwaamba Mwami Leza. Majwi aayo ngindakalikubatumina ciindi aciindi kwiindila mubabelesi bangu basinsimi. Anywebo nobaange taakwe nimwakaswiilila, mbwaamba Mwami Leza.”
20 Lino ngaaya majwi aa Mwami Leza, kuli baabo mbaakatuma kuzwa ku Jelusalemu kuya ku Babuloni. 21 Mboobu mbwaamba Mwami Leza Singuzuzyoonse wa Isilayeli ulati, “Kwaamba zya Ahabu mwanaa Kolaiya a Zedekiya mwanaa Maaseiya, basinsimi baamba zyakubeja muzina lyangu, ndiyoobaaba kuli Nebukadineza mwami waku Babuloni, walo uyoobapa cisubulo cakujaigwa kamulibwenene. 22 Nkaambo kaako, boonse aabo baange bazwa mu Juda bali mu Babuloni bayoobelesya lusinganyo oolu. Mwami Leza uyoomucita mbuli mbwaakacita Zedekiya a Ahabu, ooyo mwami waku Babuloni ngwaakatenta mumulilo. 23 Bakali kucita zintu zibyaabi mu Isilayeli, bakacita bumambe ambobabambene limwi, abakaintu basimunzinyina bakaamba zyakubeja kwiindila muzina lyangu, zyalo eezyo nzindatakabaambila kuti bacite. Ndilizi alimwi ndime kamboni wazeezi. Mbwaamba Mwami Leza.”
Lugwalo lwa Syemaiya
24 Ambila Syemaiya Munehelami, kuti 25 “Mboobu mbwaamba Mwami Leza Singuzuzyoonse wa Isilayeli ulati, ‘Mwakatuma magwalo muzina lyanu kubantu boonse bamu Jelusalemu, kuli Zefaniya mwanaa Maaseiya mupaizi, akubapaizi bamwi.’ Mwakati kuli Zefaniya,
26 ‘Mwami Leza nguwakakusala bupaizi mubusena bwa Jehoiyada kuti
ube mulangi waŋanda ya Mwami Leza, mweelede kwaanga kufumbwa muntu uusondokede, uulicita kuti musinsimi.
27 Nkaambo nzi ncimwatakajata Jelemiya kuzwa ku Anatoti, ooyo uuti ngomusinsimi akati kanu? 28 Wakatumya makani aaya kulindiswe mu Babuloni, muyooba mubuzike kwa ciindi cilamfu. Nkaako amuyake maanda akulikkalila, musyange myuunda akulya zyabutebuzi bwanu.’”
29 Zefaniya mupaizi wakabala lugwalo oolu kuli Jelemiya. 30 Kumane ijwi lya Mwami Leza lyakasikila Jelemiya. 31 Akuti, “Tumina makani aaya kubaange ubaambile kuti, mboobu mbwaamba Mwami Leza amakani aa Syemaiya Munehelami. Ulati, ‘Nkaambo Syemaiya wakakusinsimina, kakuli nsili ndime ndakamutuma, amane wakakucita kuti usyome kubeja kwakwe. 32 Mboobu mbwaamba Mwami Leza. Ncobeni njoosubula Syemaiya Munehelami abalunyungu lwakwe. Taakwe naba omwe uuyoosyaala mubantu bakwe, nikuba uuyoobona zintu zibotu nzyeyoocitila bantu bangu, mbwaamba Mwami Leza, nkaambo kakuti wakakambauka zyabuzangi mukulwana ndime.’”