Jelemiya 28

Jelemiya amusinsimi mubeji Hananiya

¹ Mumwezi wasanu mumwaka nguwenya ooyo, mumwaka wane wakulela kwamwami Zedekiya, mwami wacisi ca Juda, Hananiya musinsimi mwana wa Azu, wakali kuzwa ku Gibiyoni, wakati kulindime muŋanda ya Mwami Leza, kumbele lyabapaizi abantu boonse, ² “Mboobu mbwaamba Mwami Leza Singuzuzyoonse, wa Isilayeli ulati, Ndiyootyola joko lyamwami waku Babuloni. ³ Mumyaka yobilo ndiyooleta zintu zyoonse zyamuŋanda ya Mwami Leza, eezyo mwami Nebukadineza waku Babuloni nzyaakagwisizye akuzitola ku Babuloni. ⁴ Alimwi ndiyoopilusya Jehoyiyakini mwanaa Jehoiyakimu mwami wa Juda, abaabo bali mubwaange kuzwa ku Juda aabo bali ku Babuloni. Mbwaamba Mwami Leza. ‘Ndiyootyola joko lyamwami waku Babuloni.’”

⁵ Mpawo Jelemiya wakaingula Hananiya, bapaizi abantu boonse bakaimvwi muŋanda ya Mwami Leza ⁶ wakati, “Akube boobo! Leza acite boobo! Leza azuzikizye majwi aaya ngoosinsima, akuleta zintu zyoonse zyamuŋanda yakwe, abaabo bali mubwaange ku Babuloni. ⁷ Nikuba boobo, koswiilila nzentaambe yebo abantu boonse kabamvwide. ⁸ Kale-kale basinsimi bakasaangunina ndime ayebo bakasinsima zyankondo, mapenzi azyuumo kumasi manji amalelo aawo. ⁹ Pele basinsimi basinsima zyaluumuno bayoozibwa kuti nkasimpe bakatumwa a Mwami Leza, kuti nzibaamba zyakacitika.”

¹⁰ Kumane Hananiya musinsimi wakagwisya joko kuzwa munsingo ya Jelemiya akulityola, waamba bantu boonse kabamvwide kuti, ¹¹ “Mboobu mbwaamba, Mwami Leza ‘Mbubonya mbuli mbundatyola joko mbweyootyola joko lya Nebukadineza mwami waku Babuloni, kuzwa munsingo yamisyobo yoonse mumyaka yobilo.’” Aawo Jelemiya wakaya kwakwe.

¹² Nikwakainda ciindi Hananiya kali wakatyola kale joko kuzwa munsingo yamusinsimi Jelemiya, majwi aa Mwami Leza akasikila Jelemiya akuti, ¹³ “Koya kuli Hananiya ukamwaambile kuti, ‘Mboobu mbwaamba Mwami Leza, wakatyola joko lyacisamu, pele mubusena bwalyo uyoojana joko lyalubulo.’ ¹⁴ Mboobu mbwaamba Mwami Leza Singuzuzyoonse wa Isilayeli ulati, ‘Njoobikka joko lyalubulo munsingo lyamisyobo eeyi, kutegwa bakamanine Nebukadineza mwami wa Babuloni milimo, eelyo bayoomubelekela ncobeni. Ndamana ndiyoomupa bweendelezi bwabanyama.’”

¹⁵ Kumane musinsimi Jelemiya wakati kuli Hananiya, “Swiilila, Hananiya! Mwami Leza tali nguwe wakutuma, kwamana yebo wasungilizya musyobo ooyu mukusyoma zyakubeja. ¹⁶ Nkaako, mboobu mbwaamba Mwami Leza ulati, ‘Ndili aafwiifwi kukugwisya anyika aano. Mwaka nguwenya uuno ulafwa, nkaambo wakakambauka zyakuzangila Mwami Leza.’”

¹⁷ Mumwezi waciloba mwaka nguwenya ooyo, Hananiya musinsimi wakafwa.