Jelemiya 27

Jelemiya mbwaakalivoleka joko

¹ Mumazuba aakusaanguna aakulela kwa Zedekiya mwanaa Josiya mwami wacisi ca Juda, ngaaya majwi aa Mwami Leza aakasikila Jelemiya aakuti, ² “Mboobu Mwami Leza mbwaakandaambila, ‘Panga joko azikkeyi azitolopo ulivoleke munsingo yako.’ ³ Mpoonya utumizye majwi kubami baku Edomu, Mowabu, Amoni, Taya, abaku Sidoni, kwiindila mubatumwa bakaboola ku Jelusalemu kuli Zedekiya mwami wacisi ca Juda. ⁴ Ubape mulumbe ooyu kuti bakape basimalelo babo, mulumbe wakuti, mboobu mbwaamba Mwami Leza Singuzuzyoonse wa Isilayeli ulati, ‘Kamuya mukaambile basimalelo banu,’ ⁵ kuti, ‘Anguzu zyangu mpati ajanza lyangu litandabede ndakapanga nyika abantu bakkala mulinjiyo, abanyama bali mulinjiyo, alimwi ndakaipa kubantu mbenkondelelwa.’ ⁶ Lino ndiyooaba zisi zyanu zyoonse kumubelesi wangu Nebukadineza mwami waku Babuloni, ndiyoocita kuti nobaba banyama bamusokwe akabalele. ⁷ Misyobo yoonse iyoomumanina milimo amwanaakwe amuzyukulu wakwe mulombe, mane kusikila ciindi canyika eeyi cikasike, misyobo minji abami bapati bakazunde.

⁸ “Pele kuti naa musyobo umwi nobuba bwami bumwi butakamumanini milimo Nebukadineza mwami waku Babuloni nikuba kumukotamina, njoosubula musyobo ooyo ankondo, nzala acuumo, mbwaamba Mwami Leza, kusikila nkuunyonyoone kwiindila mulinguwe. ⁹ Nkaako tamweelede kuswiilila basinsimi banu, basondi banu, bapandulula ziloto zyanu, kuli bamukabami naa baŋanga banu aabo bamwaambila kuti, ‘Tamukooyoobelekela mwami waku Babuloni pe.’ ¹⁰ Bamusinsimina zyakubeja eezyo ziyoocita kuti mukagwisigwe akutolwa kulaale kuzwa kunyika yanu, njoomutanda, muyooloba. ¹¹ Pele kuti naa musyobo umwi ukalibombye kumwami waku Babuloni akumumanina milimo, njoouleka musyobo ooyo kuti kuuciyookkede mucisi cawo, kuyoolima akukkala ooko, mbwaamba Mwami Leza.”

¹² Mwami Zedekiya wacisi ca Juda ndakamwaambila makani aaya ngoonya. Ndakati “Libombye kumwami waku Babuloni, mumanine milimo walo abantu bakwe ndendilyo noyoopona. ¹³ Nkaambo nzi yebo abantu bako nomutijaigwe munkondo, nzala acuumo eezyo Mwami Leza nzyakanzide musyobo oonse ooyo uutakooyoomanina milimo mwami waku Babuloni? ¹⁴ Mutanooswiilili majwi aabasinsimi aabo bamwaambila kuti, ‘Tamukooyoobelekela mwami waku Babuloni,’ nkaambo bamusinsimina zyakubeja. ¹⁵ ‘Tiindakabatuma pe.’ Mbwaamba Mwami Leza. ‘Basinsima zyakubeja muzina lyangu. Nkaako njoomutanda eelyo muyooloba abasinsimi aabo bamusinsimina.’”

¹⁶ Mpoonya ndakaambila bapaizi abantu boonse kuti, “Mboobu mbwaamba Mwami Leza ulati, mutanooswiilili majwi aabasinsimi banu aabo bamusinsimina kuti, ‘Zibelesyo zyaŋanda ya Mwami Leza ziyooletwa lino kuzwa ku Babuloni.’ Pele babeja buyo anzyobamusinsimina. ¹⁷ Mutabaswiilili pe, amumanine mwami waku Babuloni milimo kuti mupone. Ino nkaambo nzi munzi ooyu ncuutinyonyoonwe? ¹⁸ Kuti naa basinsimi aabo, bajisi majwi aa Mwami Leza, nkokuti abakombelezye Mwami Leza Singuzuzyoonse kuti zibelesyo eezyo zisyeede muŋanda ya Mwami Leza, zili muŋanda yamwami wa Juda mu Jelusalemu zitatolwi ku Babuloni. ¹⁹ Nkaambo mboobu mbwaamba Mwami Leza Singuzuzyoonse kwaamba zyazicinda, ciziba, ziimino, azimwi zibelesyo eezyo zisyeede mumunzi ooyu, ²⁰ eezyo Nebukadineza mwami waku Babuloni nzyaatakatola ciindi naakatola Jehoyiyakini mwanaa Jehoiyakimu mwami wa Juda mubwaange kuzwa ku Jelusalemu. ²¹ Mboobu mbwaamba Mwami Leza Singuzuzyoonse wa Isilayeli azibelesyo zisyeede muŋanda ya Mwami Leza, zili muŋanda yamwami wacisi ca Juda amu Jelusalemu. ²² Ulati, ‘Ziyootolwa ku Babuloni akukkala ooko mane kusikila buzuba mbwendiyooziyeeya mbwaamba Mwami Leza. Ndendilyo nendiyooziboozya akuzibikka mubusena oobu.’”