Jelemiya 26
Jelemiya mbwaakaletwa kulubeta
1 Mumazuba aakusaanguna aakulela kwa Jehoiyakimu mwanaa Josiya mwami wacisi ca Juda, majwi aa Mwami Leza akasika kaati, 2 “Mboobu mbwaamba Mwami Leza ulati, ‘Ima mubbuwa lyaŋanda ya Mwami Leza, waambile bantu boonse bamuminzi yacisi ca Juda aabo baboola kuzookomba kuŋanda ya Mwami Leza. Baambile zintu zyoonse nzindakulailila, utasotoki majwi naaba buti pe.’ 3 Ambweni inga baba nobaswiilila, eelyo umwi aumwi ulasiya nzila yakwe mbi. Nenga ndaleka kubaletela mapenzi ngindakanzide akaambo kabubi mbobacita. 4 Baambile kuti, mboobu mbwaamba Mwami Leza ulati, ‘Kuti naa kamutandiswiilili akutatobela mulawo wangu, ooyo ngundakamupa, 5 alimwi kuti kamutaswiilili majwi aababelesi bangu basinsimi aabo mbindakali kumutumina kwaziindi zinji, nikuba kuti tiimwakali kubaswiilila. 6 Nkaako ndiyoocita ŋanda eeyi kuti ibe mbuli cakacitika ku Syilo, awalo munzi ooyu uyooba cisinganyo akati kamisyobo yoonse yamunyika.’”
7 Bapaizi, basinsimi abantu boonse bakamumvwa Jelemiya kaamba majwi aaya muŋanda ya Mwami Leza. 8 Lino Jelemiya mbwaakamanina buyo kwaambila bantu boonse zintu zyoonse eezyo Mwami Leza nzyaakamulaililide kuti azyaambe, bapaizi, basinsimi, abantu boonse bakamujata akuti, “Weelede kufwa! 9 Nkaambo nzi nosinsima muzina lya Mwami Leza kuti ŋanda eeyi iyooba mbuli zyakacitika ku Syilo awalo munzi ooyu uyooolwa akusiigwa?” Bantu boonse bakamubumbilila Jelemiya muŋanda ya Mwami Leza.
10 Lino balupati-pati bamu Juda nibakamvwa zintu eezi, bakainka kuzwa kuŋanda yabwami baya kuŋanda ya Mwami Leza baakukkala mumasena aabo kumanjililo aamulyango mupya waŋanda ya Mwami Leza. 11 Mpawo bapaizi abasinsimi bakaambila balupati-pati abantu boonse kuti, “Mwaalumi ooyu weelede kupegwa mulandu walufu, nkaambo wasinsima lunyonyooko lwamunzi ooyu. Mwalimvwida amatwi aanu nobeni!”
12 Mpoonya Jelemiya wakaambila balupati-pati boonse abantu boonse kuti, “Mwami Leza wakandituma kuti ndizoosinsime zyalunyonyooko lwaŋanda amunzi ooyu, alimwi azintu zyoonse nzimwalimvwida. 13 Amuleke nzila zyanu amilimo yanu mibi muswiilile Mwami Leza wanu. Ndendilyo Mwami Leza nayooleka kumuletela mapenzi aaya ngaakamwaambila. 14 Mebo lwangu ndili mumaanza aanu, amundicite kufumbwa mbomuyeeya kuti ncibotu alimwi cililuleme. 15 Pele amuzibe kuti, naa mwandijaya, mulaliletela mulandu wabulowa bwamuntu uunyina mulandu. Mulaliletela nobeni akuletelezya munzi ooyu alimwi abaabo bali mulinguwo. Nkaambo kasimpe Mwami Leza nguwandituma kulindinywe kuti ndizookanane majwi oonse aaya kamumvwide.”
16 Mpawo balupati-pati abantu boonse bakati kubapaizi akubasinsimi, “Mwaalumi ooyu teelede kupegwa mulandu walufu pe! Watwaambila swebo muzina lya Mwami Leza wesu.”
17 Bamwi bapati babantu bakaimina kumbele baambila mbungano yabantu yoonse kuti, 18 “Mika waku Molesyeti wakasinsima mumazuba aa Hezekiya mwami wacisi ca Juda. Wakaambila bantu boonse bamu Juda kuti, ‘Mboobu mbwaamba Mwami Leza Singuzuzyoonse’ wati,
‘Ziyoni uyoolimwa mbuli muunda,
Jelusalemu uyooba citantaala,
kalundu kaŋanda ya Leza
kayooba cilwi cimenede zyoonde.’
19 “Sena Hezekiya mwami wacisi ca Juda naba umwi mu Juda wakamujaya? Sena Hezekiya taakayoowa Mwami Leza akuti amweengelele? Tee kayi Mwami Leza taakaleta mapenzi aayo ngaakabaambilide? Swebo tobeni ndiswe tuyanda kuliletela mapenzi!”
( 20 Kwakali musinsimi umwi Uliya mwanaa Syemaiya uuzwa ku Kiliyatijeyalimu, awalo wakasinsima muzina lya Mwami Leza. Wakasinsima zintu zili mbuli zeezi, amunzi ooyu anyika eeyi mbubonya mbuli bwacita Jelemiya. 21 Mwami Jehoiyakimu abalupati-pati bakwe abeendelezi nibakamvwa majwi aakwe bakayanda kumujaya. Pele Uliya wakaamvwa makanze aayo, aboobo mukuyoowa wakatijila ku Ijipiti. 22 Nikuba boobo Mwami Jehoiyakimu wakatuma Elinatani mwana wa Akiboo ku Ijipiti abamwi bantu. 23 Bakaakuleta Uliya kuzwa ku Ijipiti akumutola kumwami Jehoiyakimu ooyo wakamujazya panga akusowa mubili wakwe mubusena buzikkilwa bantu buyo.)
24 Ahikamu mwanaa Syafani wakagwasilizya Jelemiya aboobo taakaaba Jelemiya kubantu kuti ajaigwe.