Jelemiya 25
Sinkondo uuyoozwa kunyika
1 Majwi aa Leza akasika kuli Jelemiya kwaamba zyabantu boonse bamu Juda mumwaka wane wakulela kwa Jehoiyakimu mwanaa Josiya mwami wacisi ca Juda wakali ngomwaka mutaanzi wakulela kwa Nebukadineza mwami wa Babuloni. 2 Jelemiya musinsimi wakati kubantu boonse bamu Juda abaabo boonse bakali kukkala mu Jelusalemu. 3 Kwamyaka iili makumi obilo aitatu, kuzwa mumwaka wakkumi aitatu wakulela kwa Josiya mwana wa Amoni mwami wacisi ca Juda kusikila sunu buno buzuba, majwi aa Mwami Leza akandisikila nkabela ndakaakanana kulindinywe kwaziindi zinji, pele tiimwakaswiilila. 4 Nikuba kuti Mwami Leza wakamutumina babelesi bakwe boonse basinsimi kwaziindi zinji tiimwakaswiilila nikuba kuteya matwi. 5 Basinsimi aaba bakamwaambila kuti, “Nyoonse amusiye nzila zyanu zibi amilimo yanu mibi, ndendilyo nomukonzya kukkala munyika eeyo Mwami Leza njaakamupa nywebo abasikale banu kwalyoonse alyoonse. 6 Mutanootobeli baleza bambi mukubamanina milimo akubakomba, mutandinyemyi azeezyo nzimwakalipangila nobeni. Ndendilyo nentakamucisi.
7 “Pele tiimwakandiswiilila pe. Mbwaamba Mwami Leza. Mwakandinyemya aazeezyo nzimwakalipangila nobeni, nkaako mwakalicisa nobeni.”
8 Nkaako mboobu mbwaamba Mwami Leza Singuzuzyoonse ulati, “Nkaambo kakuti tiimwakaswiilila majwi aangu, 9 ndiyooita bantu boonse bakunyika amubelesi wangu Nebukadineza mwami waku Babuloni, mbwaamba Mwami Leza, Ndiyoobeetela kuti bazoolwane nyika eeyi abantu bayo amisyobo yoonse iibazingulukide. Ndiyoobanyoonyweeda limwi akuyoobacita kuti babe cisampuzyo acisesyo alunyonyooko lutamani. 10 Njoomanizya nguluulu zyakutangala akukondwa, majwi aanabwiinga aasibwiinga alimwi akulila kwamaziyo, amumuni walambe. 11 Cisi eeci coonse ciyooba tongo, misyobo eeyi iyoobelekela mwami waku Babuloni kwamyaka iili makumi aali ciloba.
12 “Pele myaka iili makumi aali ciloba yaakumana, njoosubula mwami waku Babuloni acisi cakwe, nyika ya Bakalodiya, akaambo kamulandu wabo. Mbwaamba Mwami Leza, ndiyoocita kuti cisi cakwe cinyonyoonwe kwalyoonse. 13 Ndiyooleta kunyika eeyo zintu zyoonse eezyo nzindaamba kuti ziyoocitika, zyoonse eezi zilembedwe mubbuku eeli, zyakasinsimwa a Jelemiya kwaamba zyamisyobo yoonse. 14 Balo lwabo beni bayootolwa mubuzike amisyobo minji. Buyootolwa abalupati-pati. Njoobabweedezezya bubi bweelede milimo yabo azeezyo nzyobacita.”
Leza mbwaakabeteka misyobo
15 Mboobu Mwami Leza wa Isilayeli mbwaakaamba kulindime wakati, “Bweza nkomeki eeyi iizwide waini wabukali bwangu, ukanywisye misyobo yoonse nkundakutuma. 16 Baakwiinywa, bayoodadalika akusondoka akaambo kankondo eeyo njeyootuma akati kabo.”
17 Aboobo ndakabweza nkomeki kuzwa mujanza lya Mwami Leza akunywisya misyobo yoonse ooko nkwaakandituma. 18 Ndakanywisya bamu Jelusalemu abamuminzi yoonse ya Juda, bamami bayo, abalupati-pati kuti banyonyoonwe akuba cisampuzyo, cisesyo acisinganyo mbuli mbobabede sunu.
19 Falo mwami wa Ijipiti, basololi bakwe,
balupati-pati abantu bakwe boonse,
20 abazwamasi boonse, bamami boonse baku Uzi.
Bamami boonse ba Bafilisiti, abaabo bazwa ku Asyikeloni,
Gaza, Ekiloni, abantu bakasyaala ku Asyidodi,
21 baku Edomu, Mowabu, abaku Amoni,
22 bamami baku Taya a Sidoni.
Bamami bamunsumbu zyalwizi,
23 baku Dedani, Tema, Buzi,
abaabo boonse balinyoola mpanza.
24 Bamami boonse baku Alabiya abamami
boonse babamasi aabo bakkala munkanda.
25 Bamami baku Zimuli, Elamu a Mediya.
26 Bamami boonse bakunyika, baafwiifwi akulaale,
omwe-omwe kuzwa mumalelo aamunyika.
Baakumaninina boonse, mwami waku Syesyaki uyooinywa awalo.
27 Baambile kuti, “Mboobu mbwaamba Mwami Leza Singuzuzyoonse, wa Isilayeli ulati, ‘Amunywe, mukolwe, muluke, amuwe mutakabuki limbi akaambo kapanga ndendiyootuma akati kanu.’ 28 Pele kuti bakake kubweza nkomeki iili mujanza lyako kuti banywe, ubaambile kuti, mboobu mbwaamba Mwami Leza Singuzuzyoonse ulati, ‘Mweelede kwiinywa.’ 29 Bona, ndatalika kuleta mapenzi kumunzi wiitwa zina lyangu, sena nywebo tamukoosubulwa ncobeni? Nsikoomuleka buyo kamutasubulwi, nkaambo ndabaletela panga boonse aabo bakkala munyika, mbwaamba Mwami Leza.”
30 Lino sinsima majwi aaya oonse ubaambile kuti, “Mwami Leza uyooyooma kuzwa kujulu.
Uyoopozomoka kuzwa kubusena bwakwe busalala. Uyoopozomokela cisi cakwe.
Uyoopozomoka mbuli baabo balyatauka nsaansa. Uyoopozomokela boonse bakkala munyika.
31 Lupyopyongano luyoomvwigwa kumagolelo aanyika, nkaambo Mwami Leza uyooipa milandu misyobo yoonse.
uyoobeteka muntu uuli woonse, akuyoojaya babi apanga. Mbwaamba Mwami Leza.”
32 Mboobu mbwaamba Mwami Leza Singuzuzyoonse ulati, “Mapenzi atalika kusikila misyobo yoonse, kwaboola guwo pati lizwida kumagolelo aanyika.” 33 Kuciindi eeco aabo bayoojaigwa a Mwami Leza banooli koonse-koonse, kuzwa kumagolelo amwi aanyika kuyoosika kuli amwi. Tabakooyoolilwa nokuba kubungikwa nokuba kuzikkwa, pele bayooba mbuli makwisyilili anyika.
34 Amulile mweeme, nywebo nobeembezi, amwaalabane muvu, nywebo nobasololi babutanga. Nkaambo ciindi cakujaigwa kwanu casika, mulawa akupwaika mbuli cibiya cibotu. 35 Beembezi kunyika nkobayootijila, basololi babutanga bayoobula kwakuyooyubila. 36 Amumvwe kulila kwabeembezi, kweema kwabasololi babutanga, nkaambo Mwami Leza wanyonyoona macezezyo aabo. 37 Nyika yanu yaluumuno ilaba niyoonyonyoonwa akaambo kabukali bwa Mwami Leza. 38 Mbubonya mbuli syuumbwa uuyoosiya cilawo cakwe, nyika yabo iyooba tongo, akaambo kapanga lyasikudyaminina, akaambo kabukali bwa Mwami Leza.