Jelemiya 24

Zinzuma zyobilo zyankuyu

¹ Lino Jehoyiyakini mwanaa Jehoiyakimu mwami wacisi ca Juda abalupati-pati, babezi abasibuuya bamu Juda nibakatolwa mubwaange kuzwa mu Jelusalemu akutolwa ku Babuloni a Nebukadineza mwami waku Babuloni, Mwami Leza wakanditondezya zinzuma zyobilo zyankuyu zyakabikkidwe kumbele lyaŋanda ya Mwami Leza. ² Cinzuma cimwi cakajisi nkuyu mbotu kapati, mbuli zeziya nsamba zitaanzi kubizwa, cinzuma cimwi cakajisi nkuyu mbi, zyakali mbi kapati cakuti tazikonzyi kuligwa.

³ Mpoonya aawo Mwami Leza wakandibuzya kuti, “Ino ubwene nzi, Jelemiya?”

Ndakaingula kuti, “Ndibwene nkuyu mbotu kapati, pele eezyo mbi nzibi cakuti tazikonzyi kuligwa.”

⁴ Aawo majwi aa Mwami Leza akandisikila akati, ⁵ “Mboobu mbwaamba Mwami Leza, wa Isilayeli ulati, ‘Mbubonya mbuli bubede nkuyu mbotu eezi, mbubonya oobo mbobabede bantu batolwa kunyika ya Bakalodiya. ⁶ Ndinoobalanga ooko kuti bakajane coolwe, nkabela njoobaboozya kunyika eeyi. Njoobayaka, nsikabooli pe, njoobasyanga, nsikabajwi. ⁷ Njoobapa moyo wakuti bakandizibe kuti ndime Mwami Leza. Bayooba bantu bangu, ambebo njooba Leza wabo, nkaambo bayoopilukila kulindime amyoyo yabo yoonse.’

⁸ “Pele kwaamba zyankuyu mbi kapati eezyo zitakonzyi kuligwa, mbwaamba Mwami Leza, mbubonya oobo mbwendiyoocita kuli Zedekiya mwami wacisi ca Juda, abalupati-pati bakwe abaabo bayoosyaala ku Jelusalemu, nikuba kuti bakasyaale muno munyika naa bakainke ku Ijipiti, ⁹ njoocita kuti bakasesemye akuba cilebyo kumalelo oonse aamunyika, bakabe cisesyo akasimi, babe cisampuzyo acisinganyo kuli koonse ooko nkweyoobatandila. ¹⁰ Njoobatumina nkondo, nzala acuumo mane kusikila bakanyonyooke munyika eeyo njindakabapa balo abasikale babo.”