Jelemiya 23

Lulangilo lwakumazuba aaboola

¹ Maawe kubasinsimi beembezi, aabo banyonyoona akumwaisya mbelele zyamacelelo aangu! Mbwaamba Mwami Leza. ² Nkaako mboobu mbwaamba Mwami Leza, wa Isilayeli kubeembezi aabo beembela bantu bangu ulati, “Akaambo kakuti mwamwaisya butanga bwangu akubutanda, tiimwabubamba, njoomupa cisubulo akaambo kazibi eezyo nzimwakacita,” mbwaamba Mwami Leza. ³ Mebo lwangu njooyobolola butanga bwangu oobo busyeede kuzwa muzisi zyoonse ooko nkundakabutandilide, ndiyoobuboozya kumacelelo aabo nkobuzoozyalisya akuvula. ⁴ Njoobabikkila beembezi aabo banoobweembela alimwi taakwe zinoosweeka. Mbwaamba Mwami Leza.

⁵ Mazuba ayoosika, mbwaamba Mwami Leza, nenjoobusizya Devedi mutabi uululeme, mwami ooyo uuyoolela cabusongo, uuyoocita ciluzi alimwi ciluleme munyika. ⁶ Mumazuba aakwe uyoovuna bantu ba Juda, bantu ba Isilayeli bayoolikkalila. Ndeeli zina ndyanooitwa unootegwa Mwami Leza wesu Wabululami.

⁷ Mazuba aayoosika, mbwaamba Mwami Leza, bantu nobataciyooambi limbi kuti, “Mbubonya mbuli Mwami Leza mbwali muumi, ooyo wakagwisya Baisilayeli mu Ijipiti,” ⁸ pele bayooti, “Mbubonya mbuli Mwami Leza mbwali muumi, ooyo wakaboozya balunyungu lwa Isilayeli kuzwa kucisi cili kunyika, kuzwa muzisi oomo mwaakabatandilide.” Aawo bayookkala munyika yabo beni.

Mulumbe wa Jelemiya kubasinsimi

⁹ Kwaamba zyabasinsimi, Jelemiya wakati, “Moyo wangu ulityompedwe kapati,

mafuwa aangu oonse alakankama. Ndili mbuli muntu uukoledwe,

muntu wazundwa waini, akaambo ka Mwami Leza, amajwi aakwe aasalala.

¹⁰ Nyika izwide basimamambe, nkaambo kakuti ilisinganyizidwe,

nyika yoonse yaba cimpayuma, macelelo aamunkanda ayuma.

Basinsimi batobela nzila zibi, babelesya nguzu zyabo buteelede.

¹¹ “Basinsimi abapaizi boonse tabalemeki Leza,

nomuba muŋanda yangu ndijana bubi bwabo, Mbwaamba Mwami Leza.

¹² Nkaambo kaako nzila yabo iyootezemuka. Bayootandilwa kumusinze ooko nkobayoonyonyookela.

Njoobaletela mapenzi mumwaka ngobayoosubulwa. Mbwaamba Mwali Leza.

¹³ Akati kabasinsimi baku Samaliya ndakabona cintu cibyaabi.

Balasinsima muzina lya Baali akusowa bantu bangu Baisilayeli.

¹⁴ Pele ndakabona basinsimi baku Jelusalemu kabacita cintu cibyaabi kwiindilila.

Balacita bumambe alimwi mbabeji, balayumya-yumya bacita zibi,

cakuti kunyina uusiya bubi bwakwe. Boonse kuli ndime bali mbuli bamu Sodomu,

Bantu bamu Jelusalemu bali mbuli baku Gomola.”

¹⁵ Nkaako mboobu mbwaamba Mwami Leza Singuzuzyoonse, azyabasinsimi baya ulati,

“Njoobacita kuti balye zilyo zilula akunywa maanzi aancefu,

nkaambo kwiindila mubasinsimi bamu Jelusalemu kutalemeka Leza kwayabaana mucisi coonse.”

¹⁶ Mboobu mbwaamba Mwami Leza Singuzuzyoonse ulati, “Mutaziswiilili eezyo basinsimi nzyobamusinsimina, bamwaambila zintu zyakubeja. Baamba zilengaano zyamanjezeezya aabo beni, kutali kuti zizwa ku Mwami Leza pe. ¹⁷ Baambila baabo bandisampaula kuti, ‘Mwami Leza waamba kuti munookkede muluumuno.’ Aabo batobela cinguni camyoyo yabo babaambila kuti, ‘Taakwe mapenzi ayoomuboolela pe.’”

¹⁸ Pele nguni akati kabo wakaimvwi munkuta ya Mwami Leza kuti abone nokuba kumvwa majwi aakwe? Nguni wakamvwa akuswiilila majwi aakwe? ¹⁹ Amubone kwaboola guwo kuzwa ku Mwami Leza libbubbula bukali bwakwe, kambizi aako kalundumwida amitwe yababi. ²⁰ Bukali bwa Mwami Leza tabukooleka, mane kusikila acite eeco ncakanzide kucita. Mumazuba aaboola muyoocimvwisya eeci.

²¹ Tiindakabatuma basinsimi aaba, pele bakaambilizya buyo makani aabo beni, tiindakakanana kuli mbabo pe. Nikuba boobo bakasinsima. ²² Pele nikwali kuti bakaima munkuta yangu nibakaambilizya majwi aangu kubantu, eelyo nibaleka nzila zyabo zibi amilimo yabo mibi.

²³ “Sena ndili buyo Leza uulaafwiifwi, mbwaamba Mwami Leza, Sena nsili Leza uuli kule? ²⁴ Sena muntu ulakonzya kuyuba musisikide kutegwa nditakonzyi kumubona? Mbwaamba Mwami Leza. Sena nsizuzyi julu anyika?” Mbwaamba Mwami Leza. ²⁵ Ndimvwide eezyo basinsimi nzyobaamba aabo basinsima zyakubeja muzina lyangu. Balati, “Ndalota! Ndalota!” ²⁶ Ino eeci cinooambwa kwaciindi cilamfu cili buti mumyoyo yabasinsimi babeji, aabo basinsima buyo manjezeezya aabo beni? ²⁷ Bayeeya kuti ziloto eezyo nzyobanga kabaambilana zilacita kuti bantu bangu balube zina lyangu, mbubonya mbuli basikale babo mbubakaluba zina lyangu kwiindila mukukomba Baali. ²⁸ Musinsimi ooyo uujisi ciloto aambe zyaciloto cakwe, pele ooyo uujisi majwi aangu aaambe cakusyomeka. Bwizu bujisi lubazu nzi amaila? ²⁹ Sena majwi aangu taali mbuli mulilo, mbwaamba Mwami Leza, ambuli nsando eeyo iipwayaula mwaala mutubeela-beela? ³⁰ Nkaako mboobu mbwaamba Mwami Leza ulati, “Nsibayandi basinsimi aabo babbilana majwi aayo ngendaamba. ³¹ Iiyi, mbwaamba Mwami Leza ulati, ‘Nsibayandi basinsimi aabo babelesya majwi aabo kwamana kabati, Mboobu mbwaamba Mwami Leza. ³² Kasimpe nsibayandi aabo basinsima ziloto zyakubeja. Mbwaamba Mwami Leza. Baambila bantu bangu akubasowa azyakubeja zyabo zyabuyo, nikuba kuti tiindakabatuma nokuba kubanomona. Tababagwasyi bantu aaba abuniini pe, mbwaamba Mwami Leza.’”

Mukuli waamba Mwami Leza

³³ Mwami Leza wakati kuli Jelemiya, “Ciindi bantu aaba naba musinsimi naba mupaizi bakubuzya kuti, ‘Ino mukuli nzi wa makani ngojisi aazwa ku Mwami Leza?’ Ubaambile kuti mukuli ngondiyumwide ndinywe, nkabela ndamusowa, mbwaamba Mwami Leza. ³⁴ Kuti naa musinsimi naba mupaizi naa umwi buyo waamba kuti, ‘Ngooyu mukuli wa Mwami Leza,’ njoomusubula muntu ooyo amukwasyi wakwe. ³⁵ Ncenciceeco ncomunga kamubuzyanya abeenzinyoko naa baluzubonyoko mulati, ‘Ino Mwami Leza wiingula kuti nzi?’ Naa ‘Ino Mwami Leza waamba nzi?’ ³⁶ Pele toelede kumwaambila mukuli wa Mwami Leza, nkaambo mukuli ngobaamba boonse mmajwi aabo. Basandula-sandula majwi aa Mwami Leza Uupona, Mwami Leza Singuzuzyoonse, Leza wesu. ³⁷ Nceeci ncotinooambila musinsimi, ‘Ino Mwami Leza wesu wakwiingula kuti nzi?’ Ino Mwami Leza waamba nzi? ³⁸ Nokuba kuti wati, ‘Ngooyu mukuli wa Mwami Leza,’ ‘Mboobu mbwaamba Mwami Leza,’ ulati, ‘Wabelesya kale majwi’ aakuti, ‘Ngooyu mukuli wa Mwami Leza,’ nikuba kuti ndakakwaambila kuti toelede kwaamba kuti, ‘Ngooyu mukuli wa Mwami Leza.’ ³⁹ Nkaako njoomuluba ncobeni akumutanda kuzwa kumbele lyangu, antoomwe abantu bamumunzi ooyo ngundakamupa abasikale banu. ⁴⁰ Njoomuletela mause aayo aatakamani, mause aatakamani aayo aatakooyoolubwa.”