Jelemiya 22
Mulumbe wa Jelemiya kuŋanda yabwami
1 Mboobu mbwaamba Mwami Leza ulati, “Koya kuŋanda yabwami yamwami wacisi ca Juda, ukaambilizye makani aaya, ukati, 2 ‘Komvwa majwi aa Mwami Leza omwami wa Juda, yebo ookkala acuuno ca Devedi, yebo, balupati-pati bako abantu aabo banjilila mumilyango eeyi. 3 Komuvuna kuzwa kuli sikudyaminina ooyo wabbidwa. Utanoobisyi nokuba kupenzya muzwakule, musyaala, naba mukamufu, utanoojayi batakwe milandu mubusena oobu. 4 Kuti naa kotobela malailile aaya kabotu-kabotu, bami aabo bakkala acuuno cabwami ca Devedi bayooinda mumilyango yaŋanda yabwami eeyi, kabayootantide nkalaki, amabbiza kabayoosindikilwa abalupati-pati babo abantu babo. 5 Pele kuti naa utakaswiilili malailile aaya, mbwaamba Mwami Leza, ndakonka muzina lyangu kuti ŋanda yabwami eeyi iyooba tongo.’”
6 Kayi mboobu mbwaamba Mwami Leza azyaŋanda yabwami eeyi yamwami wacisi ca Juda ulati, “Nikuba kuti uli mbuli Giliyadi kulindime, mbuli nsonje ya Lebanoni, kasimpe ndiyookucita kuti ube mbuli nkanda, mbuli minzi yakalongwa. 7 Ndiyootuma basikuzookunyonyoona, umwi aumwi uyooboola kajisi azilwanyo nkabela bayookosoola masamu aako mabotu aamulombe, akuyooasowela mumulilo.
8 “Bantu bazwa mumasi manji bayooinda munsi aamunzi ooyu, eelyo bayoobuzyanya kuti, Ino nkaambo nzi Mwami Leza naakacita cintu cili boobu kumunzi mupati ooyu?” 9 Kwiingula nkwakuti, “Nkaambo kakuti bakasiya cizuminano ca Mwami Leza wabo akutalika kukomba akumanina baleza bambi milimo.”
10 Mutalili mwami uufwide, mutoomoki, pele amulilile yooyo wakatolwa mubwaange,
nkaambo taciyoobooli tazooboni limbi cisi cokwabo.
11 Mboobu mbwaamba Mwami Leza azya Syalumu mwanaa Josiya ooyo wakaba Mwami wa Juda mubusena bwawisi, pele wakasiya busena buno. Takabooli limbi pe. 12 Uyoofwida kubusena ooko nkwaakatolwa mubwaange. Nyika eeyi tazooiboni limbi alimwi pe.
13 Maawe kuli yooyo uuyaka ŋanda yakwe yabwami munzila iitaluleme,
uuyaka maanda aamujulu munzila iitaluzi uubelesya buyo basicisinyina, uutababbadeli mali aanzyobabelekela.
14 Ulati, “Ndaliyakila ŋanda yabwami mpati, iijisi maanda mapati mujulu.”
Aboobo ulasiya myaako yampulungwido mukati, ulazibambya amapulanga aamulombe, ulaibotya amulambo uusalala.
15 Sena nkuti milombe minji njiicita kuti ube mwami?
Sena uso taakali kulilekela buyo zyakulya azyakunywa?
Wakali kucita ziluzi, nkabela zintu zyoonse zyakali kumweendela kabotu.
16 Wakali kukwabilila bacete ababulide, nkaako zintu zyoonse zyakamweendela kabotu.
Sena eeci tacili nkokuziba ndime? Mbwaamba Mwami Leza.
17 Pele uyandisya busyaacivulemwangu, ujaya bantu batakwe milandu, uyanda kudyaminina akupenzya bantu.
18 Nkaako mboobu mbwaamba Mwami Leza, azya Jehoiyakimu mwanaa Josiya mwami wa Juda ulati,
“Tabakooyoomulila, kuti ‘Maawe, omukwesu, maawe omukwesu,’
Tabakooyoomulila kuti, ‘maawe osimalelo wesu, maawe omwami wesu!’
19 Uyoozikkwa mbuli mbongolo, uyookwelaanyizigwa akusowegwa anze lyamilyango ya Jelusalemu.”
Jelemiya mbwaakaambilizya zya cisubulo ca Jelusalemu
20 Kamuya mu Lebanoni, mukoomoke, majwi aanu aamvwigwe mu Basyani,
moomoke kuzwa ku Abalimu, nkaambo beenzinyoko boonse bapwaigwa.
21 Ndakamucenjezya nomwakaliibide, pele mwakati, “Tatukooswiilila.”
Oobu mbomubede kuzwa kubukubusi bwanu, tamundiswiilili.
22 Luuwo luyoobbubbulwida beembezi banu boonse, beenzinyoko boonse bayootolwa mubwaange.
Ndendilyo nomuyoousa akufwa nsoni, akaambo kabubi bwanu nyoonse.
23 Nywebo nomukkala mu Lebanoni, nomuli mumaanda aamilombe,
muyootongela mwaakujatwa nsungo zili mbuli zyamukaintu uuminingana ciindi cakutumbuka!
24 Mbubonya mbuli mbwendi muumi, “Mbwaamba Mwami Leza, nokuba kuti yebo Jehoyiyakini mwanaa Jehoiyakimu mwami wa Juda koli mbuli nweenwe yangu kalungu kaamoyo, pele kunyina makani njookutanda. 25 Njookwaaba kuli baabo bayanda kukujaya, mbabo mboyoowa, kuli Nebukadineza mwami waku Babuloni aku Bakalodiya. 26 Njookuwaala yebo abanyoko bakakuzyala kucisi cimbi ooko nywebo nkomwatakazyalilwa. Ooko nyoonse nkomuyoofwida. 27 Tamukooyooboola kunyika eeyo njomusukamina.
28 “Sena mwaalumi ooyu Jehoyiyakini ncibiya cisampawidwe cipwaidwe eeco muntu uuli woonse ncatayandi? Ino nkaambo nzi walo abana bakwe ncibagwisigwa akutandilwa munyika njobatazi?”
29 Onyika, onyika, onyika, komvwa majwi aa Mwami Leza. 30 Mboobu mbwaamba Mwami Leza ulati, “Lemba mwaalumi ooyu kuti uli mbuli watakajisi bana,
muntu ooyo uutakajani coolwe mubuumi bwakwe, nkaambo taakwe walunyungu lwakwe uuyoozwidilila,
taakwe uuyookkala acuuno ca Devedi cabwami, nokuba kulela mu Juda.”