Jelemiya 21

Kuzundwa kwa Jelusalemu mbukwakasinsimwa

¹ Ngaaya majwi aakasikila Jelemiya kuzwa ku Mwami Leza, ciindi mwami Zedekiya naakamutumina Pasyuu mwanaa Malikija a Zefaniya mupaizi mwanaa Maaseiya. Bakati, ² “Tubuzizye ono ku Mwami Leza nkaambo Nebukadineza mwami waku Babuloni uyanda kutulwana. Ambweni Mwami Leza ulatucitila zigambya mbuli muciindi cakamana kutegwa Nebukadineza atuleke.”

³ Pele Jelemiya wakabaingula kuti, “Amukaambile Zedekiya kuti, ⁴ Mboobu mbwaamba Mwami Leza, wa Isilayeli, ulati, ‘Ndiyanda kunyonyoona zilwanyo zyanu zyankondo nzyomujisi, eezyo nzyomuyoobelesya mukulwana mwami waku Babuloni a Bakalodiya aabo bali anze lyabwaanda bamusinkilizizye. Mebo ndababunganya mukati kamunzi uuno. ⁵ Mebo lwangu ndime eetimulwane ajanza lyangu lyanguzu litandabede mukunyema mukukalala kapati. ⁶ Njoouma baabo bakkala mumunzi ooyu, bantu abanyama boonse, nkabela bayoofwa acuumo cibyaabi. ⁷ Musule aceeci, mbwaamba Mwami Leza, njooaba Zedekiya mwami wacisi ca Juda, balupati-pati bakwe, abantu bakkala mumunzi ooyu aabo bayoosyaala kucuumo, nkondo, anzala ku mwami Nebukadineza waku Babuloni akuli basinkondonyina aabo bayanda kubajaya. Uyoobajaya munkondo, takabeengeleli nikuba kubabeda aankumbu, nokuba kubeetelela.’”

⁸ Kunze aazeezi, ukaambile bantu kuti, “Mboobu mbwaamba Mwami Leza ulati, ‘Amubone ndamubikkila kumbele lyanu nzila iitola kubuumi anzila yalufu.’ ⁹ Kufumbwa ooyo uunookkede mumunzi ooyu uyoofwa munkondo, nzala naa cuumo. Pele kufumbwa ooyo uutizwide anze akulyaaba ku Bakalodiya aabo bamusinkilizizye uyoolekwa, takooyoojaigwa pe. ¹⁰ Ndikanzide kuti ndinyonyoone munzi ooyu kutali kuucitila cibotu pe. Mbwaamba Mwami Leza. Uyooabwa kumwami waku Babuloni, nkabela uyoounyonyoona amulilo.”

Zyaciinga cabwami bwa Juda

¹¹ Abalo baluzubo lwabwami bwa Juda baambile kuti, “Amumvwe majwi aa Mwami Leza, ¹² nywebo noluzubo lwa Devedi, mboobu mbwaamba Mwami Leza ulati, ‘Amubeteke bweelede cifumo-fumo cili coonse, amumuvune kuzwa kuli sikudyaminina ooyo wakabbidwa, kwataba boobo bukali bwangu buyoovutuka akutenta mbuli mulilo, akaambo kazibi nzyomucita, bukali buyootenta cakuti taakwe uunga wabuzima.’ ¹³ Ndamulwana nywebo nomukkala mu Jelusalemu, nywebo nomukkala atala aakkuti eeli mucuundu camabwe, mbwaamba Mwami Leza, nywebo nomuti, ‘Nguni uunga wakonzya kutulwana? Nguni uunga wakonzya kunjila mumayubilo eesu?’ ¹⁴ Njooisubula bweelede milimo yanu, mbwaamba Mwami Leza. Njookutula mulilo muzisaka ooyo uuzoosyukuta zyoonse eezyo zimuzingulukide.”